¹ Dou sa yali beka ni kila, ikodou na veiwekani, (ni'u sa vosa vei ira lia era sa kila na vunau,) ni sa vaucia na tamata na vunau ena visiga ni nona bula? ² Ia na yalewa sa vawati, sa vauci koya na vunau vua na watina, ni sa bula tiko ko koya; ia kevaka sa mate na watina; sa qai sereki kinia na yalewa mai na vunau ni viwatini. ³ O koya na vayacani kinia me dautagane, kevaka sa lai vawati ki na dua na tagane tani, ni se bula tiko na watina: ia kevaka sa mate na watina, sa qai sereki lia mai na vunau ko ya; ka na yali kinia ni dautagane, kevaka ena lai vawati ki na dua na tagane tani. ⁴ Dou sa vakinia, na viwekani ni dou sa sereki mai na vunau e na vukui ni yago i Karisito; me dua tani mo dou viwatini kaya, io ko koya sa vaturi cake voki mai na mate me da vua kinia vua na Kalou. ⁵ Ni da sa tiko vayago lia, sa dau tubu vakaukauwa ena vitikida na gagadre ca, sa tubu mai na vunau, me vuataki kinia na mate. ⁶ Ia eda sa qai sereki mai na vunau, ni da sa qai mate ki na ka sa vauci ita; me da ia na veiqaravi e nai tovo vou ni yalo, ka yali e nai tovo makawa ni vunau. ⁷ A cava me da qai tukunia? Sa ca li na vunau? E yali sara. Au a yali dina ni kila se cava nai valavala ca, ka'u yali kila nai vunau: ni'u sa yali kila se cava na daukocokoco, kevaka sa yali tukunia nai vunau, Kakua ni kocokoco. ⁸ Ia na ca, ni sa kaukauwa ena vuku ni vunau, sa vatuburia e lomaqu na gagadre ca kece lia. Ni sa mate ca ni sa yali na vunau. ⁹ Ia ka'u a bula lia e liu ni sa yali na vunau; ia ni sa qai mai na vosa ni vunau, sa bula voki na ca , ka'u sa qai mate kinia. ¹⁰ Ia na vosa ni vunau, o koya ka yaco rawa kinia na bula, ka'u sa kunea sa yaco kinia na mate. ¹¹ Ni sa kaukauwa na ca, e na vuku ni vosa ni vunau, a sa temaki au kinia, ka vamatei au. ¹² Ia sa savasava na vunau, sa savasava voki lia nai varo, sa dodonu voki lia ka vinaka. ¹³ Sa qai yaco beka na ka vinaka me ka me'u mate kinia? E yali sara. A ca lia, me rairai kinia ni sa ca, sa tauria na ka vinaka me'u caka kinia me'u mate; me rairai kinia na ca me ca dina sara e na vuku ni vosa ni vunau. ¹⁴ Ni da sa kila sa ka vayalo na vunau: ia koi au, au sa vayago loa lia, ka'u sa volitaki ki na ca. ¹⁵ A ka ka'u sa caka tiko, au sa yali vinakatia, ia na ka ka'u sa vinakatia, au sa yali caka; ia na ka au sa catia, au sa caka tiko. ¹⁶ Ia kevaka ka'u sa caka na ka au sa yali ni vinakatia, au sa tukunia kinia ni sa vinaka nai vunau. ¹⁷ A sa yali ni o au dina sa caka, na ca lia sa tiko vi au. ¹⁸ Ni'u sa kila ni sa yali sara ni tiko vei au e na noqu tovo vayago e dua na ka vinaka; ni sa tiko lia vi au na vinakatia na ka vinaka; ia na kaukauwa me'u caka kinia, ka'u sa yali ni kunea. ¹⁹ Ia na ka vinaka au sa vinakatia, au sa yali caka; ia na ca au sa yali vinakatia, au sa caka lia. ²⁰ Ia kevaka au sa caka na ka au sa yali vinakatia, sa qai yali dina ni koi au dina sa caka, na ca lia sa tiko vi au. ²¹ Ia ka'u sa kunea kinia e dua na vunau, sa tiko kinia vei au na ca ni'u sa via caka na vinaka. ²² Ni'u sa vinakatia na vunau ni Kalou e na lomaqu dina: ²³ ia ka'u sa kunea e dua tani na vunau e na veitikiqu, a rau sa vivala ki na vunau sa tu e na lomaqu, a sa vabobulataki au ki na vunau ni ca, o koya sa tiko e na veitikiqu. ²⁴ A tamata valoloma koi au! o cei ena sereki au mai na yago ni mate koya? ²⁵ Au sa vavinavinaka vua na Kalou e na vuku ni noda Turaga ko Jisu Karisito. Ia sa qai vakakoya, au sa qaravia na vunau ni Kalou e na lomaqu dina, ia na vunau ni valavala ca e na noqui tovo vayago.