¹ Jeso wakambila bashichiiya bakwe ati, ''Chini chini imfumpu shilakuliko, pele mawe ku muntu wezo ushileta! ² kachili chibotu kuli nguwe kwaangwa ikangabwe munshingo ukumusowela mu lwatele kubazha kufumpuzha womwi wabashoonto. ³ Amuchenjele. Kuti munyoko wabisha, muchindulule, alimwi nakuti wabeba, umulekelele. ⁴ Kuti wakubishizha shiindi shili chiloba mashikati, amana wazhoka kwako shiindi shili chiloba, ulaamba, 'Ndabeba,' uwe ulyelele kumulekelela, ⁵ Batumwa bakamwambila Mwami ati, "Luzungile lushomo lwesu.'' ⁶ Mwami wakabaingula ati, ''Kuti nimwakukwete lushomo luli ukoya kaseke ka masitadi, mulakonzha kwambila isamu leli, 'Zyuka, ukuya ukamenene mu mulonga, lilamutelela. ⁷ Pele nguni akati kenu, ukwete musebezhi ulima mu muunda naba kwembela imbelele ukonzha kumwambila mbwavwila ku muunda ati, 'Kweenda ndilyona ukale ulye'? ⁸ Sa takamwambila ati, Mambila chimwi chakulya, wamana unsengelele ukulindila kushikila manizhe kulya ukunwa. Ndamanizha ume uwe nukalya'? ⁹ Wiina na mulumba musebezhi nkaambo wachita nshakalaililwa, na mbuti? ¹⁰ Amwe mbubona, kuti mwashichita shesho nshimwalaililwa, mulyelele kwaamba buyo ati, 'Uswe tatwelele. Twachita buyo chitwelele kuchita.''' ¹¹ Chakachitika kwaamba nakuchiya bweenda kuya ku Jelusalema, wakaita ku munyinza wa Samaliya u Galilaya. ¹² Nakanjila buyo mu munzhi umwi, momo wakaswanganya balombwana bali ikumi bakusatile chinsenda. Bakahima alaale kuvwa awo ngakubele ¹³ bamane bakapozomoka, balamba , "Jeso, Mwami, tufwile luse.'' ¹⁴ Chiindi nakababona, wakabambila ati, ''Kamuya mukalitondezhe ku bapaizhi.'' Nibakuchiya bweenda bakapona. ¹⁵ Umwi wabo nakabona kwaamba wapona, wakachinduluka, iizwi ikando watembaula Leza. ¹⁶ Wakawila ku matende a Jeso, walabana kumulumba. inzho kali muna samaliya. ¹⁷ Jeso wakaamba ati, ''Sa kabatali ikumi baponyiwa? Balikwi bali ifwuka? ¹⁸ Kwiina bamwi bazhoka kulumba ukupa bulemu kwa Leza, chita buyo wezu muvwa mashi?'' ¹⁹ Wakamwambila ati, "Zhimuka, ukuya. Lushomo lwako lwakuponya.'' ²⁰ Kubuzhiwa ku vwa ku ba falisi bwami bwa leza nibukaashika, Jeso wakabaingula ulaamba ati, "Bwami bwa Leza tabushika mukubulindilila, ²¹ Ulimwi kwiina nibaya kwaamba ati, 'amulange, mbubobu!' naaba, mbubolya kolya!' Ukuti amubone, bwami bwa Leza buli mwenu mukati.'' ²² Wakabambila bashichiiya, "Mazuba alashika nimukaazandisha kubona mazuba amwi a Mwana a Muntu, ²³ pele kwiina nimukaabubona. Balakamwaambila ati, 'Amulange, kolya! Amulange, ano!' Pele mutakavwi naaba kubachilila, ²⁴ ukuti mbubona lulabo lwamunika chiindi nilulaba kuvwa ku luya lumwi kuya ku luya lumwi lwa mwizeulu' mbubona mbuchikaaba ku Mwana a Muntu mu buzuba bwakwe. ²⁵ Pele kutaanguna ulyelele kupenga mushintu shinji shinji alimwi ulakakakwa kumusela weno. ²⁶ Mbubona mbuchakachitika ku mazuba a Nowa, mbubona mbuchikaaba mu mazuba a Mwana a Muntu. ²⁷ Bakalya, bakanwa, bakatwala, alimwi bakatwazhiwa kushikila buzuba Nowa nakenjila mu bwato - izambangulwe lyakeza ukubazonauna boonse. ²⁸ Chilikozhenye, mbubona mbuchakachtika mu mazuba a Loti - bakakulya ukunnwa, kuula alimwi ukusambala, kushanga ukuzaka. ²⁹ Pele buzuba Loti nakamuvwa mu Sodoma, kwakawa mulilo u salufa kuvwa kwizeulu ukuzonauna boonse. ³⁰ Chamana bobo chilakaba mbubona bobo mu buzuba mwana a Muntu akabulika. ³¹ Buzuba bobo wezo uli achiluli cha n'ganda atakaseluka kubweza shintu shakwe mun'ganda, mbubona azae uli mu muunda atakazhoka. ³² Amuzhibaluke muka Looti. ³³ Kufumbwa wezo uzandisha bumi bwakwe, ulabuswekelwa. Pele kufumbwa wezo uswekelwa bumi bwakwe ulabufutula ³⁴ Ndamushimwina ati, kubushiku bobo kulakuli bantu bobile balele mubulo. Womwi ulakatolwa, umwi ulakashaala. ³⁵ Kulakuli bamakaintu bobile bazhiya maila anoomwi. Womwi ulakatolwa, umwi ulakasiiwa." ^{36 37} Bakamubuzha ati, "Nkukwi, Mwami?" Wakabaambila ati, "kufumbwa kuli mutunta kulakuli ba shikube babungene antoomwi."