¹ Amane wakabambila kaano mbuli mbubelele kukomba chakutalengaana, ² ulaamba ati, "Muchishi chimwi kamuli mubeteshi umwi watakakutiya Leza alimwi katabalemeka bantu. ³ Inzho kakuli muka mufwu mu munzhi momo, kashika kwakwe lyoonse kwakwe, ulaamba, njovwa kwaamba nchitilwe kuli wezo ngutwaamba aze.' ⁴ Kuchiindi chilamfu katalibambile kumuyovwa, pele kwiite kaindi kashoonto wakalyaambya mwini ati, 'Nikuba kwaamba ume nshimutiyi Leza naaba kupa bulemu muntu, ⁵ nkaambo wezu muka mufwu wampenzha, Ndamuyovwa kwaamba achitilwe bwelele, kwaamba atampenzha linji nkaambo kakwiza kwakwe abuzuba.''' ⁶ Ninzho mwami wakaamba, "Telela batachizhi kubeteka kabotu mbubaamba. ⁷ Ninzho sa Leza takaleti bubeteshi bubotu kui babo basale bakwe ubamuliila muunza u mashiku? Sa wachelwa chiindi chilamfu kwabo? ⁸ Ndakushimwina ati ulafwambaana kubeteka kabotu. Nikuba kuti Mwana a Muntu, sa ulayana lushomo ano anshi?''' ⁹ Ninzho wakaamba alimwi mu kaano kaka kuli babo bakuli shoma ati mbalulami alimwi kabasampaula bamwi bantu, ¹⁰ "Balombwana bobile bakaya ku chikombelo kukomba - umwi kali mu Falisi umwi kali shimutelo. ¹¹ Mu Falisi wakazhimuka wakomba ati, 'Leza, ndakulumba nkaambo nshili ukoya bantu bamwi - bafumpi, bantu bashimafunze, bashimamambe - alimwi ukoya wezu shimutelo. ¹² Ndaliimya kulya shiindi shobile ansunda. Ndapa che kumi kuli shoonse nshinjana.' ¹³ Pele shimutelo, kazhimine lwa alaale katakonzha ukulanga kwi zeulu, pele wakalyuuma achamba, ulaamba, 'Leza mfwila luse ume ndimuchita shibi.' ¹⁴ Ndamushimwina ati, wezu mulombwana wakaya ku n'ganda yakwe ulisalalilwe kubaala wezo umwi, nkaambo kufumbwa ulisumpula ula fwinshiwa, pele kuumbwa ulifwiinsha ulasumpulwa.'' ¹⁵ Bantu kabaleta kwakwe bana kwaamba abaampe matashi akwe, pele bashichiiya nibakachibona chechi, bakaba lemanina. ¹⁶ Pele jeso wakabompolola amane wabeta ati, "Amubaleke bana beze kwangu, alimwi mutabakasha. Nkaambo bami bwa Leza mbubwabo bali bobo. ¹⁷ Chini chini ndamushimwina ati, kufumbwa utatambuli bwami bwa Leza ukoya mwana mushoonto wezo takenjili.'' ¹⁸ Muleli umwi wakamubuzha ulaamba ati, "Mwiiyi mubotu, Nchinzhi nchinjelele kuchita kwaamba nkayane bumi buteeli?''' ¹⁹ Jeso wakamwingula ati, Nkaambo nzhi ulenta ati mubotu? Kwiina mubotu chita buyo Leza. ²⁰ Uliizhi milawo - utachiti bumambe, utayaya, utebi, utapi bumboni bwakuchenga, lemeka bauso u banoko.'' ²¹ Muleli wakaamba ati, ''Shoonse sheshi ndashichita kuvwa ku bwana bwangu.'' ²² Jeso nakatelela bobo, wakamwambila ati, "Kuli chomwi nchubulizhizhe. Ulyelele kuuzha shoonse nshukwete upe bapushi, ulakayana buvubi kwizeulu - wamana ushike, u nchilile.'' ²³ Pele muleli nakatelela bobo wakalemana chini chini, nkaambo kakwete lubono lunji lunji. ²⁴ Amane Jeso, wakamulanga, ulaamba "Mbuchili chizumu ku bavubi kunjila bwami bwa Leza! ²⁵ Ukuti nchuuba ku Nkamela kunjila mu linso lya nyeleti kubazha ku muntu muvubi kunjila mu bwami bwa Leza.'' ²⁶ Babo bakaatelela bakaamba ati, "Inzho nguni ukonzha kufutulwa?'' ²⁷ Jeso wakabaingula ati, "Shintu shizumu ku bantu ukwa Leza nshuuba." ²⁸ Pita wakaamba ati, "Chibotu, uswe twashiya shintu shesu shoonse amana twakuchilila." ²⁹ Jeso amane wakabaambila ati, "Chini chini, ndamushimwina ati kwiina washiya i n'ganda, mwinakwe, banina, nibaba bazhali u kaambo ka bwami bwa Leza, ³⁰ uti atatambuli chibaala chiindi cheno, alimwi u shiindi shishika, bumi buteeli.'' ³¹ Amane kubabunjika bali ikumi u bobile, wakabaambila ati, "Amubone tulakuya ku Jelusalema, alimwi shoonse shintu shakalemba bashinshimi shamakani a Mwana a Muntu shilazuzukizhiwa. ³² Ukuti ulakaabwa ku bantu bakunze, ulakasalizhiwa ukusampaulwa, ukumufwila mate. ³³ Bakamana ku muuma, balakamuyaya, mu buzuba bwa tatu ulakabuka alimwi.'' ³⁴ Kwiina nchibakazhiba ku makani aza, alimwi izwi leli lyakasesekwa kwabo, alimwi shoonse shakaambwa kwiina nshibakatelelesha. ³⁵ Chakachitika ati Jeso nakashika ku Jeliko, umwi moofwu kashite kumbali ya nzhila ulalomba, ³⁶ atelele bantu balaita, wakabuzha chakuchitika. ³⁷ Bakamushimwina ati Jeso waku Nazaleta uliitile ³⁸ Moofwu wakapozomoka, ulaamba, "Jeso Mwanakwe Davida mfwila luse." ³⁹ Babo bakwiitile bakamulemanjna moofwu bamwambila ati aliinze. Pele ndilelyo nakapozomokesha ati, Mwanakwe Davida, mfwila luse." ⁴⁰ Jeso wakazhima ngoona walailila kwaamba moofwu bamulete kwakwe. Moofwu nakashika afwaafwi, Jeso wakamubuzha ati, ⁴¹ "Chiinzhi nchuzanda ume nkuchitile?'' Wakaamba, "Mwami, Ndazanda mbone. ^{42 43} Jeso wakamwaambila ati, "Bona. Lushomo lwako lwakuponya." Ndilyona wakabona ngoona wakamuchilila watembaula Leza . Boonse bantu, nibakamubona, bakatembaula Leza.