E ono na drega ni vola sa cecegia na Lami, 1-17.
1
Ia ka'u a raicia ni sa cecegia e dua na drega na Lami, ia ka'u a rogocia e dua vi iratou na ka bula e lewe va, sa vaka na kurukuru na domona, ka tukunia, Qai mai.
2
Ka raicia, au a qai kunea na ose vulavula: ia sa tauria na dakai titi ko koya sa vodo tiko kinia; a sa soli vua e dua nai sala-vaturaga; a sa qai yani ko koya e na gumatua, ka me gumatua valevu.
3
IA ni sa cecegia ko koya nai karua ni drega, au sa rogocia nai karua ni ka bula sa tukunia, Qai mai.
4
A sa dua tani voki na ose sa qai yani, sa damudamu: a sa soli vua sa vodo tiko kinia me dainia tani e vuravura na sautu, ka me ra viraravui tiko lia: a sa soli vua nai seleiwau levu.
5
IA ni sa cecegia ko koya nai katolu ni drega, au sa rogocia nai katolu ni ka bula sa tukunia, Qai mai. Ia ka'u a raicia, ka raicia, sa dua na ose loaloa; ia ko koya sa vodo tiko kinia, sa tauria nai varau e na ligana.
6
Au a rogocia e dua na domo e na kedratou maliwa na ka bula e lewe va, sa tukunia, Me volitakia nai varau witi e na dua na pene, ka tolu nai varau parile e na dua na pene; ka raicia mo kakua ni vacacana na waiwai se na waini.
7
IA ni sa cecegia ko koya nai kava ni drega, au sa rogocia nai kava ni ka bula sa tukunia, Qai mai.
8
Ia ka'u a varaicia, ka raicia, sa dua na ose vulavula ca: ia na yaca i koya sa vodo tiko kinia ko Mate, ka sa muri vata kaya ko Etesi. A sa soli vua me rawa nai kava ni kena wase ko vuravura, me vamatei e nai seleiwau, ki na viakana, ki na mate ca, ki na manumanu kila ki vuravura.
9
IA ni sa cecegIa ko koya nai kalima ni drega, au sa raicIa e ruku ni cabocabo-ni-soro na yalodra era a vamatei e na vuku ni vosa ni Kalou, ki na vuku ni nodra i tukutuku;
10
era sa kaci e na domo levu, ka kaya, sa vaevei na kena dede, na Turaga yalododonu ka dina, ni ko sa yali ni lewa ka cudruvakia na nimamu dra vi ira era sa tiko e vuravura?
11
A sa soli vi ira yadua nai sulu vulavula; a sa kainaki vi ira, me ra cegu tiko mada valailai, me oti mada mai ko ira na nodra i tokani ki na wekadra, era na vamatei mada me vataki ira.
12
IA ka'u sa raicia ni sa cecegia ko koya nai kaono ni drega, ka raica! sa tavuki vakalevu na vanua: a sa loaloa sara na mata-ni-siga me vaka nai sulu vutika ni manumanu loaloa, a sa liadra na vula;
13
a sa qeqera ki vuravura na vikalokalo ni lomalagi, e vaka na lolo sa qeqera na vuana ni sa yali ni dreu, ni sa kurea na cagi kaukauwa.
14
A sa qai tani yani na lomalagi me vaka nai vola balavu sa vivigi vata; a sa kau tani mai na nodra i tutu na ulu-ni-vanua kece lia ki na yanuyanu kece lia.
15
Ia ko ira na tui ki vuravura, ki na tamata era kena turaga, ki na tamata vutuniyau, ki ira na vu-ni-valu, ki ira na tamata qaqa, ki ira kece na bobula, ki ira kece lia nai taukei, era sa vunitaki ira e na viqara ki na viuluvatu e na viulu-ni-vanua;
16
a ra sa tukunia ki na viulu-ni-vanua ki na viuluvatu, Lutuki kimamu, ka vunitaki kimamu mai na mata i koya sa tiko e nai tikotiko-vaturaga, mai na nona cudru voki lia na Lami:
17
sa qai yaco mai na siga dina ni nona cudru; ia ko cei ena yatedei me na tu dei rawa?