¹ A cava me da qai tukunia? me da valavala ca tiko lia me qai tubu valevu kinia na loloma? ² E yali sara. O ita sa mate ki nai valavala ca, eda na caka tiko vaevei nai valavala ca? ³ Dou sa yali beka ni kila, oi ita sa papitaiso vi Jisu Karisito, eda sa papitaiso ki na nona mate? ⁴ O koya eda sa bulu vata kinia, ni da sa papitaisotaki ena nona mate: me vaka sa vaturi cake voki mai na mate na Karisito ena kaukauwa ni Tamana, me da sa valavala vaka voki lia kinia ena bula vou. ⁵ Ia kevaka e da duavata meda vaka taki koya ena na nona mate, eda na vaka voki lia kinia ena nona tucake voki mai na mate: ⁶ ni da kila koya, ni rau sa lauvako vata kaya i na kauveilatai na noda tamata makawa, me takali kinia na yago ni valavala ca, me da kakua voki ni bobula ki nai valavala ca. ⁷ Ni sa sereki mai nai valavala ca o koya sa mate tu. ⁸ Ia kevaka eda sa mate vata ki Karisito, eda na vadinatia ni da na bula vata voki lia: ⁹ ni da sa kila ni sa vaturi cake voki mai na mate na Karisito, e na yali ni na mate voki, sa yali voki ni rawai koya na mate. ¹⁰ Ni sa mate ko koya, sa mate vadua ena vuku ni valavala ca; ia ni sa bula sa bula vua na Kalou. ¹¹ Mo dou vavoki lia kinia ni dou sa vakasami ikodou mo dou sa mate sara ki nai valavala ca ka bula vua na Kalou ena vukui Jisu Karisito. ¹² O koya me qai kua ni gumatua nai valavala ca ena yagomudou sa mate rawa, mo dou muria na kena gagadre ca. ¹³ Kua voki lia ni soli na vi tikimudou ki nai valavala ca me caka kinia na ka ca: dou soli ikodou lia vua na Kalou, me vaka dou sa bula mai na mate, kei na veitikimudou vua na Kalou me caka kinia na ka e dodonu. ¹⁴ Ni na yali vitaliataki ikodou nai valavala ca: ni dou sa yali lewai ena vunau, ena loloma lia. ¹⁵ Ia ka vaevei? meda sai valavala tiko li, ni da sa yali ni lewai ena vunau, ka e na loloma lia? E yali sara. ¹⁶ Dou yali tiko ni kila, o koya yadua dou sa soli ikodou vua mo dou nona tamata mo dou talairawarawa vua, dou sa nona tamata lia dou sa talairawarawa kinia; se ki na caka cala mo dou mate kinia, se ki na caka dodonu mo dou vadonui kinia? ¹⁷ Ia me ia na vavinavinaka vua na Kalou, ni dou sa muria, mai na vu ni yalomudou, koi ikodou ka bobula ki nai valavala ca, nai varau ni vavuvuli dou sa vavulici kinia. ¹⁸ `Ia ni dou sa qai sereki mai nai valavala ca, dou sa qai qaravia nai valavala dodonu. ¹⁹ Au sa vosa lia vatamata, ni sa malumalumu na yagomudou: ia me vaka dou a solia eliu na veitikimudou me ra qaravia na ka dukadukali, kei nai valavala ca me levu kinia na ca; mo dou qai solia vaka kinia na vitikimudou me ra qaravia na ka dodonu me caka kinia na ka savasava. ²⁰ Ni dou a bobula tiko kinai valavala ca, dou sa yawa tu ki nai valavala dodonu. ²¹ Ia ka cava na vuana dou sa rawatia, e na gauna ko ya, mai na veika dou sa qai madua kinia? ni sa kenai otioti ni veika koya na mate. ²² Ia dou sa qai sereki mai nai valavala ca, ka yacovia me tamata ni Kalou, dou sa qai rawatia na vuana enai valavala savasava, kei nai otioti na bula tawa mudu. ²³ Ni sa kenai sau ni valavala ca na mate: ia sai solisoli loa lia ni Kalou na bula tawamudu, e na vukui Jisu Karisito na noda Turaga.