Lihando 14

1 Micma thzenu thzahanjipa. Mwatawa kwa Nyambi munitawe name. 2 Munjiyo thza tata moili ivaka yoingi. Nga kali kengeyo, nganina mitongwela, nathza kuka miloishela mokukala. 3 Nga nathza kuka miloishela mo kukala, kenge na kwiya kalo kunamishimba, eci oku nili namwe mu kaleko. 4 Muna limuka likun'wa lyo kuthza oku nithza. 5 "Tomasi ayepo amba kwa Jesu, "Fumu, katulimuka oko othza, ngepi tulimuka likun'wa?'' 6 Jesu ayepo muambela, "Yame no likun'wa, no shemwa, kalo no moyo; kwithsa okwiya kwa tata hime muliyame. 7 Nga munalimuka, nga muna limuka no tata kalo. Kutunda pano no kuthza poshomuna limuka kalo muna mumono." 8 Filipi ayepo amba kwa Jesu, "Fumu, otumonishe tata, apo kenge kukala shiwa ku kwetu. 9 "Jesu ayepo muambela, "Nina kala nenu mayuwa oangi kalo konilimukile, Filipi? Yomuhe oyu nani mono ona mono tata. Ngepi muamba eci, 'Otumonishe tata'? 10 Kamutawile eci amepo nili kwa tata kalo no tata oli kukwange? Maywi aniamba ku kwenu kani a'mba kokolo wange, uno tata oyuli kukwange akwama shikwama shenji. 11 Munitawe eci nili kwa tata, kalo no tata oli ku kwange, kalo mutawe mukaci ko ekwama. 12 Shemwa, shemwa, namiambela, yomuhe nitawa akwama shikwama eshi ni kwama, kalo kenge aku kwama ekwama yo yikulu nen kupita ei mukonda na hathza kwa tata. 13 Yoihe ei mwa kulomba mu lithzina lyange, kenge na kuikwama eci tata awane kumu shangala ko mwana. 14 Kumona mwa nilomba shimweya mulithzina lyange, kenge na kushikwama. 15 Nga mwa nihima, kenge mwa kutuleka milao thzange. 16 Kalo kenge na kulombela kwa tata, ne kenge kalo aku mipa mupepo oukenu eci wakukalele ku kwenu. 17 Mupepo oshemwa. Litunga ko lya kutambula mukonda kaliumono shianga kulimuka. Uno mwa ulimuka, apo wakala nenu kalo kenge wakukala nenu. 18 Kona kumishiya mwafoci; kenge naku muhukela. 19 Mu mayuwa oa onye kalo litunga kolya kunimona, uno kenge mwa kunimona. mukonda nayuya, namwe kenge mwa kuyoya. 20 muliyuwa elyo kenge mwa kulimuka eci nili kwa tata, kalo eci muli ku kwange, kalo eci nili kukwenu. 21 Oyo oli no milao thzange kalo noku thzituleka yoliyo na nihimi, kalo oyu na nihimi kenge aku muhima tata, kalo kenge na kumuhima kalo kenge na kumonahala kukwenji. 22 Judas (Kali Isakariota) ayepo a'mba kwa Jesu, "Fumu, kwakeya ngepi eci wakumonahale ku kwetu uno kali kulitunga?" 23 Jesu ayepo tawa no kuambela, "Nga munu yomuhe anihima, kenge akutuleka liywi lyange. Tata henge akumihima, kalo kenge twa kwiya kukwenji kalo kenge twa kutunga kukwenji. 24 Oyu kana kunihuma katuleka maywi ange. Liywi eli muyuva ka litundu ku kwange uno lya tunda kwa tata oyu na nitumu. 25 Nina miambela eyo, pano nili nenu. 26 Shianga hengeyo, mupepo oukenu ou tata akutuma mulithzina lyange-kenge wa kumilongethsa inu yoihe kalo kenge wakumi vulukisha yoihe ei ina miambela. 27 Na mishiya mukuliyala; namishiyela kuliyala kwange. Kani mipa eci akwa litunga eli apa. Lelo mwanjipa mu mucima, kalo mwa kuyapa. 28 Na muyuvu eci nani miambela, 'Nathza, kalo kenge na kumihukela.' Nga muna nihimi, kenge nga mwa kunyanyuka mukonda nathza kwa tata, Tata po mukulu kuni pita. 29 Ne nina miambela kuishime kutendahala ec, apa ya kukwamahala, mwa kutawe. 30 Kana kuamba kalo nene nenu, fumu olino litunga akeya. Kali no kolo papange. 31 Uno eci kaye ka kulimuka eci nina himi tata, na kwama eci eli na nitumina tata. Tu katukenu tuthzenu tutunde muno.