¹ uninzho kusekelela kwa chinkwa chiina bumena nikwakashika afwafwi, uchitewa ati Pasika . ² Bapaizhi bakando kabalanga inzhila yakumuyaila Jeso, kabatiya bantu. ³ Satani wakamunjila Judasi wakutewa Isikaliyoti uwakuli wababo bali ikumi ubobile. ⁴ Judasi wakaya kubapaizhi bakando uku bakando babashilikani kubandika mbwakukonzha kumwaba Jeso kwabo. ⁵ Bakabotelwa bamane bakatelezhanya kwamba balamupa mali. ⁶ Wakavumina ukulanga chiindi chakwamba akonzhe kumwaba nkubateko bantu banji banji. ⁷ Inzho bwakashika buzuba bwakusekelela chinkwa china bumena, mubuzuba imbelele ya chipo cha ipobwe lyakwitilila nichipewa. ⁸ Jeso wakatuma Pita u Johani, kwaamba "Kamuya mukabambe kwakulila Pasika, kwaamba ambweni tulalya.'' ⁹ Bakaamba kwakwe ''Nkukwi nkuzanda tukabambe?'' ¹⁰ Wakabaingula ati, ''Amulange mwakanjila mu munzhi mukando, mulakayana mulombwana uti akakukwete intesho yamenzhi ulamuswanganya. Mukamuchilile kunganda yakwe. ¹¹ Mwamana mukamwambile mukamwini in'ganda, Mwiiyi wamba njilikwi inganda yabeenzu njitukalila Pasika ubashichiiya bangu?''' ¹² Ulakamutondezha inganda yamwizeulu imabe kale ushuuna. mukabambe mumo.'' ¹³ Ubobo bakaya, bayana mbubona mbwakabalailila.Bamane bakabamba chakulya cha Pasika. ¹⁴ Chiindi nichakashika, wakakala u batumwa. ¹⁵ Amane wakabambila, ''Ndakuzandisha kwaamba ndye amwe Pasika wezu nkintana kupenga. ¹⁶ Mbubona mbwinzanda kumwambila, Nshikalyi linji chita chikazuzukizhiwe mu bwami bwa Leza.'' ¹⁷ Amane Jeso wakabweza inkapu, wapa kulumba, wakaamba, Amubweze chechi, mwabane ndubeni. ¹⁸ Ukuti ndaamba, shikanwi linji muchelo wa musansa chita bwami bwa Leza bukashike.'' ¹⁹ Wakabweza chinkwa, amane kulumba wachikomona, amane wabapa, ulaamba, ''Wezu ngu mubili wangu, upewa kwenu. Kamuchita bobo mukunzhibaluka.'' ²⁰ Wakabweza inkapu mbubona umane mulalilo, waamba, ''Yezhi inkapu nchipangano chipya mubulowa bwangu, bwatilwa kwenu. ²¹ Pele amutelelshe, itashi lya muntu ungaba lili ame etebulu. ²² Umbona mwana amuntu ulaya mbubona mbuchabambwa. Pele mawe ku mulombwana ukasebezhewa kumwaaba!" ²³ Bakatalika kubandika beni ubeni ukonzha kuchita chechi. ²⁴ Kumane kwaba kunyongana kwabashichiiya nibakulwila ukaba nukando akati kabo. ²⁵ Wakabambila ati, ''Bami ba bantu bakunze mbami ali mbabo alimwi babo bakwete insana akati kabo baletiwa ati mbashikuchita shibotu. ²⁶ Pele tachelele kuba bobo amwe. Ubuyo wezo uzanda kuba umusololela ngumubele ulyelele kuba ukoya ngu mushonto, Wezo uzanda kuba mulemu ngumubele ulyelelekuba ngumuzhike usebezela benzhina. ²⁷ Nguni ubaala, ukala atebulu, na wezo usebezela benzhiina? Taliwezo ukala etebulu? Pele ume ndili akati kababo basebezela bamwi. ²⁸ Pele ndimwe muli ame mu masunko. ²⁹ Ndamubika ezeulu abwami, umbona Taata mbwambika ezeulu abwami ³⁰ kwamba mukalye ukunwa etebulu mubwami bwangu, alimwi mulakaba achuna cha bubeteshi amikowa ili ikumi ubobile ya bana ba Izilaeli. ³¹ ''Saimoni, Saimoni, chenjela, Satani ulakuzanda, kwaamba akulukute ukoya ikunka. ³² Pele ndakukombela, kwamba lushomo lutakakilwa. Wamana kukwata, zumya, benzhinoko." ³³ Pita wakamba kwakwe, "Mwami, Nndilibambile kuya aze kuntolongo na ku lufu.'' ³⁴ Jeso wakaingula, ''Ndakushimwina, Pita, mukombwe talila mubuzuba bono, chita unkake shiindi shotatwe ati twinzhi.'' ³⁵ Pele Jeso wakabambila, ''Nindakamutuma kwiina kapotomona ka mali na koola kakwete shizandika,na makatulo, mulikwete nshimwakabulo sa?'' Bakaingula, ''Kwiina.'' ³⁶ Pele inzho ukwete impotomona ya mali, naibweze, na ukwete koola kakwete shizandika. Wezo wiina icheba nauzhe chikobelo ukuula icheba. ³⁷ Mbwin'gamba kwenu, chilembelwe kwangu chilyelele kuzuzukizhiwa, 'Wakabalilwa a mweelwe wabashishibi, ' Ukuti shoonse shakambwa ati shilachitika kwangu shanka kuzuzukizhiwa.'' ³⁸ Bamane bakamba, ''Mwami, langa! Ngaaza macheba obile.'' Wakabambila, ''Chamana.'' ³⁹ Jeso wakaya, mbubona mbwakuchita lyoonse ku mulundu wa olive, ubashichiiya bakachilila. ⁴⁰ Nibakashika wakabambila, ''Amukombe kwamba mutanjili mumasunko.'' ⁴¹ Wakaya busena bukwana kufusa ibwe, wakakala anshi ukupaila, ⁴² kwamba, ''Taata naulazanda, itole inkapu yezhi kuvwa kwangu.Nikuba bobo kutabi kuzanda kwangu, kube kuzanda kwako.'' ⁴³ Amane angelo kuvwa kwizeulu wakalibonya kwakwe, kumuzumya zumya. ⁴⁴ Mukupengana, wakomba chansana, ibe lyakwe lyakaboneka ukoya bulowa bunji bunji bulawa anshi. ⁴⁵ nakazhimuka wavwa kupaila wakashika nkwakabashiya bashichiiya bakwe wakayana baloona nkambo kakupenga ⁴⁶ amane wakababuzha, ''Nchinzhi nchimoona? Amubuke mupaile, kwamba mutenjili mu masunko.'' ⁴⁷ Nakuchaamba, amubone, inkamu yaashika, u Judasi, umwi wababo bali ikumi ubobile ulibasolwezhe, amane wakaya kwa Jeso ukumushonta, ⁴⁸ pele Jeso wakamba kwakwe ati, ''Judasi, waaba Mwana a Muntu kwitila muku mushonta?'' ⁴⁹ Babo bakakuli u Jeso nibakabona chakachitika, bakaamba, ''Mwami sa tulwe umacheba?'' ⁵⁰ Umwi wabo wakamukosola muzhike wa mupaizhi mukando, itwi lya ku chilyo. ⁵¹ Jeso wakamba, "Mbubo!" wakalikwata itwi lyakwe, ngona wamuponya. ⁵² Jeso wakamba kuli bapaizhi bakando, bashilikani ba chikombelo, uku basololi bakumukaka ati, "Muleza ukoya mulazanda kukwata muteu, mulikwete macheba u misako? ⁵³ Ndakakuli amwe mazuba oonse muchikombelo, mwiina nimwankwata matashi ume. Pele cheno nchindi chenu, alimwi iinsana shamusinze.'' ⁵⁴ Bamukwate, bakamusolozha kumutola kun'ganda ya mupaizhi mukando. Pele Pita wakachilila u lwaalale. ⁵⁵ Nibakakunka mulilo mulubanza lwa mabetekelo bakakala antoomwi, Pita aze wakaya kukala akati kabo. ⁵⁶ Umwi mukaintu muzhike wakamubona mu mu muni wa mulilo amane wamulangilila kusumika menso akwe ukwaamba, ''Wezu mulombwana kali aze.'' ⁵⁷ Pele Pita wakamutama, kwaamba, ''Mukaintu, Ume nshimwizhi wezu muntu.'' ⁵⁸ Nikwaita kaindi kashonto, umwi wakamubona ulamba, ''Uwe aze wakuli wababo.'' Pele Pita wakamba, ''Mulombwana, Indime.'' ⁵⁹ Nikwakaita iwoola lyomwi mulombwana umwi wakatatanana ukwamba ati, ''Chini chini wezu mulombwana kali aze, nkaambo ngwaku Galileya.'' ⁶⁰ Pele Pita wakamba, ''Mulombwana, nshichizhi nchuwamba, "Ndilyona, nakakwamba, mukombwe wakalila. ⁶¹ Kuchinduluka, Mwami wakamulanga Pita, amane Pita aze wazhibaluka mazwi ngakamwambila Mwami, nakamwambila ati, ''Mukombwe katana kulila bwasunu ulantama shiindi shotatwe.'' ⁶² Pita wakaya ansengwe amane wakalila chakulyetaika. ⁶³ Balombwana bakumulindilila Jeso bakamusalizha uku muuma. ⁶⁴ Bakamuhumba chisani ku menso, ukumubuzha ati, ''Shinshima! nguni wakuma? ⁶⁵ Bakaamba shintu shinji shinji shibiyabi kwa Jeso ukumusampaula. ⁶⁶ Mbubwachela buyo, basololi bakabungana antoomwi, bapaizhi bakando u balembi. Bakamutola kunkuta amane ⁶⁷ bakamba, ''Na nduwe Kilisito, twambile.'' Pele wakabambila ati, "Kuti mwambile, tamuti mushome, ⁶⁸ alimwi kuti mubuzhe, tamuti mwingule. ⁶⁹ Pele kuvwa ninzho, Mwana a muntu ulakakushite kwitashi lya chilyo lya nsana sha Leza.'' ⁷⁰ Boonse bakaamba, ''Nkukwaamba uli Mwanakwe Leza?'' Jeso wakabambila, ''Inta mwaamba ndime.'' ⁷¹ Bakaamba, Sa nchituzandila bukamboni chinzhi? Uswe tubeni twamutelela kuvwa ku mulomo wakwe.''