¹ Jeso nakamanizha kwamba twambo toonse ntubakakutelele bantu, wakaya ku Kapenaumu. ² Inzho mukando wabashilikani kakwete muzhike ngwakuzanda maningi, kali mulwazhi cha lufu. ³ Wezu mushilikani nakatelela makani a Jeso, wakatuma kwakwe bakando baba Juda, kumulomba kwamba ashike amuponye muzhike wakwe. ⁴ Nibakashika kwa Jeso, bakamulomba chakumwenzelezha, bakamba ulyelele kuya kumuchitila chechi, ⁵ nkambo ulachizanda chishi chesu, alimwiinguwe wakatuzakila sinagogo wesu.'' ⁶ Ngona Jeso wakatolelela kuya bwenda abo. Pele natakakuna kushika afwaafwi inganda, mukando wabashilikani wakatuma benzhina kwa Jeso kuya kwamba kwakwe ati, ''Mwami utalishupa buyo, nkambo ndina chelelo chokuleta munganda yangu. ⁷ Nchichecho nchichampa kwamba intashika kwako, pele amba buyo izwi muzhike wangu ulapona. ⁸ Nkambo ame ndimusololi wa mulawo, uba shilikani munshi lyangu. Ndamba kuli wezu, 'Koya,' ulaya, ukulli umwi, 'Kweza,' ulashika ukubazhike bangu, 'Chita chechi,' amana wachichita.'' ⁹ Jso nakatelela bobo,wakamuzowa,wakachindulukila kunkamu yakakumuchililewamba, ''Ndamba kuli umwe, kwiina nikuba ku Izilaeli nkundakayana lushomo lolu.'' ¹⁰ Babo bakatumwa nibakapiluka kun'ganda bakayana muzhike wapona. ¹¹ Ndilyona lelyo, Jeso wakaya ku nkambe yakutewa Naini, bashichiiya bakwe iinkamu inkando mubakaya abo. ¹² Nibakashika kumanjililo a nkambe, mulombwana wakufwile kabamubwezele, mulombwana iche wakuzhelwe kwa baina (wakuli muka mufu), inkamu inkando yakavwa munkambe kabali ayo. ¹³ Inzho Mwami nakamubona mukaintu wezu wakamufwila luse ukumwambila ati, ''Utalila.'' ¹⁴ Ngoona wakaya kukwata ku machila nguba kuubwezelele mutunta, babo bakakuzemwine bakazhima. Wakamba, ''Mwembezhi, Ndamba kwako, buka." ¹⁵ Mufu wakakala ukutalika kwamba, ngoona Jeso wakamupa kwa baina. ¹⁶ Inzho bakanjilwa bukandu boonse, alimwi bakaitilizha kulumbaizha Leza, kwamba ''Mushinshimi mukando wabuka akati kesu'' alimwi ''Leza walanganya abantu bakwe.'' ¹⁷ Aza makani aka Jeso akamwaala moonse muchishi cha Judeya ukumasena akuzhingulukile. ¹⁸ Bashichiya ba Johani bakamushimwina shonse shakachitka. ¹⁹ Ngoona Johani waketa bashichiya bakwe bobile ukubatuma ku Mwami kuya kwaamba , ''Sa ndiwe wezo uzhiza, na tuchilindila unji?'' ²⁰ Nibakashika kufwafwi kwa Jeso, balombwana baba bakamba, ''Johani mupapatizi watutuma kwako kwamba twambe ati, 'Sa ndiwe wezo uzhiza na, natuchilindila unji?''' ²¹ Muchiindi nchichona chechi wakaponya bantu banji banji bakusata malwazhi a myoza mibiyabi alimwi boofwu bakabona. ²² Jeso wakabaingula ukwamba ati, ''Mwamana umushinzo wenu, mukambe kwa Johani nchimwabona ukutelela. Bofwu balabona, balema baleenda, bashi chinsenda bapona, bantu batateleli batelela, bafwu babushiwa, bapushi bashimwinwa mazwi mabotu. ²³ Wezo muntu utaleka kushoma muli ume nkambo kamichito yangu ulilongezhelwe.'' ²⁴ Nibakaya bashikutumwa kwa Johani, Jeso wakatalika kwambila inkamu makani aka Johani, "Nchinzhi nchimwakaila mu lukula kuya kubona? Sa ndubu lwazunganyiwa u muuwo? ²⁵ Pele nchinzhi nchimwakaya kubona ? Mulombwana usamine shisani shuuba? Bona, babo basama shisani shidula ukukala bumi bubotu balakala chakuliba mumanda abwami. ²⁶ Pele mwakaya kubona nzhi? Sa mushinshimi? Ee, Ndamba kuli umwe, alimwi kubaala mushinshimi. ²⁷ Wezu inguwe wakalembwa, 'Bona ndatuma mutumwa kumbele lyako walo ukabamba inzhila yako kutana kushika.' ²⁸ Ndamba kuli umwe, boonse babo bakazhalwa kubakaintu kwiina ubaala Johani. Pele wezo mushoonto mu bwami bwa Leza mukando kumubaala.'' ²⁹ (Bantu boonse nibakatelela aza, kusanganya ubashimutelo, bakamba ati Leza ulasalala, nkambo bakapapatizwa ulupapatizo lwa Johani. ³⁰ Pele ba Falisi ubashimulawo baakaka muzeezo wa Leza kuli mbabo, baina nibakapapatizwa u Johani.) ³¹ Mbubuti, inzho, mbwinkonzha kubakozhanya bantu bamusela weno? Bali ukoya nzhi? ³² Bali ukoya bana basobanina ku mushika, ukwamba umwi kumwenzhina, 'Twalizha ingoma pele tamuzhana. Twaimba lwiimbo lwa malilwe pele mwiina nimwalila.' ³³ Johani mupapatizi wakeza kutalya chinkwa ukutanwa waini, pele mwakamba ulikwete myoza mibiyabi.' ³⁴ Mwana muntu wakeza ulalya ukunwa, mulaamba, 'Amubone muntu mulyato alimwi ngu chakolwa, mwenzhina ubashimutelo uba shishibi!' ³⁵ Pele busongo buliluleme kubanakwe boonse.'' ³⁶ Inzho umwi waba Falisi wakamutamba Jeso kwamba balye aze. Inzho Jeso nakanjila munganda ya mu falisi, wakakala kwi tebulu kulya. ³⁷ Kakuli mukaintu mumunzhi wakuli shishibi. Nakatelela ati Jeso ulalya mun'ganda ya mu falisi, wakaleta chikopo cha mafuta anunkilila. ³⁸ Wakazhima kumanuma kufwafwi umatende, ulalila, wakatontozha matende a Jeso umisozhi yakwe, amane wepukuta umasusu akwe amumutwi ukushonta ku matende akwe amane wamunanika mafuta anunkilila. ³⁹ Inzho mu falisi wakutambile Jeso nakabona chechi, wakatelaika mukamwini, kwamba wezu mulombwana nakuli mushinshimi, nazhiba mushobo wamukaintu wamukwata mbwabele, kwamba ngushishibi." ⁴⁰ Jeso wakamwingula ati, "Saimoni, Ndikwete chakukwambila.'' Wakaamba, ''Chaambe, Mwiiyi!'' ⁴¹ Jeso wakamba, ''Umwi muntu wakukweletesha kakwete mbakakweletesha bobile mali. Umwi wakakweleta myanda yosanwe a lubulo, umwi makumi osanwe. ⁴² Nibakakakilwa kuzhola mali, wakabalekelela boonse bobile. Inzho, nguni ukamuzanda kubala?'' ⁴³ Saimoni wakataba ukwamba, ''ndatelaika ati nguwezo wakukwete mali manji manji kwakwe.'' Jeso wakamba kwakwe, "Wabeteka kabotu.'' ⁴⁴ Jeso wakachindulukila kumukaintu ukwamba kwa Simoni, ''Wamubona wezu mukaintu.Ndenjila munganda yako. Kwiina nimwampa menzhi akusamba ku matende, pele watontozha matende angu umisozhi yakwe ukukunkumuna umasusu akwe. ⁴⁵ Uwe wiina nuwa nshonta. Pele walo kuvwa nindashika ulashonta matende angu. ⁴⁶ Mwiina nimwananika mutwi wangu mafuta, pele walo wananika kumatende mafuta anunkilila. ⁴⁷ Inzho Ndakwambila uwe, shibi shakwe, shakuli shinji shakuli shinji shinji, shalekelelwa-nkambo watondezha luzando lukando. Pele wezo walekelelwa chishoonto, uluzando ndushoonto.'' ⁴⁸ Ngoona wakamwambila, ''Shibi shako shalekelelwa.'' ⁴⁹ Babo mbuba kakulya abo bakatalika kulyambauzha beni, ''Nguni wezu ukonzha kulekelela shibi?'' ⁵⁰ Inzho Jeso wakaamba kumukaintu, ''Lushomo lwako lwa kufutula. Koya mulumuno.''