¹ Nehoni Pilato ayepo shimba Jesu no kumushapa. ² Maswalale awopo akwama kuwani thzo mingunguya. Awopo athzipaka Jesu ku mutwi no kumu vateka shito shoshile sho ukiwu wo pulipela. ³ Awopo amu henyenena no kuamba kukwenji, "Yosho, Fumu wo Majuda!" Kwali no kumunthzalya mambanda. ⁴ Kalo Pilato ayepo thza pola no kua ambela, "Mumone, nina mumiletela pola mulimuke ci kaniwanine mulandu kukwenji." ⁵ Jesu ayepo puna pola, kona vata kuwani no shito shoshile sho ukiu wopulipela. Pilato ayepo wa ambela, "Mukenge, oyu munu!" ⁶ Ou apulisita owa kulu no anu wo apa na mono Jesu, awopo akuwa ku amba, "Akokoteliwe, akokoteliwe!" Pilato epo wa ambela, mu mushimbe amwe mu mukokotele, mukonda ame kaniwana mulandu kukwenji." ⁷ Majuda awopo amutawa, "Tuli no mulao, kowo mulao po aloela kufa mukonda onalipaka u mwana Nyambi." ⁸ Pilato ou nayuvu elye liywi, shime ayapa, ⁹ ayepo wingena mu kuta kalo no ku ambela Jesu, "Kupi otundelela?" unone Jesu kana mutawa. ¹⁰ Pilato epo muambela, "Hine okanena kuamba nange? Kolimuka ci nili no maci thzo ku kulukulula, no maci thzo kukukotela?" ¹¹ Jesu eyepo mutawa, "Koli no maci kukwange kutundishako aa ona piwa kutundelela kuwilu. Nehoni, oyu nani paka mumoko oye oli no shivi nene." ¹² Mukutawa kengeyo, Pilato shime afota kumu lukulula, unone Majuda kuma alikuwanine, kuamba, "Ngeci ulukulule oyu munu, ko kuteka Sesare. Yo muhe lipaka Ufumu yo shinda alwisha Sesare.'' ¹³ Pilato ou nayuvu awa maywi, epo utwala Jesu pola no kukongomana mushitulo shokatulo shiishiwa "Patelo," unone mushihevelu po "Gavatha." ¹⁴ Neli liyuwa lyo kuli loishela paseka, shikati sho mutanya. Pilato epo ambela Majuda, "Mumone, Fumu wenu oyu!" ¹⁵ Awopo akuwa, "Mupunishe, mupunishe, mukokotele!" Pilato ayepo wa ambela, "Nikokotele Fumu wenu?" Apulisita owa kulu awopo atawa, "Katuli no Fumu shime Sesare." ¹⁶ Honi Pilato epo apa Jesu ci amukokotele. ¹⁷ Nehoni awopo ashimbi Jesu, no kuthza nenji pola, kona lishimbela mbinda thzenji, kushivaka shiishiwa "shikola," kutaluthsa "Gologota'' mushi Hevelu. ¹⁸ Awopo amukokotela pa mbinda, kuma nakala no anu eli yumeya oku yumweya oku Jesu mukaci. ¹⁹ Pilato kalo epo n'ola shimonisha noku shipaka pa mbinda thza Jesu. kuma naku n'oliwa ci: JESU O NATHZARETA, FUMU O MAJUDA. ²⁰ Ungi wo majuda awopo avala apo pa shimonisha mukonda shivaka na kokoteliwa Jesu pa mbinda sha kalile po pepi no liumbo. Shimonisha shime sha n'oliwa mu shi Hevelu, mushi Roma no mushi Gelike. ²¹ Nehoni apulisita owa kulu awopo amba kwa Pilato, "wa n'ola, 'Fumu o majuda,' unone, 'Oyu shime a amba, "yame no Fumu o Majuda."'' ²² Pilato epo tawa, ''Eshi nina n'olo nina n'olo." ²³ Maswalale ou nakokotela Jesu, awopo ashimba ito yenji, kuiela ipinthzi ine, munu no munu no shenji; no shito sho peulu. Ne esho shito kanashikala no mapeka, shime sha lukiwa kengeyo mwene sho shihe. ²⁴ Awopo aluyuvanisha mukaci ko, "Twashi payula, unone tushifotishishe kuninga tulimuke ci inga shalye." Eyi shime ya kwamahala ci eshi shinan'oliwa shikwanene eshi shiamba ci, "Aliyela shikoveyo shange no kuhuka shito shange." Eshi sholiyo ana kwama maswalale. ²⁵ Honi awa aimanine kunyonga no mbinda thza Jesu kuma kwakalile, njina, mina njina Maria munu wa Kilopasi, no Maria Magadalena. ²⁶ Jesu ou amonine njina no mufundishi oyu nahimi kwa nemana popepi nenji, ayepo ambela njina, ''Mbuyama, omone mwanoe!'' ²⁷ Nehoni ayepo ambela mufundishiwi, ''Omone, njinoye!'' Kutunda mu shikati esho oyo mufundishiwi ayepo mushimba kutwala ku mutambela wenji. ²⁸ Munyima thzei, mukulimuka ci enu yoihe inapu honi kalo no man'olo oahe ayalisheleliwa, ayepo amba, ''Nayuva litwa.'' ²⁹ Shime kwakalile kafuma kokuyala ko waine, ne awopo apaka mo shiponji yo kuyala waine no kushi homeka ku mbafa thzo hosipa no kushi kushiyelula kushi paka ku kanwa kenji. ³⁰ Jesu ou amanine kunwa waine, ayepo amba, ''Inapu.'' ayepo wisha mutwi moyo wenji moliyo naupwela. ³¹ Nehoni Majuda, mukonda neli liyuwa lyo kuliloishela, ne elama kana iloela kukala pa mbimba lyo Savata (mukonda ethzo Savata kuma thzakalile thzo thzikulu nene), awopo alomba Pilato ci acolauliwe maulu no kuwatunisha po. ³² Nehoni mashwalale po akeya no kuna cola maulu oyu o mutatekela noyu o mushili awa angongotelile na Jesu. ³³ Ou akeile kwa Jesu, awopo amona ci onafu kale, Nehoni kana mucolo maulu. ³⁴ Shanga kengeyo, yumweya kwa mashwalale ayeopo mukin'a ku maci no n'othzi ne popo mwene puna unyinga no meyu. Oyu ³⁵ wamonine ei paki kalo upakai wenji wa shemwa. Alimuka ci ei ambile ya shemwa ci namwe mulitawe. ³⁶ Mukonda ei enu kuma yakwamahalile kuyalishelela lin'olo, ''Kwithsa shihsoko shenji shanga shofoci eshi sha kucoliwa.'' ³⁷ Kalo, lin'olo limweya lyamba ci, ''Kenge akumumona oyu nakin'i.'' ³⁸ Munyima thzei enu, Josefa oku Alimatea, oyu nakalanga mufindishiwi wa Jesu (unone mu kuliholeka kuyapa Majuda), ayepo lomba kwa Pilato ci ashimbe elama ya Jesu. Pilato po mutawethza. Honi Josefa po keya kunashimba elama yenji. ³⁹ Nekudema naye po keya, oyo watangile kukeya kwa Jesu ushiku. Kuma aletile mira thzo kuvandakana no aloe thzo meyumeyu thzothzingi. ⁴⁰ Honi awopo ashimba elama ya Jesu no kuivungela muito yo line no mithzi, eshi sholiyo shothzo sho Majuda sho kuvumbeka aka kufa. ⁴¹ Honi mushivaka amu ngongotelile kuma kwakalile shiwa; ne omo mushilwa kuma kwakalile mbumbo thzothzipe omu kushime kuvumbekiwa munu. ⁴² Mukonda neli liyuwa lyo kuli loishela kalo mukonda ethzo mbumbo kuma thzakalile pope, awopo akapaka mo Jesu.