¹ O koya koya era sa yali kinia ni lewai me cudruvi ko ira era sa tu vata ki Karisito Jisu, era sa yali ni muria tiko nai tovo vayago, era sa muria lia na Yalo Tabu. ² Ni sa sereki au mai na vunau ni ca kei na mate, na vunau ni Yalo ni bula vei Karisito Jisu. ³ Ia ni sa yali rawarawa ki na vunau, ni sa malumalumu ena vuku ni tovo vayago, sa qai lewa na Kalou me mate na ca e na yago, ni sa tala na luvena ena i tovo ni yago sa tu kinia na ca, ka mei soro ni valavala ca: ⁴ me caka rawa kinia nai valavala dodonu ni vunau, ni da sa yali ni muria tiko nai tovo vayago eda sa muria lia na Yalo: ⁵ ni ra sa gadrevia na veika vayago ko ira era sai tovo vayago; ia na veika vayalo ko ira era sai tovo vayalo. ⁶ Ni sa vuni mate na gadrevia nai tovo vayago; ia sa vu ni bula kei na vacegu na gadrevia na tovo vayalo. ⁷ Ni sa veimecaki kei Kalou nai tovo vayago: ni sa yali ni varogocia na vunau ni Kalou, ia sa dredre sara me vakinia. ⁸ Ia ko ira sai tovo vayago, era sa yali ni caka rawa na ka e vinaka vua na Kalou. ⁹ Ia sa yali ni vayago na nomudou i tovo, sa vayalo lia, kevaka sa dina ni tiko e na lomamudou na Yalo ni Kalou. Ia kevaka sa dua na tamata sa yali ni tiko e lomana na Yalo i Karisito, sa yali ni nona o koya koya. ¹⁰ Ia kevaka sa tiko e na lomamudou na Karisito, sa dina lia sa mate na yago e na vuku ni valavala ca; ia na yalo sa bula e na vuku ni veivadonui. ¹¹ Ia kevaka sa tiko vadua e lomamudou na Yalo i koya sa vaturi Jisu cake voki mai na mate, o koya sa vaturi Karisito voki mai na mate, ena vabula voki na yagomudou sa mate rawa, e na Yalona sa tiko vadua e na lomamudou. ¹² O koya, ikodou na veiwekani, eda sa yali kinia ni vauci ki nai tovo vayago, me da muria nai tovo vayago: ¹³ ni dou na mate kevaka dou sa muria nai tovo vayago; ia kevaka sa veivuke ki ikodou na Yalo Tabu me vaotia nai valavala vayago, dou na bula kinia. ¹⁴ Ia ko ira lia sa tuberi ira na Yalo ni Kalou era sa luve ni Kalou. ¹⁵ Ni dou sa yali rawatia voki na Yalo ni bobula mo dou rere; ia dou sa rawatia na Yalo Tabu dou sa vabauti kinia me gone, o koya eda sa kaci kinia, Apa, Tamada. ¹⁶ A Yalo koya sa tukunia mai ki na yaloda, ni da sa luve ni Kalou: ¹⁷ ia kevaka eda sa gone, eda na qai taukei; eda na taukenia na veika ni Kalou, eda sai taukei vata kei Karisito; kevaka eda sa vosotia vata kaya na ca, eda na vakalougatataki vata kaya voki lia. ¹⁸ Ni'u sa vaka sa yali ni yaga me rau vatautauvatanitakia na ka ca sa vosotia e na bula koya kei na kalougata ena varairaitakia vei ita e muri. ¹⁹ Ni sa gadrevia valevu o vuravura ka wawa tiko lia me ra varairaitaki ko ira na luve ni Kalou. ²⁰ Ni sa vamalumalumutaki ko vuravura me ca, a sa yali ni vinakatia, e na vuku i koya lia sa vamalumalumutakia, ni sa vanuinui tiko, ²¹ ni na serekia voki lia ko vuravura mai na kena vabobulataki ki na rusa, ka me lalaga tu ka vaiukuukutaki vata kei ira na luveni Kalou. ²² Ni da sa kila, sa vutugu vata ko vuravura taucoko, ka sa yaluma e na rarawa, ka yacovia na siga koya. ²³ A sa yali ni koya lowa lia, o ita voki lia, eda sa rawatia nai sevu ni Yalo Tabu, e da sa vutugu tiko e lomada ni sa warakia meda vabautia me gone, ni na vabulai na yagoda. ²⁴ Ni da sa bula e na nuinui: ia nai nuinui sa bale ki na ka sa qai raicia sa yali ni nuinui dina: ni sa nuitakia vacava na tamata na ka sa qai raicia? ²⁵ Ia kevaka eda sa nuitakia na ka eda sa yali ni raicia, eda sa vosotia lia me warakia tiko. ²⁶ Ia na Yalo Tabu voki lia sa vukea na noda malumalumu: ni da sa yali ni kila na ka e kilikili kei ita me da kerea: a sa masulaki ita na Yalo Tabu e na vutugu e yali ni cavuti rawa. ²⁷ Ia ko koya sa dau dikevia na yaloda sa kila na loma ni Yalo Tabu, ni sa masulaki ira na tamata lotu me vaka na loma ni Kalou. ²⁸ Ni da sa kila sa veivuke na ka kece lia me ra vinaka kinia era sa lomania na Kalou, ko ira sa kacivi me vaka na ka sa nakiti oti. ²⁹ Ia ko ira kece sa kilai ira e liu ko koya, sa lesi ira eliu me ra tautauvata kei na luvena, me ulumatua kinia ko koya vei ira na tacina era lewe vuqa: ³⁰ ia ko ira sa lesi ira eliu ko koya, sa qai kacivi ira ko koya, sa vadonui ira: ia ko ira sa vadonui ira ko koya, sa vaiukuukutaki ira. ³¹ A cava me da qai tukunia ena veika koya? Kevaka sa totaki ita na Kalou, o cei me noda meca? ³² Ena vaevei ko koya sa yali ni bureitakia na Luvena dina, ia sa soli koya yani me sosomitaki ita kece lia, ena dredre vacava vua me solia loa lia vi ita na ka kece lia vata kaya? ³³ O cei me beitaki ira sa digitaki ira na Kalou? Na Kalou sa vadonuya. ³⁴ O cei ena lewa me ra cudruvi ? O Karisito Jisu lia sa mate, io, sa bula cake voki , a sa tiko voki lia e na liga i matau ni Kalou, ka sa masulaki ita. ³⁵ O cei me na tawasei ita mai na loloma i Karisito? a ka rarawa li, se na yaluma, se na dauveivacacani, se na dausiga, se na televua, se na dauveivarerei, se nai selewau? ³⁶ Me vaka na ka sa volai, E na vukumunu kitou sa vamatei kinia e na siga taucoko ka bogi: Kitou sa vatauvatani kei na sipi ena vamatei. ³⁷ E yali, e na ka kece lia koya eda sa gumatua kinia, e na vuku i koya sa lomani ita. ³⁸ Ni'u sa kila vaidina, ni na yali ni rawatia na mate, se na bula, se ko ira na agilose, se ko ira na liu, se ko ira sa kaukauwa, se na veika sa yaco e daidai, se na veika ena yaco emuri, ³⁹ se na ka cecere, se na ka titobu, se dua tani na ka, me tawasei ita mai na loloma ni Kalou, sa yaco e na vuku i Karisito Jisu na noda Turaga.