Sa raicia ko Joni e dua nai vola sa dregati tu, a sa yali e dua e tevuka rawa, sa qai cecegia ka tevukia na Lami, a ra sa vavinavinaka vua na kai lomalagi, 1-14.
1
Au a qai raici koya sa tiko e nai tikotiko-vaturaga ka tauria nai vola na ligana i matau, ko ya sa volai eloma e dakuna voki lia, sa dregati tu e na drega e vitu.
2
Au a raicia na agilose kaukauwa voki lia, o koya sa kaci e na domo levu, ka tukunia, O cei sa yaga me tevukia nai vola, ka cecegia na kena drega?
3
A sa yali e dua mai lomalagi, se e vuravura, se e ruku i vuravura, sa rawata me tevuka nai vola, se rai kinia.
4
Ia ka'u a tagi valevu, ni sa yali ni kune e dua e yaga me tevukia nai vola, se rai kinia.
5
Sa qai tukunia vi au e dua na qase, Mo kakua ni tagi: raicia, sa gumatua na Laioni ni yavusa i Juta, na Waka i Tevita, me tevukia nai vola me cecegia voki lia na kena drega e vitu.
6
Au a qai raicia e loma ni tikotiko-vaturaga ki na kedratou maliwa na ka bula e lewe va, ki na kedratou maliwa na qase, e dua na Lami sa vaka sa qai vamatei, e vitu na nonai leu e uluna, ka vitu na matana, o iratou lia koya na Yalo ni Kalou e lewe vitu eratou sa talai ki vuravura taucoko.
7
A sa qai mai ko koya ka yadia nai vola mai na liga i matau i koya sa tiko e nai tikotiko-vaturaga.
8
Ni sa yadia nai vola ko koya, sa cuva sobu e na mata ni Lami ko iratou na ka bula e lewe va, ki ira na qase e lewe ruasagavulu ka va era tauyadua na api, ki na vibilo koula sa sinai e na ka boi vinaka, koya na nodra masu na tamata yalosavasava.
9
Era sa meketakia na meke vou, ka tukunia, Oi ikonu sa yaga me yadia nai vola, me cecegia voki lia na kena drega: ni ikonu a vamatei, ka voli kimamu e na nomuni dra maivi ira kece lia na vimataqali, ki na duivosavosa, ki na vimatanitu, ki na vivanua, me kimamu nona na Kalou:
10
ia ikonu sa lesi kimamu me kimamu tui, me kimamu bete voki lia, vua na nimamu Kalou; ia kimamu na lewa tiko e vuravura
11
Au a qai raicia, ia ka'u a rogocia na domo ni agilose e lewe levu, o ira era sa vavolivolitia nai tikotiko-vaturaga, ki iratou na ka bula ki ira na qase: ia na kedrai wiliwili sa oba vatini na udolu, ka levu voki na udolu;
12
era sa tukunia e na domo levu, Sa yaga na Lami ka vamatei, me soli vua na kaukauwa, ki nai yau, ki na vuku, ki na qaqa, ki na vidokadokai, ki na varokoroko, ki na vavinavinaka.
13
Ia kau a rogocia na ka bula kece mai lomalagi, ki vuravura, ki na ruku i vuravura, ki na wasawasa, ki na ka kece lia sa tu kinia, ni ra tukunia, Me caka vua sa tiko e nai tikotiko-vaturaga, vi koya voki lia na Lami, na vavinavinaka, ki na varokoroko, ki nai ukuuku, ki na kaukauwa, ka yali ni mudu.
14
Ka ratou sa vaemeni ko iratou na ka bula e lewe va. A ra sa cuva sobu ko ira na qase e lewe ruasagavulu ka va, ka varokoroko vi koya sa bula tiko lia ka yali ni mudu.