¹ Pano ili papitele ifi, mupindi yatekele imfumu Atasesesi iya Pesha, Ezila alifumine ku Babiloni. Ifikolwe fya Ezila fili Selaya, Azarya, Hilukiya. ² Shalumu, Zadoki, Ahitube, ³ Amaliya, Azaliya, Melayoti, ⁴ Zelaya, Uzi, Buki, ⁵ Abishua, Hineasi, Elyaza, uwali umwana mwalalume wakwa Arona umusapwishi umukulu. ⁶ Ezila alifumine ku Babiloni kabili ali uwaishibile ifintu mu ifyali mu mishilo wa Mose iyo ba Yawe, ba Lesa bakwa Ishileli, abapele. Imfumu kaibapela fyonse ifyo baipwishe pakuti ukuboko kwaba Yawe kwali paliye. ⁷ Ifikolwe fimo ifyakwa Ishileli naba Sapwishi, abena Levi, naba kwiba mwitempele, naba kusunga apakwingilila, nababo abatongolwe ukubombela mwitempele nabo kabaya ku Yelusalemi mumwaka isanu naibili iya mfumu Atasesesi. ⁸ Alifikile mu Yelusalemi mu mweshi wa busanu, mumwaka wa isanu naibili, umwaka wa mfumu. ⁹ Kafuma Babiloni pabushiku bwakutatika ubwa mweshi wakutatika. Kyali nipa bushiku ubwakutatika ubwa mweshi wa busanu elyo afikile mu Yelusalemi, pakuti ukuboko ukuweme ukwa ba Lesa kwali paliye. ¹⁰ Ezila alipangile umutima wakwa mukufunda amafunde yaba Yawe nekuyapinta naku fundisha amafunde nefilapo mu Ishileli. ¹¹ Iyi yali ni nkalata iyo imfmu Atasesesi apele Ezila umusambishi ifikolumbulula amafunde yaba Yawe ne fipope ne mafunde ya Ishileli: ¹² ''Imfumu ya shaba mfumu Atasesesi, kuli umusambishi Ezila, ifya kulondolola fya fipope fyaba Lesa aba mwiulu: ¹³ Ninemo kuno napela umulapo ukwabati uli onse uwafuma mu bantu ba Ishileli mu kyalo kyangi - ukubikapo ne abasambishi nabena Levi - Abalukufwaya ukuya ku Yelusalemi koti baya na webo. ¹⁴ Nemo, ne mfumu, ne bakubomba nabo abili basano na babili, twatuma mwebo bonse ukuya mukwipusha pali Yuda na Yelusalemi ukilingana na ne mafunde yaba Lesa wenu, iyo ili mukuboko kwenu. ¹⁵ Mukalete siliva na golide iyo imfumu naba milimo bakwe bapele lukoso kuli ba Lesa wakwa Ishileli, uyo uwikala mu Yelusalemi. ¹⁶ Peleni fyonse lukoso siliva na golide iyo mwasangile mupusha ya Babiloni, pamo nefya bupe ifyapelwe pakutemwa kwabantu na basambishi bapele ifya ku nanda yaba Lesa mu Yelusalemi. ¹⁷ Palififyo bofyeni indalama ukushita ifilingile ifya kuliminako, imikoko ne mbelele ne mbuto shafya bupe nafya kunwa fya bupe. Mufipele pakipailo kilya ikili mu nanda yaba Lesa benu mu Yelusalemi. ¹⁸ Mukite ne fyashelepo ifya siliva na golide ifyo ifili kumoneka bwino kuli mwebo ne bakulu benu, mukufwisha bwino ba Lesa benu. ¹⁹ Bikeni ifuntu ifyo ifya pelwe lukoso kuli mwebo mukubomba mu nanda yaba lesa benu mu Yelusalemi. ²⁰ Ifili fyonse fimbi ifikofwaikwa ku nanda yaba Lesa benu ifyo mukofwaya, mutwale imitengo kukipawo kya mfumu. ²¹ Nemo, imfumu Atasesesi, napeleka umulapo kuli bonse abasunga indalama mumpusha ukupinta bushiya bwanika, ukwebati kyonse Ezila umusambishi, umulondoshi wa mafunde yaba Lesa aba mwiulu, aipusha kuli mwebo mupane ifiswile, ²² ukufika kuli 100siliva ifyama talenta, 100 imisangwa iya mbuto, 100 amabafwa aya waini, 100 mabafwa aya mafuta kabili ne mukele uwingisana. ²³ Kyonse kyafuma kukulapa kwaba Lesa aba mwiulu, mukikite ne kulabilapo mu nanda yakwe. Nikindo kingalenga ubukali bwakwe ukwisa pabufumu bwa mfumu na bana bakwe? ²⁴ Tukomyebeni ukwebati takuli insambu shimbi ishakubikapo ifya kunsoka nangu misonko pali onse umusambishi, abana Levi, aba kwimba, aba kusunga imilyango, nangu pa bantu abasontelwe ku kubombela kwitempele ne nkito ba ku nanda yaba ba Lesa. ²⁵ Ezila, nemano ayo ba Lesa bampele, usale abakupingula naba kulondolola mukupingilo abantu bonse abeshibile abo abatabeshibile amafunde. ²⁶ Umupanike onse uyo uwafilwa ukunakila amafunde ya ba Lesa nangu aya mfumu, nangu ukumwipaya, ukumanikwa, ukubapoka ifipe, nangu ukubakaka. ²⁷ Bapalwe ba Yawe, ba Lesa ba fikolwe fyesu, uwabikile fyonse ifi mu mitima wa mfumu mu kutota inanda yaba Yawe mu Yelusalemi, ²⁸ kabili uwakushishe ikipangano kyakiketekelo kuli nema kumfumu, neba milimo bakwe, ne bonse aba makosa abakinto. Naba uwakukosa pakuboko kwaba Yawe ba Lesa bangi, kabili kambunganya intungulushi ukufuma ku Ishileli ukuya na nemo.