¹ Inzho boonse bashimutelo ubamwi bashishibi kabashika kwa Jeso kupupulala. ² Ba falisi u balembi bakatalika kulizumanana lwabo beni, ukutalika kwaamba ati, "Wezu muntu ulatambula bashishibi alimwi ulalya abo.'' ³ Jeso wakabambila kaambyo kaka, ulaamba ati, ⁴ ''Nguni akati kenu, kuti ulikwete imbelele shili mwaanda amana waswekelwa yomwi, utakonzha kushiya shili makumi ali ifwuka imbelele shili ifwuka mulukula, ukuya kukapula yomwi izhiminine kushikila eyane? ⁵ Nakuti weyana ulebika amafunzhi wetola waya ulibotelelwe. ⁶ Ashika ku n'ganda, ulompolola benzhiina alimwi ubashimukobo nina, ulabaambila ati, 'Amubotelwe ame, ukutindeyana imbelele yangu yakuswekele.' ⁷ Ndaamba kwenu umbona bobo, kulakuli kubotelwa kwizeulu na umwi wa bashishibi wasanduka, kubaazha bali makumi ifwuka ubali ifwuka balo batalazandika kusanduka. ⁸ Naba mukaintu ukwete mali alubulo ali ikumi, kuti wasowa lyomwi, utakonzha kusonsa ilambe, wapeela mun'ganda ukukapula chini chini kushikila waliyane lyakuzhiminine? ⁹ Lelyo aliyana buyo, uloompolola bashimukobo nina ubeenzhiina amane wabambila ati, 'Amubotelwe ame nkaambo ndaliyana ili lyangu lyakuzhiminine.' ¹⁰ Nikuba bobo ndamwambila ati, kuli kubotelwa ku bushu bwa bangelo ba Leza na womwi wabashishibi wasanduka.'' ¹¹ Inzho Jeso wakaamba ati, "Umwi mulombwana kazhele bana balombwana bobile, ¹² mushoonto wakambila baushi ati, 'Taata, ndazanda umpe chipanzha cha lubono changu.' Ubobo wakabanya lubono lwakwe akati kabo. ¹³ Katana kuvula mazuba, mushoonto wakabunganya lubono lwakwe amane wakaya ku chishi chili kulaale, koko kwalo nkwaka lusangaula lubono loonse mukupona bumi bwa mafunze. ¹⁴ Inzho lubono loonse nilwakamana, kwakaba inzala muchishi momo ubobo wakapenga chini chini. ¹⁵ Wakaya kunjila milimo ku bantu bamuchishi momo, bakumutuma kuya kusanina ingulube. ¹⁶ Kalikumbuzha kulya shakuly sha ngulube nkaambo kakwiina wakumupa. ¹⁷ Pele wezu mushoonto bumwi buzuba wakatelaika ukulyaambya mwini ati, 'Bali bongaye basebezhi ba taata balo balya chakukuta, pele ume ndikono ndalishinya ku nzala! ¹⁸ Ndazhimuka ndukuya kwa taata, nkaambe kwakwe ati, "Taata ndabishizha izeulu alimwi aze. ¹⁹ Ume nshichelele kutewa mwanako; umbike kuba umwi wabasebezhi bako.''' ²⁰ Ubobo mushoonto wakazhimuka waya kwa ushi. Kachili kulaale, ushi wakamubona wafwa luse, wakalukanka waya wamukumbata ukumushonta. ²¹ Mwana wakambila ushi ati, 'Taata, ndabishizha izeulu alimwi aze. Ume nshichelele kutewa mwanako.' ²² "Ushi wakabambila basebezhi ati, 'Amufwambaane mulete chikobelo chibotusha mumusamike alimwi mumubike inwenwe kwitashi lyakwe alimwi umakatulo ku matende. ²³ Mwamana mulete moombe mwiinu mumuyaye. Atulye ukubotelwa! ²⁴ Ukuti mwanangu kali mufwu inzho wabuka. Kazhiminine, inzho wabonwa.' Bamane bakatalika kusekelela. ²⁵ Mwanakwe mukando kali mu muunda. Nakazhoka a n'ganda wakatelela inyimbo ukuzhana. ²⁶ Wakompolola umwi wabasebezhi wamubuzha chakuchitika. ²⁷ Musebezhi wakamwambila ati, munyoko wazhoka inzho bauso bayaya moombe mwiinu nkaambo wazhoka uli kabotu.' ²⁸ ''Mukando wakalemana alimwi wiina nakazanda kunjila, ubobo ushi wakavwa ansengwe wamukombelezha. ²⁹ Pele wezu mwana mukando wakambila ushi ati, Langa myaka yezhi yoonse njindakusebezela alimwi kwiina nindakaka milawo yako pele kwiina nuwakampa nikaba kapongo kwaamba nkonzhe kusekelela ubenzuma, ³⁰ pele mwanako nazhoka walo wakazonauna lubono lwako abahuule, wamuyaila moombe mwiinu.'' ³¹ "Ushi wakamwambila ati, 'Mwanangu, uwe tuli aze lyoonse, alimwi shoonse nshinkwete nshishako. ³² Pele kachili chelelo kwesu kwaamba tusekelele, ukuti wezu munyoko kali mufwu, bwasunu mumi; kali muzhimini bwasunu wabonwa.'''