¹ Kuchiindi checho, bantu banji banji bakakumuzhingulukile Jeso chakwaamba ati bakatalika kulimbana amibili, wakatalika kubambila bashichiiya bashichiiya bakwe ati, "Amuchenjeleku bumena bwa ba falisi, bashikoopopa amenso. ² Pele kwiina chihummbe chitakazhibwa, alimwi kwiina chiseseke chitaka zhibwa. ³ Ubobo kufumbwa nchimuti mukaambe mu mushinze chilakatelelwa mu mu muni, alimwi kufumbwa nchimwavwiya mun'ganda chilakauminwa mompo ompo anduli sha maanda. ⁴ Ndamwaambila, umwe nubenzuma, mutatiyi babo bayaya mubili, bamana kwiina chimwi nchibakonzha kuchita. ⁵ Pele ndamuchenjezha ali wezo ngumwelele kutiya, Amutiye walo wezo ukonzha kuyaya, amana kuyaya, ulikwete insana shakumusowela mu mulilo. Chini chini ndamwambila, ati nomutiye. ⁶ Sa bazuni bosanwe tabasambalwa mali alubulo obile? Nikuba bobo kwiina naba omwi ulubwa kubushu bwa Leza. ⁷ Pele naaba masusu ali mumitwi yenu awo alibalilwe. Mutatiyi. Umwe mulikwete bulemu bubaala bazuni banji banji. ⁸ Ndamushimwina ati, kufumbwa wezo uvumina makani angu kubushu bwa bantu, Mwana a muntu aze ulakamukanana kubushu bwa bangelo ba Leza, ⁹ pele kuli wezo unkaka kubushu bwa bantu aze ulakakakwa kubushu bwa bangelo ba Leza. ¹⁰ Wezo woonse waamba mazwi mabiyabi ku mwana a Muntu, ulakakonzha kulekelelwa, Pele kuli wezo usampaula Moza Usalala, wiina naya kulekelelwa. ¹¹ Chiindi nibakaamutola kubetekwa ku basololi mu ma Sinagogu, ukubaleli, uku bami bachishi, mutakalibiliki mbumuya kulihuna mu twaambo twenu naba nchimuya kwaamba, ¹² ukuti Moza Usalala ulakamuyiisha achiiindi checho nchimuya kwaamba.'' ¹³ Kuvwa awo umwi akati kabo wakamwaambila ati, "Mwiiyi, mwambile mukwesu alwabanye lobono akati ame. ¹⁴ "Jeso wakamwambila ati, "Mulombwana, nguni wakansala ume akati kenu kuba mubeteshi akati kenu?'' ¹⁵ Wakabambila ati, ''Amuchenjele ukulitantumuna kushiyanza shibiyabi ukubulyato, nkaambo bumi bwa muntu tabuzhimine a lubono ndwakwete.'' ¹⁶ Amane Jeso wakabapa kano, ulaamba ati, ''Muunda wa muntu muhubi wakamupa butebuzhi bubotu, ¹⁷ ngoona wakatalika kulyambya, mu mozo wakwe ati, 'Nchite buti, nkaambo ndiina busena nkwinkonzha kuzobwela shishango shangu?' ¹⁸ Wakaamba ati, mbubolya mbwinkachita. Ndayaya matala angu ndamana nzake amwi makando, momo mwinkazobwela shishango shangu u shintu shimwi. ¹⁹ Ndalyambila ati, Moza wangu, ulikwete shintu shinji shizobwelwe kwa myaka minji minji. Lyokezhe, ulye, unwe, ubotelwe.''' ²⁰ Pele Leza wakamwambila ati, 'u muntu mulimbushi, bwasunu mashiku ulanangwa moza, amana shintu nshiwakabamba, shilakaba shani?' ²¹ Imbubo mbukubele ku muntu uzobwele lubono lwakwe amana tali muhubi mushintu sha Leza.'' ²² Jeso wakabambila bashichiiya bakwe, "Ubobo ndamushimwimwina ati, mutalibiliki makani a bumi bwenu nchimukalya, naaba makani anseba nshimukasama. ²³ Ukuti bumi mbukando kubaazha shilyo, alimwi u mubili uabaala shakusama. ²⁴ Amutelaike bazuni, baina nibashanga naba kutebula. Baina shizobwelo naba matala, pele Leza ulabasanina Mbulemu buli buti mbumukwete kubaala bazuni! ²⁵ Nguni akati kenu mukuzandisha ukonzha kuzungila nikaba kapanzha ku bumi bwakwe? ²⁶ Nakuti tamukonzha kuchita nikacheya ku bumi bwenu, nkaambo nzhi mulalibilika ukuli shimwi? ²⁷ Amubone maluba - mbwamena. Aina nchasebeza, nikuba kutunga. Inzho ndamushimwina ati, naba Solomoni mu bulemu bwakwe boonse wiina nakasama shebeshi shili bobo. ²⁸ Kuti Leza ulakonzha kusamika bwizu bwa mu myuunda, bwalo bubonwa bwasunu amana buzuba buchilila bwasweewa mu mulilo, mbubuti umwe mbwakonzha kumusamika chibaala, Umwe nubashi lushomo lushoonto! ²⁹ Mutakapula nchimukalya naba nchimukanwa, alimwi mutalibiliki. ³⁰ Nkaambo mashi oonse ali mono mu luundu alakapula sheshi shintu, umwe Ushenu uizhi kwaamba sheshi shilazandika kwenu. ³¹ Pele amukapule bwami bwakwe, usheshi shintu mulazungililwa. ³² Mutatiyi nu mbelele inshoonto, nkaambo ushenu ulibotelelwe kumupa bwami. ³³ Amusambale lubono lwenu mwamana muyovwe bapenzhi. Amulibambile shizobwelo sha mali shalo shitakonzha kuzapuka - lubono kwizeulu lwalo lutakonzha kumana, kwalo kwiina muteu ukonzha kuswena afwaafwi, alimwi kwiina impezu shizonauna. ³⁴ Ukuti koko kuli lubono lwako, u mozo wako awo nkubele. ³⁵ "Amusame shikobelo shenu bwelele alimwi ma lampi enu amunike, alimwi ³⁶ amube ukoya bantu balindilila shimalelo wabo chiindi azhoka kuvwa ku bwinga akonkomona bakonzhe kumuyalulila ndilyona. ³⁷ Bali uchoolwe babo basebezhi bayanwa balalindilila mwami wabo azhoka. Chini chini ndamushimwina, ulasama shikobelo shakwe ukubasengelela balakala aze kwi tebulu, amana ulashika kubasengela. ³⁸ Kuti mwami wazhoka lweendo lwabili mashiku, naaba lweendo lwatatu kusendela amana wabayana balilibambile, bali uchoolwe basebezhi bali bobo. ³⁹ Pele amwazhibe aza, kuti mukamwini in'ganda nakwizhi chiindi muteu nashika, natakuleka kwaamba in'ganda yakwe izonauke. ⁴⁰ Amwe mbubona amulibambile, nkaambo Mwana a Muntu ulashika chiindi nchimu tatelaishi kwamba ulashika." ⁴¹ Pita wakaamba ati, "Mwami, sa ulakanana buyo kwesu kaka kaano, na uku bantu boonse?'' ⁴² Mwami wakaamba, "Nguni mwendelezhi ushomeka alimwi musongo walo mwami wakwe ngwakonzha kupa bwendelezhi a basebezhi bamwi kwaamba akubapa shakulya a chiindi chelele? ⁴³ Ngushichoolwe wezo musebezhi walo chiindi mwami wakwe ashika ulamuyana ulachita bobo. ⁴⁴ Chini chini ndamwambila ati, wezo ulamupa bwendelezhi bwa lubono lwakwe loonse. ⁴⁵ Pele kuti wezo musebezhi waamba mu mozo wakwe ati, 'Mwami wangu wachelwa kuzhoka,' amana watalika kuuma basebezhi balombwana u bakaintu alimwi ukutalika kulya ukunwa alimwi ukukolwa, ⁴⁶ mwami wa musebezhi wezo ulashika chiindi walo natamutelaishi ati ulakonzha kuzhoka alimwi mu chiindi nchatezhi ulamukosaula mutupanzha ukumusalila busena antoomwi ubatashomeki ⁴⁷ Wezo musebezhi uwizhi chalo checho mwami wakwe nchazanda amana wiina nalibambila nikuba kuchita chelele uleza kuumwa chibaala. ⁴⁸ Pele wezo utezhi amana wachita chelele ku muumya, ulaumwa ashoonto. Pele wezo wakapewa chinji, kuvwa kwabo chinji chilakazandika, alimwi wezo wapewa shinji, asho shibaala shilakazandwa kwakwe. ⁴⁹ "Ndakeza kusonsa mulilo anshi, alimwi ndakulombozha kwaamba nuwakusonselwe kale. ⁵⁰ Pele ndikwete lupapatizo lwalo ndwinka papatizwa alo, ndatolelela kupenga kushikila kumane! ⁵¹ Sa mulatelaika ati ndakeza kuleta luumuno ano anshi? Peepe, Ndamushimwina, pele lwaandaano. ⁵² Ukuti kuvwa ninzho kulakuli bantu bosanwe mun'ganda yomwi ubandeene - botatwe bababukila bobile, abo bobile bababukila botatwe. ⁵³ Kulakaba kwaandana, ushi u mwanakwe mulombwana aze mwana wabukila baushi, baina babukila mwanabo mushimbi aze mushimbi wabukila baina. Baina zhala babukila muka mwanabo, aze muka mwanabo wabukila baina zhala.'' ⁵⁴ Jeso wakaambila inkamu ya bantu ati, "Kuti mwalibona ikumbi lyaliza lilavwa kumbo, ndilyona mulaamba, 'Imvula ilakwiza,' alimwi chilaba mbubona bobo. ⁵⁵ Kuti muuwo waunga kuvwa ku musanza, mulaamba, bwasunu kukalapiya,' alimwi chilachitika mbubona bobo. ⁵⁶ Bashikopoopa amenso, mulizhi kupandulula mbwiboneka inshi alimwi umazeulu, mbubuti mbumutakonzha kupandulula chiindi chaninzho? ⁵⁷ Nkaambo nzhi nchimutabeteki chiluleme akati kenu? ⁵⁸ Chiindi nimwaya kumubetshi u shi kaambo noko, munzhila usoleke kwaamba mutelezhanye aze kwaamba atabi nakutola ku babeteshi bakando, alimwi kwaamba mubeteshi atabi nakubeteka ukukwaaba ku mukando wantolongo. ⁵⁹ Ndakushimwina ati, wiina nuti ukamuvwe momo chita kushikila walipila oonse mali asheele."