Sa tukunia ko Joni na ka valomalagi eso sa raicia, 1-11.
1
Sa oti koya ka'u sa qai raicia voki, ka raicia, sa dola e dua na darava mai lomalagi: ia na vosa taumada ka'u a rogocia sa vaka sa vosa vi au na davui; ka tukunia, Qai cake mai ki ke, au na vatakila vi iko na ka ena yaco e na gauna maimuri.
2
Sa qai curumi au vasauri na Yalo Tabu: ka raicia, sa caka nai tikotiko-vaturaga mai lomalagi, a sa dua sa tiko kinia.
3
Ia ko koya sa tiko kinia, sa rairai me vaka na vatu jasipa ki na satiusa: a sa dua na drodrolagi sa vavolivolitia nai tikotiko-vaturaga, sa rairai me vaka na emeralita.
4
Era sa tuva wavokitia tu na i tikotiko vaturaga e ruasagavulukava voki na i tikotiko vaturaga, ka ra dabe toka kinia e lewe ruasagavulukava na qase era sa vaisulu vulavula ka tokaria na i sala koula e uludra.
5
A sa basikia mai na i tikotiko vaturaga na tibi ni liva, na rorogo domo i levu, ki na vadugu ni kurukuru. A sa caudre tu ena mata ni tikotiko vaturaga e vitu na cina, ka sa dusia ko ya na Yalo ni Kalou e vitu.
6
A sa tu voki lia ena mata ni tikotiko vaturaga e dua na ka sa vaka na wasa iloilo, sa makare sara me vaka na karisitala. E ratou sa tiko wavolitia na i tikotiko vaturaga sa toka e lomadonu o iratou na veika bula e va, ka sa sinai tu na yaloka ni mata ena yagodratou mai liu ka vakinia mai dakudratou.
7
Ia sa vaka na laioni nai matai ni ka bula, a sa vaka na luve ni pulumokau nai karua, a sa mata vatamata nai katolu, a sa vaka na ikeli vatabana nai kava.
8
O iratou koya na ka bula eratou sa lewe va eratou sa tauyaono na tabadratou; a sa robotia na lomadratou na matadra; ia eratou sa yali ni bau cegu e na siga se na bogi, era tukunia tiko lia, E dodonu, e dodonu, e dodonu, na Turaga na Kalou Kaukauwa, o koya ka bula eliu, ka sa bula edaidai, ena bula voki lia emuri.
9
Ia ni ratou sa varokoroko ko iratou na ka bula ko ya vi koya sa tiko e nai tikotiko-vaturaga, o koya sa bula yali ni mudu, ka ratou sa dokai koya, ka vavinavinaka vua,
10
sa qai cuva sobu ko ira na qase e lewe ruasagavulu ka va e na mata i koya sa tiko e nai tikotiko-vaturaga, ka varokoroko vi koya sa bula lia ka yali ni mudu, ka dainia na nodra i sala e na mata ni tikotiko-vaturaga, ka tukunia,
11
Ikonu na nitou Turaga ki na nitou Kalou, sa dodonu me caka vi ikonu na varokoroko ki na vidokadokai, ki na kaukauwa: ni sai ikonu ka bulia na ka kece lia, era sa buli lia ka tu dei voki lia e na nomuni lewa.