¹ Inzho chakachitika bantu banji banji bakakubungene balimuzhingulukile Jeso kutelela izwi lya Leza, kazhimine ku mabali a mulonga wa Genesaleti. ² wakabona mato obile alishoshelwe amuuma. bazezhi bakumuvwile kabasanzha tunyandi twabo. ³ Jeso wakanjila mu bwato bumwi, bwakuli bwa Saimoni, amane wakamwambila ati abutonkele ashoonto mu Lwatele. Ngoona wakakala ukutalika kubayiisha bantu uishite mu bwato. ⁴ Nakamana kwaamba , wakamwambila Saimoni ati, "Amushikule bwato mubutole mu lwatele mwamana muteye tunyandi twenu muzele." ⁵ Saimoni wakaingula ulaamba, "Mwami, twazela mashikuoonse kwiina nchitwayana, pele kuvwa ku mazwi ako, ndateya tunyandi.'' ⁶ Nibakachita bobo, bakayaya inswi shinji shinji, tunyandi twabo takatalika kuzapuka. ⁷ Inzho bakobola benzhinokwabo bakuli mu bwato bunji kwaamba beze babayovwe. Bakeza bazuzha mato oonse, chakuti akatalika kuzanda kwibila. ⁸ Pele Saimoni Pita, nakabona, wakawila kunshi ku matende aJeso ulaamba, "Tantumuka kwangu ukuti ndi muntu shishibi, Mwami.'' ⁹ Ukuti walo ubabo boonse mbuchakuli abo, bakazhingwa kubuyaye bwa nswi mbubakayaya. ¹⁰ Jemusi u Johani, banakwe Zebedayo abo kabali aze Saimoni. Jeso wakamwambila Saimoni ati, Utatiyi, nkaambo kuvwa ninzho ulaba muzezhi wa bantu.'' ¹¹ Nibakashosha mato abo bakashiya shoonse bamutobela. ¹² Chakachitika kwaamba nakuchii mu munzhi umwi, umwi mulombwana wakusatile chinsenda kaliwo. Nakamubona Jeso, wakavuntama u bushu bwakwe amane wamulomba ulaamba ati, "Mwami, wakuzanda, ulakonzha kunsalazha.'' ¹³ Ngoona Jeso wakatandabika itashi lyakwe wamukwata, ulaamba, ndili bambile. Salala.'' Ndilyona chinsenda chakamana. ¹⁴ Wakamulailila ati atabi nanshimwina kufumbwa muntu, pele wakamwambila buyo ati, "Koya wamana ukalibonye ku bapaizhi ukutuula chipo chakusalazhiwa kwako, kwingaina u Mozesi mbwakalailila, kwaamba bukabe bumboni kwabo.'' ¹⁵ Pele impuwo yakwe yakamwaala uku masena malaale, ubobo bantu banji bakwiza kwakwe kwaamba bapupulale akuyiisha ukwaamba abaponye ku malwazhi. ¹⁶ Pele shiindi shinji kaya kwa bwiiche kukukomba. ¹⁷ Chakachitika buzuba bumwi nakakuyiisha, kakuli ba falisi u bamayi ba mulawo bakushite bakavwa ku minzhi yoonse ya mu Galilaya u Judeya alimwi uku Jelusalema. Insana sha Mwami kashili aze sha kuponya. ¹⁸ Inzho balombwana bakeza balizemwine muntu a machila watakuputa, bakakapula inzhila njibakukonzha kwaamba bamunjizhe mukatikumbele lya Jeso. ¹⁹ Bakabula mbubakonzha kumunjizha nkaambo kakuvula kwa bantu, inzho bakaliza a lululi lwa n'ganda bamwisha ezeulu, kumwi ulilele amachila akwe, kuya akati lya bantu, kumbele lya Jeso. ²⁰ Mukubona lushomo lwabo, Jeso wakaamba, "Mulombwana, shibi shako shalekelelwa.'' ²¹ Balembi u baFalisi bakatalika kwabuzha aza, balaamba, "Nguni wezu waamba matushi? Nguni ukonzha kukwatila shibi chita buyo Leza?'' ²² Pele Jeso mukuzhiba nshibakutweluka, wakabaingula ulaamba, "Nkambo nzhi mulalibuzha chechi mu myozo yenu? ²³ Nchichiliye chuuba kwaamba, 'Shibi shako shalekelelwa' na kwaamba ati Zhimuka ukuya'? ²⁴ Pele kwaamba muzhibe ati Mwana a Muntu ulikwete insana ano anshi kulekelela shibi,'' - wakambila mulwazhi ati, - "Ndakwambila uwe, zhimuka bweza machila koya ku n'ganda yako.'' ²⁵ Ndilyona wakabuka wabweza isasa ngakulele. Amane wakaya ku munzhi wakwe, ulaya butembaula Leza. ²⁶ Boonse bakazhingwa ngoona bakamulemeka Leza. Bakazula bukandu, balaamba "Twabona shintu shibaala bwasunu." ²⁷ Nishakamana kuchitika shintu sheshi, Jeso wakakuvwa koko waya ngoona wakabona shimutelo wakutewa Levi ulishite mu n'ganda ya shimutelo. Wakamwaambila ati, "Nchilila." ²⁸ Ubobo Levi wakazhimuka wamuchilila, washiiya shoonse. ²⁹ Amane Levi wakabamba ipobwe ikando mun'ganda yakwe kubambila Jeso. Kakuli bashimitelo banji banji bakushite kwi tebulu ubantu bamwi bakulya antoomwi abo. ³⁰ Pele ba Falisi ubalembi babo bakakutongaukila ku bashichiiya bakwe, balaamba, "Nkambo nzhi nchimulila antoomwi u bashimutelo u bashishibi?'' ³¹ Jeso wakabaingula ati, "Bantu balitelele kabotu tabazandika mushilishi; chita bulyo babo balwazhi. ³² Ndiina kwizhila baluleme, pele ndakezhila bashishibi kwaamba basanduke.'' ³³ Bakamwambila ati, "Bashichiiya ba Johani shiindi shinji balaliimya uku komba, alimwi u bashichiiya baba Falisi abo balachita chikozhenye. Pele bashichiiya bako balalya ukunwa.'' ³⁴ Jeso wakabaambila ati, "Sa kuli ukonzha kwaamba balya beenda u shibwinga batalyipele kali shibwinga bali aze? ³⁵ Pele chiindi chilakashika lelyo shibwinga nakakatolwa kuvwa kwabo, mumazuba azo balakaliimya. ³⁶ Amane Jeso wakabaambila kaano ati, "kwiina ukonzha kuzapula chisani kuvwa ku chisani chipiya kwaamba abike chigamba a chisani cha kale kale. Kuti wachita bobo, ulazapula chisani chipiya, alimwi kasani kavwa ku chisani chipiya takakonzha kwendelana u chisani cha kale kale. ³⁷ Kwiina ubika waini mupiya mwisalu lya kale kale lya kuzobwela waini, Waini mupiya ulayandula intesho umwini waini ulatika. ³⁸ Waini mupiya ulyelele kubikwa muntesho impiya. ³⁹ Kwiina ukonzha kuchita ati wanwa waini wakale amane wazanda mupiya, ukuti ulakonzha kwaamba wakale mubotu kubaala.'''