¹ Wakompolola boonse bali ikumi ubobile ukupa insana ubwendelezhi bwa kukusha ma daimona ukuponya malwazhi. ² Wakabatuma kuya kukambauka makani a bwami bwa Leza ukuponya balwazhi. ³ Wakaamba kuli mbabo, ''Mutabwezi chili choonse amusinzo-nuba musako, nikaba impotomona, nichiba chinkwa, naba mali, nichiba chisani chimwi. ⁴ Kufumbwa in'ganda njimukaanjila amukakale kushikila mukakuhwe. ⁵ Koonse nkubati batakamutambuli, mwakashiya busena bobo, amukalikunkumune lufuko kumatende enu kwaamba bukabe bumboni kuli mbabo.'' ⁶ Bamane bakazhimuka baya mu minzhi, kuya bukambauka mulumbe mubotu ukuya buponya koonse. ⁷ Lelyo Heloda nakatelela shoonse shakakuchitika, wakanyongana nkaambo chakaambwa ubamwi ati Johani wakabuka kuvwa ku bafu, ⁸ ulimwi bamwi bakaamba ati Eliya washika, abo bamwi ati umwi wa bashinshimi bakale kale wabuka. ⁹ Helodi wakaamba, ''Ndakamukosola mutwi Johani. Nguni wezu ngwinteleleshintu sheshi?'' Ubobo wakasola kwaamba amubone. ¹⁰ Batumwa nibakazhoka, bakamushimwina shoonse nshibakachita. Wakabatola ambali, amane bakaya chakutabona ku busena butewa Betisaida. ¹¹ Pele makamu abantu nibakatelela, bakamuchilila. Wakabatambula ukubakambaukila makani a bwami bwa Leza, alimwi wakabaponya babo bakuzanda kushilikwa. ¹² Lelyo buzuba nibwakuya bumana, bali ikumi ubobile bakashika kwakwe ukwaamba, ''Bashimwine bantu baye mu minzhi ili afwaafwi kwaamba bayane kwa koona ushakulya nkaambo kono kubusenankutubele nkulaale.'' ¹³ Pele wakabambila ati, ''Amubape chakulya.'' Bakaamba twiina shibaala ashinkwa shotatwe iinswi - chita tukuya tukaule cha bantu boonse baba.'' ¹⁴ (mweelwe balombwana kabashika ku shuulu shili shosanwe.) Wakabashimwina bashichiiya bakwe ati, Amubakalike mutubunga twa mweelwe wa bantu bashika ku makumi osanwe kamwi u kamwi.'' ¹⁵ Inzho bakachita mbubona, ukubakahika anshi bantu. ¹⁶ Kubweza shinkwa shosanwe iinswi shobile wakalanga kwizeulu, washilongezha ukushikomauna mu tupanzha panzha ukupa bashichiiya kwaamba basengelele makamu abantu. ¹⁷ Boonse bakalya cha kukuta, ushesho shakashaala shakabwezelelwa ukuzuzha shinzuma shili - ikumi u shobile. ¹⁸ Chakachitika bobo kwaamba Jeso naka kukomba, bashichiiya kabali aze. Wakababuzha ati, ''No bantu balaambaati ndime ni?'' ¹⁹ Bakaingula ati, Johani mupapatizhi. Pele bamwi balaamba ati Elija, ulimwi bamwi balaamab ati umwi wa bashinsimi bakale kale wabuka.'' ²⁰ Amane wakaamba kwabo ati, ''Pele umwe mulaamba ati ndime ni?'' Pita wakataba ati, ''Munanike Kilisito wa Leza.'' ²¹ Pele wakabalailila ukubachenjezha kwaamba batabi nibaambila muntu naaba womwi, ²² kwaamba, Mwana a Muntu ulyelele kupenga ku shintu shinji shinji uku kakwa ku basololi uku bapaizhi u balembi, alimwi ula kayayiwa pele buzuba bwa tatu ulaka bushiwa.'' ²³ Amane wakabambila boonse ati, kuti kwakuli muntu uzanda kunchilila, ulyelele kuliluba amane abweze chichinkano chakwe anchilile. ²⁴ Kufumbwa wezo ufutula bumi bakwe ulabuswekelwa, pele kufumbwa wezo uswekelwa bumi bwakwe ukaambo kangu ulabuyana. ²⁵ Nchibotu nzhi muntu kuhuba inshi yoonse amane waswekelelwa bumi bwakwe? ²⁶ Kufumbwa wezo ungusa insoni u mazwi angu aze Mwana muntu ulakamuusa insoni chiindi akeza mubulemu bwakwe alimwi u mubulemu bwa Taata u bangelo basalala. ²⁷ Pele chini chini ndamushimwina ati, nkubali awa bazhimine batakaiti mu lufu kabatana kububona bwami bwa Leza.'' ²⁸ Inzho nikwaita mazuba ali lusele kuvwila Jeso nakaamba mazwi aza, wakabweza Pita Johani u Jemusi bakaya kukomba a lupili. ²⁹ Chiindi naka kukomba bushu bwakwe bwakasanduka, alimwi shisani shakwe shakatuba buu. ³⁰ Bona, balombwana bobile kabaamba aze, Mozesi u Elija, ³¹ balo bakaboneka mu bulemu, kubandika aze makani akwe akuya, alo akuli afwaafwi kumaninia mu Jelusalema. ³² Pita ubabo mbakuli abo kabali mutulo, pele nibakabuka, bakabona bulemu bwakwe u balombwana bobile bakuhimine aze. ³³ Nibakuya bukuvwa kwa Jeso, Pita wakamwambila ati, ''Mwami, nchibotu kuli uswe kuba kono. Atuzake maanda otatwe, yomwi yako, yomwi ya Mozesi, u imwi ya Elija.'' (katezhi nchakakwaamba.) ³⁴ Naka kuchaamba aza, ikumbi lyakashika ngoona lyabahumba, alimwi bakatiya nibakenjila mwikumbi. ³⁵ Izwi lyakavwa mwikumbi, lilaamba, ''Wezu inguwe Mwanangu, walo musale; amutelele kwakwe.'' ³⁶ Chiindi izwi nilyakamana kwaambwa, Jeso wakayanwa uli iche. Bakaumuna alimwi kwiina ngubakambila kuchiindi checho kuli checho nchibakabona. ³⁷ Mubuzuba bwakachilila, nibakaseluka kuvwa a lupili, imbungano ya bantu yakamuswanganya. ³⁸ Bona, mulombwana kuvwa mumbungano wakapozomoka, ulaamba, ''Mwiiyi, Ndakulomba umulange mwanangu, ukuti ngu mwana buyo ngwinkwete. ³⁹ Mubone, moza ulamwendelezha alimwi ulamukwiizha; chilamupa kusansa ukuvwa iyovu ku mulomo. Kwiina nichimuleka kufwambaana alimwi chilamushiya walichisa chibyaabi. ⁴⁰ Ndakalomba bashichiiya bako kwaamba bachikushe pele bakakakilwa.'' ⁴¹ Jeso wakaingula ukwaamba ati, Umwe nubantu batashomi alimwi bashichinguni, nchilamfu buti chiindi nchinkaba amwe alimwi ukumuchitila kwaamba mushome? Mulete mwanako.'' ⁴² Chiindi mwembezhi nakuya bwiza, i daimona lyakamuwisha anshi ukumupa kusansa chini chini. Pele Jeso wakolemanina Moza mubiyabi amane wakamuponya mwembezhi, ngona wakamutambika ushi. ⁴³ Ngoona boonse bakazoowa ku bukando bwa Leza. Nibakuchizoowa kushiintu nshakuchita, wakambila bashichiiya bakwe ati, ⁴⁴ ''Amuleke mazwi azo anjilishe mu matwi enu: Mwana a Muntu ulakaabwa ku matashi a bantu.'' ⁴⁵ Pele baina nibakatelelesha ku kaambo kaka. Kakasesekwa kwabo, baina nibakabuzhiba bupandiluzhi, alimwi kabafwile bukandu kubuzha ku kaambo kaka. ⁴⁶ Inzho bakatalika kukazhanya makani akati kabo ukaaba mukando. ⁴⁷ Pele Jeso, mukuzhiba matelaishi ali mu myozo yabo, wakabweza mwana mushoonto wamuzhimika kumbali kwakwe ⁴⁸ ukubaambila ati, ''Kufumbwa wezo utambula mwana wezu mwizhina lyangu, ulantambula ume; alimwi kufumbwa wezo wantambula, wamutambula uwezo wakantuma. UKuti kufumbwa wezo mushalizhi akati kenu inguwe mukando.'' ⁴⁹ Johani wakaamba, ''Mwami, twakabona umwi ulatanda ma daimona mwizhina lyako mane twamukasha, nkaambo takuchilila antoomwi aswe.'' ⁵⁰ ''Mutamukashi,'' Jeso wakaamba, ''nkaambo kufumbwa wezo utali shinkonodo nokwenu nguwenu.'' ⁵¹ Mazuba nakaswena afwaafwi akutolwa kwizeulu, wakalibambila kuya ku Jelusalema. ⁵² Wakatuma bashichiiya kumbele lyakwe, bakaya kunjila mu munzhi wa Samaliya kuya kumubambila. ⁵³ Pele bantu bakoko baina kukamutambula nkaambo kalibambilile kuya ku Jelusalema. ⁵⁴ Chiindi Jemusi u Johani bashichiiya nibakachibona chechi, bakaamba ati, ''Mwami sa ulazanda kwaamba twambile mulilo kuvwa kwizeulu kwamba ubazonaune?'' ⁵⁵ Pele wakachindulukila nkubabele ngoona wabalemanina, ⁵⁶ bamane bakaya ku munzhi umwi. ⁵⁷ Nibakuchiiya munzhila, umwi wakamwaambila ati, ''Ndakuchilila kufumbwa nkuuya.'' ⁵⁸ Jeso wakamwaambila ati, ''Ba Mwaaba balikwete malindi, alimwi bazuni bamwizeulu balikwete shitaanto, pele Mwana a Muntu wiina akubika mutwi wakwe.'' ⁵⁹ Ngoona wakaambila umwi ati, ''Nchilila.'' Pele wakaamba ati, ''Mwami taana ndukuya nkazhike ba taata.'' ⁶⁰ Pele wakamwaambila ati, ''Baleke bafu balizhike beni. Pele uwe lwako, koya ukakambauke kulaale mu masena oonse makani a bwami bwa Leza.'' ⁶¹ Ngoona aze umwi wakamwaambila ati, ''Ndakuchilila pele taana mbalaye babo boonse ba n'ganda yangu.'' ⁶² Jeso wakamwiingula ati, ''Kwiina muntu ukwete iyamba amane ulachebuka munshi uyelele mu bwami bwa Leza.''