¹ Nibwaashika bumwi buzuba mbuli Jeso mbwakuyiisha bantu muchikombelo uku kambauka mulumbe muchikombelo lelyo bapaizhi bakando u balembi bakeza kwakwe u basololi. ² Bakaamba kwakwe ati, "Tushimwine insana shikupa kuchita shintu sheshi, naaba nguni ukupa kuchita sheshi shintu.'' ³ Wakaingula ukwaamba kuli mbabo ati, "Ame ndamubuzha mubuzho, amunshimwine. ⁴ Lupapatizo lwa Johani: Sa lwakavwa kwizeulu na ku bantu?'' ⁵ Bakatelaika lwabo beni, baamba, kuti twaambe ati, 'lwakavwa kwizeulu,' ulaamba, inzho nchinzhi nchimwatakashomena?' ⁶ Pele na twaambe, 'lwakavwa ku bantu,' boonse bantu balatuyasa mabwe, ukuti bakazhiba ati Johani kali mushinshimi.'' ⁷ Bakaingula ati tabezhi nkulwakavwila. ⁸ Jeso wakaamba kwabo, "Nikuba bobo nshimushimwini insana shimpa kuchita shintu sheshi.'' ⁹ Wakabambila bantu kaano, "Mulombwana umwi wakashanga muunda wamasaansa amane wakweletesha ku balimi ba masaansa ukuya ku busena bunji kwa chiindi chilamfu. ¹⁰ A chiindi chelele wakatuma musebezhi ku balimi ba masaansa kwaamba bamupe michelo ivwa mu muunda wa masaansa. Pele balimi ba masaansa bakamuuma, ukumutanda kakwina nchakakukwete mu matashi. ¹¹ Wakatuma umwi musebezhi aze bakamuuma uku musampaula, kumutanda ukwiina nchakwete mu matashi. ¹² Wakatuma watatu aze bakamuuma ukumusowela ansengwe. ¹³ Mukamwini muunda wakalibuzha ati, 'Ndachita buti? Ndatuma mwanangu ngwimfwini. Ambweni walo balamupa bulemu.' ¹⁴ "Pele balimiba masaansa nibakamubona, bakabandishanya beni u beni, balaamba, 'Wezu ngu mulya izhina. Atumuyaye kwaamba lukon lukabe lwesu. ¹⁵ Bakamusowela kunze kwa muunda ukumuyaya. Inzho mwami wa muunda ulabachita buti? ¹⁶ Uleza kuyaya balimi ba masaansa, muunda uloopa bamwi.'' Nibakatelela, bakaamba ati, "Chitakabi bobo!'' ¹⁷ Pele Jeso wakabalangilila waamba, "Chilapandulula nzhi checho chilembelwe: 'Ibwe muzashi ndyakakaka indilyo lyaba ibwe lya mu kona'? ¹⁸ Kufumbwa wezo uwila ebwe lelyo ulakonauka mutufwefwelenga, alimwi wezo nguliwila ulalichisa.'' ¹⁹ Inzho balembi u bapaizhi bakando bakakapula inzhila yaku mukwata a chiindi checho nchichona nkaambo bakazhiba ati waamba kaano ka kubakumbilizha. Pele bakatiya bantu. ²⁰ Bakamulangishisha, bakatuma bamwembela bakulichengesha kuba basalali, kwaamba bamuyanine kaambo mu myaambo yakwe, kwaamba bamutole ku basololi bali insana. ²¹ Bakamubuzha balaamba ati, "Mwiiyi, tulizhi kwaamba uwe ulaamba alimwi ulayiisha shiluleme, alimwi wiina ngusalulula, pele ulayiisha lushinizho munzhila Leza. ²² Sa chililuleme uswe kwaamba tukupa mutelo kwa Kayisala, na pe?'' ²³ Pele Jeso wakabuzhiba bumpelenge bwabo, alimwi wakabaambila ati, ²⁴ ''Amuntondezhe ili lyomwi. Chinkozha izhina lyaani shiliwo awo?''Bakaamba nsha Kayisala.'' ²⁵ Wakabaambila ati, "Amupe kwa Kayisala shintu sha Kayisala, mwamana muppe kwa Leza shintu sha Leza.'' ²⁶ Baina nibakonzha kumuyanina chibiyabi kuli nchakaamba kumbele lya bantu, pele mukuzhingwa ku bwinguzhi bwakwe, bakaliinza. ²⁷ Ba Saduki nibakashika kwakwe, balo baamba ati kwiina bubuke bwa bafwu, ²⁸ bakamubuzha, balaamba, "Mwiiyi, Mozesi wakatulembela kwaamba, kuti munina mulombwana wafwa, washiya mukaintu amana wiina kukazhala aze bana, mulombwana ulyelele kumutwala muka munina kwaamba amuzhalile bana munina. ²⁹ Kakuli balombwana ba bunina bali chiloba ngoona mutanzhi wakatwala mukaintu, amane wafwa ukwiina kuzhala mwana, ³⁰ u wabili mbubona. ³¹ Uwatatu wamukona mukaintu, mbubona uwa chiloba wiina nakazhala bana kushikila wafwa. ³² Kumane aze mukaintu wakafwa. ³³ Ku bubuke bwa bafwu, wezu mukaintu ulakatwalwa kwani? Nkaambo bali chiloba boonse kabamutwele.'' ³⁴ Jeso wakabaambila ati, "Bana ba musela weno balatwala alimwi balatwalwa. ³⁵ Pele babo bati bakelelwe kutambula kubushiwa kuvwa ku bafwu baina nibati bakatwalwe nikuba kutwala. ³⁶ Nikuba kuya kufwa ulinji, ukuti balakaba ukoya bangelo alimwi mbanakwe Leza, balo babushiwa ku bafwu. ³⁷ Pele kwaamba bafwu balabushiwa, aze Mozesi wakatondezha, kubusena bwakuzaka chisoko, nkwa mwiita Mwami Leza wa Abulahamu alimwi Leza wa Isaki u Jakobo. ³⁸ Inzho tali Leza wa bafwu, pele ngu leza wa bomi, nkaambo ukwakwe boonse balapona.'' ³⁹ Balembi bamwi bakaingula ati, "Mwiiyi waingula kabotu.'' ⁴⁰ Ukuti tabatazanda linji kumubuzha mibuzho. ⁴¹ Jeso wakaamba kwabo ati, "Mbubuti mbubakonzha kwaamba ati Kilisito mwanakwe Davida? ⁴² Nkaambo Davida lwakwe ulaamba mwibuka lya Ntembauzho ati, Mwami wakaamba ku Mwami wangu, 'Kala kwitashi lyangu lya chilyo, ⁴³ kushikila bashinkondonoko mbabike kunshi ku matendw aako.' ⁴⁴ Davida ubobo ulmwita Kilisito ati 'Mwami' inzho mbubuti mbwakonzha kuba mwanakwe Davida?'' ⁴⁵ Kabatelele bantu boonse wakambila bashichiiya bakwe ati, ⁴⁶ "Amuchenjele ku balembi balo bazandisha kusama shikobelo shilamfu alimwi balazanda kwanzhiwa cha bulemu mu mishika ukuzanda kukala mushuna shibotu mu ma sinagogu alimwi ukuala mu masena malemu chiindi cha mapobwe. ⁴⁷ Alimwi balananga imbono shabo ba muka bafwu, mukuzanda kwaamba babonwe balakomba mipailo milamfu. Balombwana bali bobo balakatambula chisubulo chikando.''