¹ Inzho chakachitika buzuba bumwi bwa Sabata Jeso kaya bweenda mu muunda wa maila, bashishiiya bakwe kabaya bubwezelela makunka a maila, balapikisa mu matashi abo bamana balya inseke. ² Pele bamwi ba ba Falisi bakaamba ati, "Nkaambo nzhi mulachita chitaluleme kuchtwa mu buzuba bwa Sabata?'' ³ Mukubaingula, Jeso wakaamba ati, "Sa mwiina nimwakabala u checho nchakachita Davida nakafwa inzala ulwakwe mwini antoomwi ubabo mbakakuli abo? ⁴ Wakaya kunjila muchikombelo wabweza chinkwa chisalala amane wachilya chimwi ukupako balombwana mbakuli abo kwaamba abo balye nikuba kwaamba bakwelele kulya mbu BaPaizhi.'' ⁵ Amane wakabaambila ati, "Mwana a Muntu inguwe Mwami uwa Sabata.'' ⁶ Chakachitika buzuba bumwi bwa Sabata lelyo nakaya mu sinagogu kuyiisha bantu bamwi. Awo kaliwo mulombwana umwi wakkuli itashi lyakuzuminine. ⁷ Balembi u ba Falisi kabamulanjilile chini chini kwaamba babone na ukalaponya muntu mu buba baw Sabata, kwaamba bakonzhe kumuyanina mulandu. ⁸ Pele wakezhiba nchubakutelaika ngoona wakambila mulwazhi itashi ati, "Zhimuka uzhime akati lya bantu boonse." Mulombwana wezo wakaya wazhima awo. ⁹ Jeso wakabaambilaati, "Ndamubuzha umwe ati, sa chili mu mulawo kuchita chiluleme na kuchita chitaluleme mu buzuba bwa Sabata, kufutula na kuyaya?" ¹⁰ Amane wakabalangilila boonse ngoona wakambila mulwazhi ati, "Tandabika itashi lyako.'' Wakachita bobo, ngoona itashi lyakwe lyaapona, ¹¹ pele balo bakazula bukali ukutalika kubandishanya nchubati bachite kwa Jeso. ¹² Chakachitika mu mazuba azokwaamba wakaya ku lupili kukukomba. Wakakomba mashiku oonse kwa Leza. ¹³ Nibwakacha muunza, Waketa bashichiiya bakwe, amane wakasala bali ikumi u bobile akati kabo mbaketa ati batumwa. ¹⁴ Mazhina a batumwa kabali Saimoni (walo ngwakaulika ati Pita) umunina Andulu, Jemusi, Johani, Filipo, Batolomeu, ¹⁵ Mateyo, Tomasi, Jemusi mwanakwe Alufiyasi, Saimoni shi luse, ¹⁶ Judasi mwanakwe Jemusi, u Judasi isikaliyoti, wakaba shikumwaaba. ¹⁷ Ngoona Jeso wakaseluka a lupili antoomwi abo amane wazhima anshi iinkamu yabashichiiya bakwe u bantu banji banji bavwa ku Judiya ukumbaali kwa lwatele ku Taya uku Sidoni. ¹⁸ Bakashika kupupulalakwakwe ukushilikwa malwazhi. Abo bantu bakupenzhewa ku myoza mibiyabi bakashilikwa. ¹⁹ Boonse bakuli munkamu bakakusoleka ati bamugume nkaambo insana shakushilika shakuvwa kwakwe, alimwi wakabaponya boonse. ²⁰ Ngoona wakabalangilila bashichiiya bakwe ulaamaba, "Muli lonjelelwe umwe nu bapushi, ukuti bwami bwa Leza mbubwenu. ²¹ Muli lonjelelwe umwe numufwa inzala inzho, nkaambo mulakekuta. Mulilonjelelwe umwe numulila inzho, nkaambo mulakaseka. ²² Muli lonjelelwe kuti bantu bamusula, kuti bamusala ukumutuka alimwi ukumwaamba ati muli bashishibi nkaambo ka Mwana a Muntu. ²³ Amubotelwe buzuba bobo, nkaambo chini chini mulakakatambula bulumbu bukando kwizeulu, nkaambo u bashakale babo imbubo mbubakabapenzha bashinshimi. ²⁴ Pele mawe kuli umwe nubavubi, ukuti mwabutambula kale bubotu bwenu. ²⁵ Mawe kuli umwe nimukushi, ukuti mulakafwa inzala kumbele. Mawe kuli umwe nimuseka cheno chiindi, ikuti mulakomoka ukulila kumbele. ²⁶ Mawe kuli umwe kuti boonse bantu balamwaamba bubotu, ukuti imbubo bashakale babo mbubakubaamba bashinshimi babeshi. ²⁷ "Pele ndamwaambila umwe numumpupulele, amubafune bashinkondo nokwenu alimwi mubachitile bubotu babo bamuswile. ²⁸ Amubalonjezhe babo bamushinganya alimwi mubakombele babo bamupenzha. ²⁹ Wezo wakuuma kwitama lyomwi, umupe ulimwi itama. Kuti umwi wakubwezela chikobelo chako, utamukashi uchimwi chisani chako. ³⁰ Upe woonse wezo ukulomba. Kuti umwi wakubwezela chintu chako, utabi numwambila ati akuzholele. ³¹ Mbumuzanda bantu bamwi ati bamuchitile, amwe amubachitile mbubona. ³² Kuti mulifwini bulyo bantu babo amwe bamufwini, mbulumbu nzhi mbumukapewa? Ukuti abo bashishibi balazanda babo babafwini. ³³ Kuti mulachitila buyo bubotu babo amwe bamuchitila bubotu, mbulumbu nzhi mbumukapewa? ukuti abo bashishibi mbubachita. ³⁴ Kuti mulakweletesha buyo babo mbumulangila ati balakonzha kuzhola, mbulumbu nzhi mbumukapewa? Abo bashishibi balakweletesha bashishibi kwamba bazholelwe mbubona. ³⁵ Pele amubafune bashinkodo nokwenu alimwi mubachitile bubotu. Amukweleteshe, kutalangila kuzholelwa, ubulumbu bwenu bulakaba bukando, alimwi mulakaba banakwe Mwami Leza, nkaambo walo ngushi luse ukuli babo batalumba alimwi bantu bashishibi. ³⁶ Amube bashiluse, mbubona ushenu mbwaali shiluse. ³⁷ Mutabeteki, amwe tamukabetekwi. Mutapi chisubulo, amwe tamukapewa chisubulo. Amulekelele, amwe mulakalekelelwa. ³⁸ Amupe, amwe mulakapewa. Mweelwe mubotu - mushindaile, muzungaanye alimwi ukupaana ulakapewa kwako. Ukuti chipimyo nchusebezha, inchicho uchikasebezhewa kwako.'' ³⁹ Ulimwi wakabambila kaano. "Sa kuli moofwu ukonzha kusololela moofwu nina? Kuti nkwaali ati boonse balawila mwilindi, natabakawila? ⁴⁰ Shichiiya tamubaali mwiiyi, pele kuti wamana kuyishiwa ulakozhanya u mwiiyi wakwe. ⁴¹ Nkaambo nzhi nchulangila kasanga kali mu linso lya munyoko, pele ulaluba isamu lili mu linso lyako? ⁴² Mbubuti mbukonzha kumwambila munyoko ati, 'Mukwesu leka nkakushe kasanga kali mu linso lyako,' pele uwe tukonzha kubona isamu ulili mu linso lyako? Umwe nubashikopoopa amenso! Tanguna ukushe isamu mu linso lyako, indilyo nukakonzha kubona kabotu kwaamba ukushe kasanga kali mu linso lya munyoko. ⁴³ Ukuti kwiina isamu ibotu likonzha kweezha michelo ibolele, niliba isamu ibzhi likonzha kweezha michelo mibotu. ⁴⁴ Ukuti isamu lyoonse lilazhibwa ku michelo ngulizhala. Ukuti bantu tabachela inkuzu ku mutube tube, nikuba ku chela masaansa ku tusamu tuayanwa musokwe. ⁴⁵ Muntu mubotu kuvwa ku mizeezo mibotu ya mumozo wakwe ulachita shintu shibotu, aze shishibi kuvwa ku mizeezo ya chibi mu mozo wakwe ulachita shibiyabi. Ukuti kuvwa kushintu shili mu mozo wakwe mulomo ulaamba. ⁴⁶ "Nkaambo nzhi mulenta ati, 'Mwami, Mwami, akuli tamutobela nshimwaambila? ⁴⁷ Kufumbwa muntu ushika kwangu ukutelela mazwi angu amana waatobela, Ndamwambila mbwabele. ⁴⁸ Ulikozhenye u muntu uzaka in'ganda, wakasaha mwiimbi mulamfu amana wezaka in'ganda yakwe ebwe izumu. Meenzhi nakashika, akunchila ku bwaanda bwa n'ganda pele katakonzha kwiizungaanya nkaambo yakazakwa kabotu. ⁴⁹ Pele wezo muntu utelela mazwi angu amana taatobela, ulikozhenye u mulombwana umwi wakazaka in'ganda ezeulu kwiina ukusha mwiimbi. Chiindi meenzhi nakakunkila ku bwaanda, in'ganda ndilyona yakawa, alimwi kuwa kwanjiyo kwakaba kumaninina."