¹ Banji bantu bakobweza mulimo wakulemba shintu shoonse shakachitika akati kesu, ² mbubona mbushakaletwa ukuli uswe ubabo bakali bonena u menso abo alimwi kabali babeleshi ba izwi. ³ Chakali bonya kubota kuli ume, nkaambo ndavuntauzha bwelele kuvwa ku matalikilo, kwaamba mulembele, ulemekwa Tiyofilasi, ⁴ kwaamba ukonzhe kuzhiba bubotu bwa shintu sheshi nshiwakaishiwa. ⁵ Mu mazuba a Heloda mwami waku Judeya kakuli mupaizhi umwi wakutewa Zakaliya wakuluya lwa Abija; Mwinakwe lizabeti kali wa luhubo lwa Aloni. ⁶ Boonse kabaluleme kubushu bwa Leza kweenda kutatongwa mu milawo yoonse ya Mwami Leza. ⁷ Pele kabatakwete mwana nkaambo Lizabeti katazhali, alimwi kabakwete myaka minji mubuponi bwabo ⁸ Inzho chakachitika ati Zakaliya kali kubushu bwa Leza, kachita milimo ya bupaizhi mubusena bwakwe. ⁹ Kwendelana u kanshiya nshiya kakusala mupaizhi welele kumana milimo mu chikombelo, wakasalwa kwiita muchisolo kunjila muchikombelo cha Mwami leza kuya kutenta tununkilizho. ¹⁰ Inkamu ya bantu yakukomba ansengwe chiindi tununkilizho nitwakutentwa ¹¹ Inzho mungelo wa Leza wakamubulikila wazhima kuluya lya chilyo lya chipaililolya tununkilizho. ¹² Zakaliya nakamubona, chakamupenzha, alimwi wakenjilwa bukandu. ¹³ Pele Angelo wakamwambila ati, "Utatiyi, Zakaliya, nkaambo kukomba kwako kwatelelwa. Mwinako ulakakuzhalila mwana mwembezhi. Ulakamuulika izhina lya Johani. ¹⁴ Uwe ulakatangala ukubotelwa, alimwi bantu banji balakatangala nkaambo kakuzhalwa kwakwe. ¹⁵ Ukuti ulakaba muntu mulemu kubushu bwa mwami Leza. Telele kuya kunwa waini naaba mukuku ukola, alimwi ulakazuzhiwa Moza usalalakuvwa mwifwu lya baina. ¹⁶ Bunji bwa bana baluhubo lwa Izilayeli balakazholwa ku Mwami Leza wabo. ¹⁷ Ulakaba kumbele ya bushu bwa Mwami mu moza umunsana sha Elija, kusandula myozo ya bamaushi ku bana alimwi kuli batateleli ku busongo bwa bululami - kubambila Mwami bantu balibambilile kwakwe.'' ¹⁸ Zakaliya wakaambila Angelo ati, "Mbubuti mbwinkezhiba aza? Ukuti ume ndakomena ulimwi mwinangu aze wachembaala.'' ¹⁹ Angelo wakamwingula ulaamba ati, "Ndime Gabuliyeli uzhima ngabele Leza. Ndakatumwa kukwaambila uwe, kukuletela uwe aza makani mabotu. ²⁰ Inzho! ula liinza, ulaleka kwaamba kushikila buzuba sheshi shintu nishikaa chitika. chechi chilaba bobo nkaambo wiina niwaashoma mazwi angu, alo akaazuzukizhiwa a chiindi chelele.'' ²¹ Inzho bantu kabamulindila Zakaliya. Bakazhingwa kuyana ati wakatola chiindi mu chikombelo. ²² Pele nakavwa, katalozha kwaamba kwabo. Bakazhiba ati kuli nchabona chiindi nakuli mu chikombelo. wakakubatondezha buyo pele kataamba. ²³ Nakamana mazuba abulizhi bwakwe muchikombelo, wakaya ku n'ganda yakwe. ²⁴ Nakaita mazuba aza, Mwinakwe Lizabeti amane kwa myezhi ili yosanwe wakakuli sesekele. Mukaintu wakaamba, ²⁵ "Nchichechi Mwami nchaanchitila nakanangilila wamfwila luse kwaamba akushe buusu bwangu ku bantu.'' ²⁶ Mu mwezhi wa chisambomwe, angelo Gabuliyeli wakatumwa kuvwa kwa Leza kuya mu chishi cha Galilaya mu munzhi wa Nazaleta, ²⁷ kwa nakalindu wakutangilwe ku mulombwana wezhina lya Josefa, wakuli wamukowa wa Davida, izhina lyakwe nakalindu kali Maliya. ²⁸ Wakashika kwakwe waamba, "Ndakwaanzha , uwe ulisalilwe! Mwami uli aze.'' ²⁹ Pele walo wakanyongana ku mazwi azo ukutalika kulibuzha kwaamba kwaanzha koku kuli buti. ³⁰ Angelo wakamwambila ati, "Utatiyi, Maliya, ukuti ulisalilwe kwa Leza. ³¹ Bona, ulakemita ifwu wamana ulakazhala mwana mwembezhi. Ulakamuulika izhina lya 'Jeso.' ³² Ulakuli muntu mulemu alimwi ulakutewa Mwanakwe wezo Usumpukile. Mwami Leza ulakamupa chuuna cha bwami bwa Davida. ³³ Ulakendelezha in'ganda ya Jakobo kushika kukabe kutamana, alimwi bwami bwakwe tabukamana.'' ³⁴ Maliya wakamwambila Angelo ati, "Mbubuti chechi mbuchikonzha kuba nkaambo ume nshina kuzhiba mulombwana?'' ³⁵ Angelo wakamwingula ulaamba kwakwe ati, "Moza usalala ulakakuvumba, alimwi insana sha wezo Ulikwizeulu shilakakuvumba. Ubobo wezo uya kuzhalwa ulakatewa Mwanakwe Leza. ³⁶ Bona, musazhinoko Lizabeti aze wazhala mwana mwembezhi umbukando. Weno mwezhi wa kwe wa chisambomwe, mukaintu wakutewa tazhali. ³⁷ Ukuti kulakwiina chishupa ku Mwami Leza. ³⁸ Maliya wakaamba, "Langa ume ndimusebezhi mukaintu wa Mwami. Achibe mbubona kwiingaiya u mulumbe wako.'' Amane Angelo wakamushiya. ³⁹ Ngona awo Maliya wakalibambila kuya kubuseanba mapili kumunzhi uli ku Judiya. ⁴⁰ Wakaya kunjila mu n'ganda ya Zakaliya amane wamwaanzha Lizabeti. ⁴¹ Inzho Lizabeti nakakutelela kwaanzha kwa Maliya, mwana wakuli mwifu lyakwe wakasamba, Lizabeti wakazuzhiwa u Moza Usalala. ⁴² Wakapozomoka iizwi ikando ulaamba, "Uwe ulilonjelelwe akati ka bakaintu, alimwi ulilonjelelwe wezo uti akavwe mwifu Lyako. ⁴³ Nkaambo nzhi chachitika kwaamba baina Mwami wangu balyelele kushika kwangu? ⁴⁴ Ukuti bona, chiindi nindatelela kwanzhiwa kuvwa kwako mu matwi angu, mwana uli mwifu lyangu wasontoka mukubotelwa. ⁴⁵ Ngushichoolwe mukaintu wezo wakashoma kwaamba shilazuzukizhiwa shintu shesho nshakambilwa kuvwa ku Mwami. ⁴⁶ Maliya wakaamba, "Moza wangu ulatembaula Mwami, ⁴⁷ alimwi bumi bwangu buki tangele mu Mwami Leza mufutuli wangu. ⁴⁸ Ukuti wabona bupushi bwa musebezhi wakwe mukaintu. Ukuti bona, Bantu boonse balanketa ume ati mulonjezhe. ⁴⁹ Nkaambo shinsana shoonse wanchitila chintu chikando alimwi izhina lyakwe lilasalala. ⁵⁰ Luse lwakwe lulaba kuvwa ku musela wezu kuya ku musela umwi ukuli babo bamutiya. ⁵¹ Watondezha insana iitashi lyakwe; Wasalanganya boonse bakulitukumuna nkaambo ka matelaishi a myozo yabo. ⁵² Wasowa anshi bana ba bami kuvwa a shuuna shabo sha bwami amane wasumpula bapushi. ⁵³ Wabazuzha bafu inzala u shintu shibotu, pele bavubi wabatanda kwiina nchubakwete mu matashi. ⁵⁴ Wamuyovwa izilayeli musebezhi wakwe, kutondezha luse lwakwe ⁵⁵ (mbubona mbwakaamba ku maushesu) kwa Abulahamu uku luhubo lwakwe shikwense." ⁵⁶ Maliya wakakala u Lizabeti kwa myezhi yotatwe amane wakazhoka ku munzhi wakwe. ⁵⁷ Inzho chakashika cha Lizabeti chakutumbuka ubobo wakazhala mwana mwembezhi. ⁵⁸ Bashimukobo nina u basazhiina bakatelela ati Mwami wakatondezha luse lwakwe lukando ku mukaintu, inzho bakatangala aze. ⁵⁹ Inzho mu buzuba bwa Lusele bakamuleta mwana kupalulwa. Bakuzanda kumwita ati "Zakaliya," izhina lya baushi. ⁶⁰ Pele baina bakaamba, "Peepe. Ulakutewa Johani.'' ⁶¹ Bakamwaambila ati, "Kwiina akati ka basazhinoko ukwete izhina lelyo.'' ⁶² Bakamupa chitondezho ushi kubuzha izhina ndyakuzanda kumulika. ⁶³ Ushi wakalomba chakulembela amane wakalemba, "Izhina lyakwe ngu Johani.'' boonse bakazhingwa kuli chechi. ⁶⁴ Ndilyona mulomo wakwe wakayaluka u mulaka wakwe wakanguluka. Wakaamba ukutembaula Leza. ⁶⁵ Bukandu bwakenjila kuli babo bakubazhingulukile. Oonse makani aza akamwaala mu chishi choonse cha Judiya. ⁶⁶ Boonse babo bakaatelela bakaazobola mu myozo yabo, balaamba, "Wezu mwana ulakaba buti." Ukuti itashi lya Mwami kalili aze. ⁶⁷ Zakaliya ushi wakazula Moza Usalala ngoona wakashinshima, ulaamba, ⁶⁸ "Atembaulwe Mwami, Leza wa Izilayeli ukuti washika kuyovwa alimwi wamanizha kunununa bantu bakwe. ⁶⁹ Watuletela luya lwa lufutuko mu n'ganda ya Davida musebezhi wakwe ⁷⁰ (mbubona mbwakaamba ku milomo ya bashinshimi bakwe basalala kuvwa ku chiindi cha kale kale), ⁷¹ lufutuko kuvwa ku bashinkondo nokwesu alimwi kuvwa ku matashi ababo batuswile. ⁷² Ulakachita bobo kutondezha luse kuba maushesu alimwi kuzhibaluka chivuminano chakwe chisalala, ⁷³ chishomezho nchakakonkezha kwa Abulahamu ushesu. ⁷⁴ Wakakonkezha kutupa, amana kutvuna kuvwa mu matashi a balwani besu, tukamusebenzele chakubula bukandu ⁷⁵ mbubusalazhi alimwi kubula busofwazhi kubushu bwakwe mu mazuba esu oonse. ⁷⁶ Inzho, uwe, Umwana, ulakatewa ati mushinshimi wa Mwami Ulemekwa, ukuti ulakaya kubushu bwa Mwami kubamba inzhila yakwe, kubayiisha bantu makani akwiza kwakwe, ⁷⁷ kupa luzhibo lwa makani a lufutuko ku bantu bakwe kukulekelelwa kwa shibi shabo. ⁷⁸ Chechi chilakachitika nkaambo ka luse lukando lwa Leza wesu, nkaambo ka chechi mufutuli, uli ukoya izuba livwa mwizeulu ulakeza kutuyovwa, ⁷⁹ kumunikila babo boonse bakala mu mushinze u muchimvule cha lufu. Ulakachita chechi kwaamba asololee matende esu munzhila ya luumuno.'' ⁸⁰ Inzho mwana wakakula alimwi wakazuma mu moza, wakakuli mulukula kushikila buzuba mbwakalibonya antangalala kwa Izilayeli.