¹ "Yame no shitondo shemwa sho veine, tata yoliyo mukwakulima. ² Ateta mitai ethzi thzikana kwima oshuka, kalo apa ngwela mitai thzo kwima eci thzime nene no kupaka oshuka. ³ Amwepo muna kene kale mukaci ko liywi elyo nani miambela. ⁴ Mukale ku kwange, kalo name kukwenu. Eci mutai eli ukana kwima no kupaka oshuka ofoci hime ukale kushitondo, ne mofoci eci yamwe nga kumona kamukala kukwange ⁵ Yame no shitondo, yamwe mwa mutai. Oyu kala kukwange name kalo kukwenji, ahema nene oshuka oungi, ko kupila ame kwithsa einga mukwama. ⁶ Kumona kwithsa oyu ukala ku kwange, na mikonjela kwako eci mutai no kukukuta, kalo kenge akuca mitai kuthzi konjela mumulilo, ne kenge thza kupya. ⁷ Kumona mwa kala ku kwange, kalo kumona maywi ange akala kukwenu, mulombe shoshihe eshi mufota ne kenge shakukwamiwa ku kwenu. ⁸ Tata ashangaliwa mukaci koshi, eci mwime nene oshuka kalo mwa afundishiwi ange. ⁹ Eci tata eli ana ni himi, name kalo ina mihimi. Mwikale mushihemo shange. ¹⁰ Kumona mwa tuleka milao thzange, kenge mwa kushiala mushihemo shange, eci eli nina tuleka milao thza tata no kukala mushihemo shenji. ¹¹ Nina miambela eyi eci kuloela kwange kukale kukwenu eci kalo kuloela kwenu kumanene. ¹² Ou oliyo mulao wange, eci mulihime munu na minenji eci eli ina mihimi. ¹³ Kwithsa oshihemo sho kupita munu oyu pa moyo wenji kwa ambushenji. ¹⁴ Mwa mbushange nga kumona mwa kwama eyi nina mitumina. ¹⁵ Kana kumisha apika, mukonda kalimuka eshi akwama mukwa kumutumina. Namisha ambusha, apo enu yoihe eyi ina yuvu kwa tata ina imitongwela. ¹⁶ Kali yamwe na munihangula, uno yame nani mihangula kalo no kumipaka eci muthze no kwima oshuka oungi nene, kalo eci oshuka wenu wikalelele. Eyi ili kengeyo eci shoshihe mwa kulomba kwa tata mulithzina lyange, kenge aku shimipa. ¹⁷ Eyi natumina eci mulihime munu na muenjenji. ¹⁸ Kumona kaye kamithzimba, mulimuke eci kanithzimba kushime kumithzimba. ¹⁹ Nga mwa ka kaye, kaye nga kamihima eci koliyo ko shinda. Uno mukonda kali mwa ka kaye kalo ina mihangula kutunda mukaye, nehoni kaye ka namithzimbi. ²⁰ Muvuluke liywi lyange eli nani miambela, eci mupika kapili mukwa kumutumina. Nga ani nyandisha, kenge kalo aku minyandisha kumona atuleka liywi lyange, kenge kalo akutuleka neli lyenu. ²¹ Kenge aku kwama yoihe eyi kukwenu mukaci ko lithzina lyange,mukonda kalimuka oyu na nitumu. ²² Nga kananikeye no ku wambela, nga kali no mango, uno katwesha kuhamula omango woo. ²³ Yo muhe oyu na nithzimbi ona thzimbi kalo tata. ²⁴ Nga kanani kwama ekwama mukaci ko eyi akana kukwama munu, nga kali no mango, uno honi ana mono kalo no kuthzimba ame no tata. ²⁵ Uno apa honi ayalishelela liywi lina n'oliwa mu mulao woo, 'Ana ni thzimbi pokupila mulandu.' ²⁶ Muhenga hengi apa wakwiya oyu na ku mitumena kutunda kwa tata, oliyo, mupepo oshemwa, oyu wa kuthza kwa tata kenge akumi paka. ²⁷ Namwe kalo mwanipaka, mukonda muna kala nange kutunda kumatatekelo.