¹ Inzho mu mazuba az, chakazhiza bolya ati Agasitasi Kaisala wakabika mulawo wakwaamba kubalwe boonse bantu bakala mu luundu loonse. ² Koku kakuli kubalwa kutaanzhi kwakachitika Kwiliniyasi nakuli mwendelezhi waku Siliya. ³ Boonse bakaya kulembwa ukubalwa muchishi chakwabo. ⁴ Josefa aze wakavwa ku Galileya wavwa ku munzhi wa Nazaleta, u Judiya, umunzhi wa Devidi, utewa ati Betelehemu, nkaambo kali wamun'ganda alimwi wa lunungu lwa Davida. ⁵ Wakaya kolya kwaamba akalembwe antoomwi u maliya, wakulangilwa kutwalwa kwakwe amana kemishi. ⁶ Chakachitika kwaamba nibakuchili koko, chiindi chakwe chakutumbuka chakashika. ⁷ Wakazhala mwana mulombwana mwanakwe mutaanzhi, wakamuvunga mu shisani shilamfwu amane wamooneka mu luba, nkaambo kakwiina busena bwa kwaamba bunji. ⁸ Kakuli beembezhi mu cchishi momo bakushite mu myuunda, kulindilila butanga bwabo mashiku. ⁹ Angelo wa mwami wakabonekela, alimwi bulemu bwa Leza bwakalibonya akati lyabo, inzho bakazula bukandu. ¹⁰ Amane angelo wakabaambila ati, "Mutatiyi, nkaambo ndamuletela makani mabotu akaaleta kubotelwa ku bantu boonse. ¹¹ Ubwasunu muchishi mwazhalwa mufutuli! Ngu Kilisito Mwami! ¹² Chechi chitondezho umwe chindamupa chakuti mulakayana mwana ulizambaililwe shisani amana uli lele muluba.'' ¹³ Uchizoosha baangelo kabali antoomwi inkamu ya bantu kuvwa kwizeulu, balatembaula Leza balaamba, ¹⁴ "Bulemu kwa Leza mwizeulu, alimwi anshi kube luumuno ku bantu boonse mbabotelwa.'' ¹⁵ Chakachitika kwaamba baangelo nibakabashiya baya kwizeulu, bembezhi bakaamba kuli umwi uumwi, Inzho katuya ku Betelehemu kwaamba tukabone chintu chechi chachitika, chalo Mwami nchatuzubulwila.'' ¹⁶ Bakaya chaku fwambaana bayana Maliya, Josefa alimwi u mwana muteke wakulele ¹⁷ Nibakamubona, bakaamba shoonse shakaambwa ku mwana wezo. ¹⁸ Boonse bakatelela makani azo, bakazhingwa ku makani ngubakaamba bembezhi. ¹⁹ Pele Maliya wakashitelaikisha shintu shoonse nshakatelela ukushitangalila mu mozo wakwe. ²⁰ Bembezhi bakabweela, bapa bulemu ukutembaula Leza kushintu nshibakatelela ukubona, mbubona mbuchakaambwa. ²¹ Kumana kwa mazuba ali lusele, nakapalulwa, wakaulikwa izhina lya Jeso, izhina ndyakapewa ku mungelo katana kumitwa mwifwu. ²² Nakamana mazuba ayelele akusalazhiwa nakaita , kwendelanya u mulawowa Mozesi, bakamutola ku chikombelo ku Jelusalema kumupa ku Mwami. ²³ Chililembelwe mu mulawo wa Mwami ati, "Woonse mwana mulombwana mutaanzhi kuzhalwa ulakatupewa ku mwami.'' ²⁴ Inzho bakatuula chipaizho kuli checho chakaambwa mu mulawo wa Mwami, chipani cha n zhiba naaba inkwilimba shobile.'' ²⁵ Amubone, kakuli mulombwana umwi mu Jelusalema wakutewa Simiyoni, wezu mulombwana kali mululami alimwi muntu ulyaabile. Kalindila kunununwa kwa bana ba izilaeli, alimwi Moza Usalala kali ali nguwe. ²⁶ Wakazubulwilwa ku Moza Usalala ati wiina nakaabona lufwu katana kumubona Kilisito wa Leza. ²⁷ Kusololelwa u Moza Usalala, Simiyoni wakeza mu chikombelo. Chiindi bazhali nibakamuleta muvwanda Jeso, kumuchitila kwingainya ukanshiya nshiya ka mulawo, ²⁸ wakamubweza mu matashi akwe ngoona walumba Leza, ulaamba, ²⁹ "Inzho muleke musebezhi wako akuya mu luumuno kwendelana u mazwi ako. ³⁰ Ukuti menso angu abona lufutuko lwako, ³¹ lwalo nduwabamba kubushu bwa bantu boonse: ³² Mumuni wa chizubuluzho ku bavwa mashi alimwi bulemu ku bantu bako Izilayeli.'' ³³ Baushi u Baina bakazhingwa ku makani akambwa apandulula nguwe. ³⁴ Simiyoni wakabalongezha ukwaamba kwa Maliya baina ati, "Bona wezu mwana ulisalilwe kuwa ukubushiwa kwa bantu banji banji mu Izilayeli alimwi uku chitondezho chitavuminwa - ³⁵ alimwi icheba lilakayasa moza wako - kwaamba matelaishi a myoozo minji minji akezhibwe.'' ³⁶ Mushinshimi mukaintu wakutewa Ana kaliko. kali mwanakwe Faniwelo waku mushobo wa asha. Kali mukando ku myaka. Wakakala u mulumi kwa myaka ili chiloba kuvwa ku bushimbi bwakwe, ³⁷ alimwi wakaba muka mufwu kwa myaka ili makumi lusele itwesha yone. Wiina nakavwa mu chikombelo pele kasebeza ukuliimya kulya ukukomba, muunza u mashiku. ³⁸ A chiindi checho wakeza kufwaafwi nkubakubele watalika kulumba mwami Leza, alimwi wakaamba makani a mwana kuli woonse wakulindilila kufutulwa kwa Jelusalema. ³⁹ Nibakamanizha kuchita nshizandika kwendelanya u mulawo wa Mwami, bakazhoka ku Galilaya, ku munzhi wabo wa Nazaleta. ⁴⁰ Mwana wakakomena ukukwata insana; kazwile busongo alimwi luse lwa Leza kaluli ali nguwe. ⁴¹ Bazhali bakwe kabaya lyoonse a mwaka ku Jelusalema kwi pobwe lya Pasika. ⁴² Nakakwanya myaka ikumi u yobile ya kuzhalwa, bakaya mbubona kwendelanya u kanshiya nshiya kwi pobwe. ⁴³ Bamane kukala kwa mazuba ali mbwabele kwi pobwe, bakatalika kubweela ku munzhi. Pele mwana Jeso wakashala mu Jelusalema chakutezhiba bazhali bakwe. ⁴⁴ Bakutelaika ati kali inkamu ya bantu bakuya bweenda abo kuya ku munzhi, inzho bakeenda musinzo wa buzuba bomwi. Ngoona bakatalika kumukapula bwelele akati kabasazhinokwabo u balongwe babo. ⁴⁵ Nibatakamubona, bakabweela ku Jelusalema ukutalika kumukapula chini chini koko. ⁴⁶ Chakachitika kwaamba kwiite mazuba otatwe bakamuyana mu chikombelo, ulishite akati ka bamayi, ulapupulala kwabo uku babuzha mibuzho. ⁴⁷ Boonse bakamutelela bakazhingwa ku luzhibo lwakwe uku bwinguzhi. ⁴⁸ Nibakamubona, bakazoowa. Baina bakamwaambila ati, "Mwanangu, nkaambo nzhi watupenzha bolya? Bona, bauso ame twakukukapula.'' ⁴⁹ Wakabaambila ati, ''Nkaambo nzhi mwaku nkapula? Sa kamutezhi ati ndyelele ku chita mulimo wa taata? ⁵⁰ Pele baina nibakwata luzhibo ku mazwi nga kaamba. ⁵¹ Amane wakaya abo ku maanda ku Nazaleta alimwi kabatelela bazhali bakwe. Baina bakazobola makni aza oonse mu mozo wabo. ⁵² Pele Jeso wakakula ku mubili uku busongo alimwi kufunwa ku bantu ukwa Leza.