¹ Inzho Jeso, wakazula Moza Usalala, wakavwa ku lweenje lwa Joodani wakasololelwa u Moza Usalala kuya mulukula. ² Molya mwakasunkwa u satani kwa mazuba ali makumi one. Chiindi checho kwiina nchakakulya, ubobo wakafwa inzala. ³ Satani wakamwambila ati, "kuti uli mwanakwe Leza, ambila mabwe kwaamba abe Chinkwa." ⁴ Jeso wakamwingula ati, "kulilembelwe ati, 'Muntu taponi ku chinkwa buyo.'' ⁵ Ngoona Satani wakamutola Jeso ezeulu ukumutondezha bwami bwa anshi mu chiindi chishoonto. ⁶ Inzho satani wakamwambila Jeso ati, "Ndakupa bwendelezhi u bulemu boonse bwa shintu sheshi, ukuti shakapewa kwangu alimwi ndakonzha kupa kufumbwa ngwinzanda. ⁷ Inzho kuti buyo wankotamina ukunkomba, shilaba shako.'' ⁸ Pele Jeso wakamwingula ati, "Kulilembelwe ati, 'Komba mwami Leza wako, alimwi umanine nguwe milimo."' ⁹ Ngoona satani wakamutola ku Jelusalema amane wamulizika ezeulu a chiluli cha chikombelo, wamwambila ati, "Kuti uwe uli Mwanakwe Leza, sotoka uli waale anshikuvwa ano. ¹⁰ Ukuti kulilembelwe ati, 'Walo ulatuma bangelo kwako, bakukwabilile,' ¹¹ alimwi, balakuzemuna mu matashi abo, Kwaamba utabi nukonzha kuuma itende lyako kwibwe.''' ¹² Kumwiingula, Jeso wakamwambila ati, "Kulaambwa ati, utabi nusunka Mwami Leza wako.''' ¹³ Shaatani nakamana ku musunka Jeso wakaya wamushiya kushikila chiindi chimwi. ¹⁴ Amane Jeso wakabweela ku Galilaya munsana sha Moza Usalala, kumane impuwo yakwe yakazandaala mu masena oonse. ¹⁵ Kuvwa awo wakatalika kuyiisha mu ma sinagogu alimwi boonse bakamulumbaizha. ¹⁶ wakanjila mu Nazaleta, mwalo mwakakomenena, alimwi kwendelanya u kanshiya nshiya, wakanjila mu sinagogu mu chibelu wakaakuzhima ulabala chakupozomoka. ¹⁷ Ibuka lya mushinshimi Isaya lyakapewa kwakwe. wakalivununa ibuka ngoona wayana ibuka ngulilembelwe, ¹⁸ "Moza wa Mwami uli ali ume, nkaambo wakansala kwaamba n'gambilizhe mulumbe mubotu ku bapushi. Wantuma kukambauka lwanguluko ku baange alimwi kubonya boofwu. kwangulula bao bapenzhiwa, ¹⁹ kukambauka mwaka wa kusalwa kwa Leza.'' ²⁰ Ngoona wakalivungaila ipepa, wamupa musebezhi, amane wakala anshi. Menso ababo boonse bakuli mu sinagogu kali ali nguwe. ²¹ Wakatalika kubaambila ati, "Bwasunu malembe aza azuzukizhiwa kubu pupulazhi bwenu." ²² Boonse bakuli mo bakamulumbaizha alimwi bakazhingwa mazwi mabotu akakuvwa ku mulomo wakwe, bakabuzhanya ati, "Wezu sa ingwe mwanakwe Josefa?'' ²³ Wakabaambila ati, "Chini chini mula kakaamba kashimpi kaka kwangu ati, 'Mushilishi, lishilike umwini. Kufumbwa ncitwakatelela uwe nchiwakachita mu Kapenaumu, chichite mono mumunzhi wakwenu.''' ²⁴ Pele wakaamba, ''Mubwini ndamushimwina ati, kwiina mushinshimi utambulwa mu munzhi wa kwabo. ²⁵ Pele mubwini ndamushimwina ati kabaliko bamuka bafu mu Izilayeli mu chiindi cha Elija, chiindi izeulunilyakayalwa kwa myaka yotatwe u myezhi ili chisambomwe ubobo mwakaba inzala mu chishi choonse. ²⁶ Pele Elija wiina nakatumwa kuli babo, chita buyo ku Zalefati mu Sidoni, ku muka mufwu wakukala nkuko. ²⁷ Bashichinsenda kabali banji banji mu Izilayeli mu chiindi cha Elisha mushinshimi, pele kwiina unji wakasalazhiwa kunze kwa Namani waku Siliya,'' ²⁸ Boonse bantu bakuli mu sinagogu bakazula bukali nibakatelela shintu sheshi. ²⁹ Bakazhimuka bamukwisha mu munzhi, bamutola kumuselumuko wa mulundu munzhi wabo nkuwakuzakilwe kwaamba bakamuwaale kuvwa a mulundu. ³⁰ Pele wakaita akati lyabo ngoona waya kubusena bumwi. ³¹ Ngoona wakaya ku Kapenaumu, munzhi mukando mu Galilaya amane wakatalika kubayiisha mu buzuba bwa Sabata. ³² Bakazhingwa kubuyiishe bwakwe nkaambo wakaamba chakubula bukandu. ³³ Inzho mu sinagogu kamuli mulombwana umwi wakunjililwe moza mubiyabi, wakapozomoka ati, ³⁴ "Ah! Anu tukuchite buti uwe, Jeso waku Nazaleta? sa washika kutuyaya uswe? Ume ndikwizhi mbubele - Usalala wa Leza!'' ³⁵ Jeso wakolemanina moza mubiyabi, ulaamba, "Liinze! Muvwe muli nguwe!'' Chiindi moza mubiyabi niwakamuwisha anshi akati lyabo wakamuvwa mwakwe, alimwi wiina uniwakamuchisa. ³⁶ Boonse bantu bakazhingwa ngoona bakatalika kwambilana. Bakaamba, "Mazwi ali buti aza? Ulambila myoza mibiyabi chakubula bukandu alimwi umunsana ayo moza ilavwa." ³⁷ Ubobo impuwo yakwe yakatalika kumwaala u masena oonse akuzhingulukile. ³⁸ Ngoona Jeso wakamuvwa mu sinagogu waya kunjila mun'ganda ya Saimoni. Inzho bainazhala ba Saimoni kabasatile mubili, Bakatalika kumukombelezha kwaamba amuponye. ³⁹ Ubobo wakazhima nkwakulele amane wabulemanina bulwazhi, ngoona bulwazhi bwavwa. Ndilyona wakabuka watalika kubasengela. ⁴⁰ Izuba nilyakwibila , bantu bakaleta boonse bakukwete malwazhi aishenye ishenye kwa Jeso. Wakabaampa matashi akwe boonse ukubaponya. ⁴¹ Myoza mibiyabi ayo yakavwa mu bantu, kukwiila ilaamba, "Uwe uli Mwanakwe Leza! Jeso wakalemanina myoza mibiyabi alimwi katavumizha kwaamba, nkaambo kabezhi ati ngu Kilisito. ⁴² Nibwakacha, wakaya kubusena bwa bwiiche. Makamu makamu a bantu akatalika kumukapula ngoona bakashika kubusena mbwakubele. bakasoleka kwaamba atabi nabashiya. ⁴³ Pele wakabambila ati, "Ndyelele kuya kukambauka mulumbe wa bwami bwa leza ku masena amwi, nkaambo nchichechi nchindakatuminwa kono.'' ⁴⁴ Amane wakatolelela kukambauka mu ma sinagogu muchishi choonse cha Judeya.