¹ Kuchiindi checho bamwi bantu bakamushimwina makani, a bana Galilaya bali bulowa Pilato mbwakasanganya u shipaizho shabo. ² Jeso wakabaingula ati, "Sa mulatelaika ati baba bana Galilaya kabali bashishibi kubaazha boonse bana Galilaya nkaambo kakupenga munzhila yezhi? Peepe, ³ Ndamwambila bobo. Pele kuti mwatasanduka, noonse mulakafwa mbubona bobo. ⁴ Na babo bali ikumi u lusele bantu bamu Siloamu bakawilwa in'ganda ukufwa ngoona awo mulatelaika kababaala shibi ku bantu bamu Jelusalema? ⁵ Peepe, Ndaamba. Pele umwe mwatasanduka, amwe noonse mulakafwa. ⁶ Jeso wakabambila kaano ati, "Umwi muntu kakwete ikuzu lyakumenene mu muunda wakwe inazho wakeza kulanga michelo kuli ndilyo kwiina michelo njakayana. ⁷ Wezu muntu wakambila basebezhi ba mu muunda wakwe ati, 'Amubone, kwa myaka yotatwe ndakusoleka kwiiza kukapula michelo kwi samu leli pele kwiina nchindakuyana. Alitemwe. Ndyaanzhi lilazonauna bulyo inshi?' ⁸ "Musebezhi wa mu muunda wakaingula ati, 'Mwami, alilekwe kwa weno mwaka kwaamba ndishile mwiimbi ndamana mbike ko imbolezhi ya busani. ⁹ Kuti likeezhe michelo mwakali, atati chabota; pele kuti litakezhi michelo, alikatemwe!''' ¹⁰ Inzho Jeso kayiisha mu sinagogu mu buzuba bwa Sabata. ¹¹ Kakuli mukaintu momo umwi wakunjililwe moza mubiyabi wakubula insana kwa myaka ili ikumi u lusele. Kankonkomene alimwi katalozha kukotamuka. ¹² Jeso nakamubona wezo mukaintu, wakamompolola ulaamba, "Mukaintu, wangululwa kukubula insana." ¹³ Wakaampa itashi lyakwe alinguwe, ndilyona wakololoka alimwi ukumupa bulemu Mwami Leza. ¹⁴ Pele mwendelezhi wa sinagogu wakalemana nkaambo jeso wakaponya mu buzuba bwa Sabata. Mwendelezhi wa sinagogu wakaingula ulaamba, "Kuli mazuba ali chisambomwe muntu ngayelele kusebeza. Kamwiza mwashililkwa, ubutali buzuba bwa Sabata.'' ¹⁵ Mwami wakamwingula ukumwambila ati, "Bashikopoopa amenso! Sa kwiina wenu ufungulula musune niiba imbongolo yakwe amana wetola kukunwa meenzhi mu buzuba bwa Sabata? ¹⁶ Inzho aze wezu mbubona mwanakwe Abulahamu, wakwangilwe kwa shatani kwa myaka ili ikumi u lusele, sa bwange bwakwe tabwelele kwangululwa mu buzuba bwa Sabata?'' ¹⁷ Nakaamba shintu sheshi babo boonse bakumukazha bakausa insoni, pele inkamu yoonse yakabotelwa kushintu shoonse nshakachita. ¹⁸ Mane Jeso wkaamba, "Anu bwami bwa Leza bulakonzhanya inzhi, alimwi ndabwingaiya inzhi? ¹⁹ Buli ukoya lunungu lwa lubanga lwalo mulombwana umwi ndwakaminza mu muunda wakwe, yakamena yakula lyaba isamu ikando alimwi bazuni ba mwizeulu bakazaka shitaanto mu mitabi ye samu.'' ²⁰ Alimwi wakaamba ati, ''Inga ndabwingaiya inzhi bwami bwa Leza? ²¹ Buli ukoya bumena mukaintu mbwabweza kusanganya mu fulawa kushikila woonse wazulila.'' ²² Amane Jeso wakeenda mu minzhi yoonse, kuyiisha ukuya kunjila mu Jelusalema. ²³ Umwi wakamwambila ati, ''Mwami sa mbashoonto bati bakafutulwe?'' Inzho wakabaambila ati, ²⁴ ''Amupenge kunjila mu mulyango ushankene, nkaambo, ndamushimwina ati, banji banji, balakasoleka, pele tabakakonzha kunjila. ²⁵ Kufumbwa mukamwini in'ganda azhimuka amana wakiya ukwiinga kuchitendele, uwe ulakuzhimine ansengwe ukuma chitendele ukwaamba ati, 'Mwami, Mwami, tuyalulile tunjile.' "Ulamwiingula ati, 'Nshimwizhi, naaba kwaamba ati, anu mwavwa kwi.' ²⁶ ''Mwamana mulakaamba ati, 'twakalya ukunwa kumbele lyako alimwi wakayiisha mu tuzhila twesu.' ²⁷ "Pele ulakaingula ati, 'Ndamushimwina umwe ati, 'Nshikwizhi nkumwavwila. Amwavwe kamuya, umwe noonse numwakusebezela busofwaazhi!' ²⁸ Kulakaba kulila ukuluma meno chiindi mwakabona Abulahamu, Isaki, Jakobo, alimwi ubabo boonse bashinshimi mu bwami bwa Leza, pele umwe mwasweewa ansengwe. ²⁹ Balakavwa kwiwe, kumbo, kumbala u kumusanza kukala kwi tebulu mu bwami bwa Leza. ³⁰ Amuzhibe kwaamba, babo batalemekwa mbubati bakabe bataanzhi, babo balemekwa balakaba bashalizhi.'' ³¹ Mu chiindi nchichona checho, bamwi ba Falisi bakeza baamba kwakwe ati, "Koya ukuvwe kono nkaambo Helodi ulazanda kukuyaya." ³² Jeso wakaingula ati, kamuya mumwambile wezo mwaaba, langa ndatanda ma daimona ukuponya bwasunu alimwi uzona, buzuba bwatatu ndamanizha makanze angu.' ³³ Ubobo, nchelelo kwangu kwaamba ntolelele bwasunu, uzona , ubuchilila ukuti tachivumininwe kwamba mu shinshimi akayayilwe kunze ya Jelusalema. ³⁴ Jelusalema, Jelusalema, uyaya bashinshimi ukuwaala mabwe babo batumwa kwako. Shiindi shiinji ndakuzandisha kubunjika banako ukoya inkuku mbwibabunjika bana ukuba uwamina mu mababa, pele mwiina kukachizanda chechi. ³⁵ Bona, in'ganda yako yashaala. Ndamushimwina ati, tamukamboni linji kushikila mukaambe ati, 'Muleleke wezo uziza mwizhina lya Mwami.'''