¹ Honi mashikushiku o liyuwa lyo mutekelo ku sunda, ko kushiilaula, Maria Magadalena ayepo keya kumbumbo ne ayepo mona liwe kolinatundishiwa ku mbumbo. ² Honi ayepo ndandumuka kuhuka kwa Simoni Pitolosi no ku mufundishiwi yumweya oyu nahimanga Jesu, ne ayepo wambela ci, ''Fumu anamutundisha mu mbumbo, njone oku anakamupaka.'' ³ Nehoni Pitolosi no mufundishiwi yumweya awopo athza, ne kuma athzile ku mbumbo. ⁴ Muwili wo kuma andandumukelelile pofoci, ne oyo mufundishiwi yumweya ayepo ndandumuka wanguwangu ayepo livanga kukakuma. ⁵ Nehoni ou ahokelile mo, ayepo mona ito yo line koinapakiwa pashi, unone kakengenine mukaci. ⁶ Simoni Pitolosi ayepo kuma munyima thzenji ne ayepo kengena mu mbumbo. Ayepo mona ito yo line koinapakiwa pashi ⁷ no ito eyo naikala ku mutwi wenji. Kaya kalile pofoci no ito yo line unone kuma yavungiwile no kuipakela payopayo. ⁸ Nehoni mufundishiwi yumweya, oyo walivangile kukakuma ku mbumbo, ayepo ingena mo naye, ne ayepo kamona no kutawa. ⁹ Mukonda shime ou akumine pesho shikati kanalimuka lin'olo eli liamba ci kenge apinduka kwakakufa. ¹⁰ Honi afundishiwi awopo ahuka kulyumbo kalo. ¹¹ Unone Maria kuma aimanine pola thzo mbumbo ku lila. Ou alilile kengeyo, ayepo hokela mu mbumbo. ¹² Ayepo mona man'eloi eli anavata ito yoikenu kwanakongomana limweya ku mutwi limweya ku maulu omu yalalile elama ya Jesu. ¹³ Aopo amuambela ci, ''Mbuyama, ine olila?'' Ayepo wambela ci, Mukonda anashimbi Fumu wange, ne kanilimuka oku anamupaka.'' ¹⁴ Ou ambile, ei ayepo piluka ne ayepo mona Jesu kunemana, unone kalimukile ci Jesu. ¹⁵ Jesu po muambela ci, ''Mbuyama, ine olila? Wafota elye?'' kuma anekelile ci nahimi ngwa shinda sha shilwa, honi ayepo muambela ci, ''N'athsile, ngeci onamutwala kwako onitingwele oku onamupaka, ne kenge nikamushimba. ¹⁶ Jesu po muambela ci, ''Maria.'' ayepo piluka no kuamba mushi Aramaiki, ''Raboni'' (kokuamba ci ''Mufundishi''). ¹⁷ Jesu ayepo muambela ci, ''Wanikwata, mukonda nishime kuthza kwa Tata, unone othze kwa apange okawatongwele ci kenge nithza kwa Tata no Tata wenu, Nyambi wange no Nyambi wenu.'' ¹⁸ Maria magadalena ayepo keya kunatongwela afundishiwi ci, ''Ninamono Fumu,'' ne onani ambela ei enu. ¹⁹ Lungulo welyo liyuwa, liyuwa lyo mutatekelo ku sunda, mashelo kwanayanjeliwa omu akalile afundishiwi kuyapa Majuda, Jesu ayepo keya kunemana mukaci ko no kuwambela ci, ''Kuliyala kukale nenu.'' ²⁰ Ou amanine kuamba ei, ayepo wamonisha moko enji no kumaci thzenji. Afundishiwi awopo anyanyuka ou amonine Fumu. ²¹ Nehoni Jesu ayepo amba kukwo kalo, ''Kuliyala kukale nenu. Eci eli ananitumu Tata, name namituma.'' ²² Jesu ou amanine kuamba ei, ayepo wapuyela peulu no kuwa ambela ci, ''Mutambule mupepo oukenu. ²³ Yomuhe oyu mutetela shivi shenji, shivi shenji shinateteliwa; Yomuhe oyu mukana kutetela shivi shenji, shivi shenji kashiteteliwa. ²⁴ Tomasi, yumweya kwawa o likuimi no eli, oyu ishiwa Didima, kakalile no Jesu ou akeile. ²⁵ Munyima afundishiwi wamweya awopo amuambela ci, ''Tunamono Fumu.'' Ayepo wambela ci, ''Shime ou nimona moko enji omu nakuingena mambambo, no kuingenisha minwe thzange omu nakuingena mambambo, kalo no kupaka lyoko lyange kumaci thzenji, kana kutawa.'' ²⁶ Munyima thzo mayuwa mutanu no mayuwa ahatu afundishiwi kuma akalile mukaci kalo, ne Tomasi kuma akalile no. Jesu ayepo keya mashelo kwana yanjeliwa, no kunemana mukaci ko no kuamba ci, ''Kuliyala kukale nenu.'' ²⁷ Nehoni ayepo ambela Tomasi ci, ''Olete kuno minwe thzoee ne omone moko ange. Olete kuno lyoko lyoe ne olipake ku maci thzange. Wakala okukana kutawa, unone otawe.'' ²⁸ Tomasi ayepo tawa no kumu ambela ci, ''Fumu wange no Nyambi wange.'' ²⁹ Jesu ayepo muambela ci, ''Mukonda onanimono, onatawa. Ali no fiyauthzi awa anakana kumona, ne atawa.'' ³⁰ Honi Jesu kuma akwamine imonisha imweya yoingi afundishiwi kwamona, imonisha ei inakana kun'oliwa omu mu buka, ³¹ unone ei inan'oliwa ci mutawe ci Jesu yoliyo Kilesite, Mwana Nyambi, ne omo mukutawa, kenge mukala no moyo mu lithzina lyenji.