Sa vatakila ko Jisu na ka eso sa kalougata kinia na tamata, 1 - 12. Sa vavulici ira na nona tamta me ra yaga, 13 - 16. Sa vadinadinataka na vunau makawa, 17 - 20. Sa tukunia na kenai balebalebdina na laba, 21 - 26; kei na dauyalewa, 27 - 32. Sa vavulici ira na nona tamata me ra kakua ni bubului ena veivosaki 33 - 37; me ra kakua ni visausaumitakia na ca, 38 - 42: ka me ra lomani ira lia na nodra meca, 43 - 48.

1 Ia ni sa raicia na lewe vuqa ko konu, sa cabe ki na ulunivanua; ia ni sa tiko sobu, sa qai mai ikonu ko ira na nona tisapeli: 2 a sa vosa ko koya, ka vavulici ira, ka tukunia: 3 Sa kalougata ko ira sa yalomalumalumu: ni sa nodra na matanitu valomalagi. 4 Sa kalougata ko ira sa dautagi: ni ra na vacegui. 5 Sa kalougata ko ira sa yalomalua: ni ra na taukena na vanua. 6 Sa kalougata ko ira sa viakana ka viagunuvia nai valavala dodonu ni ra na vamaumautaki. 7 Sa kalougata ko ira e dauloloma: ni sa na lomani. 8 Sa kalougata ko ira sa yalosavasava: ni ra na raicia na Kalou. 9 Sa kalougata ko ira sa dau tataro; ni ra na vatokai me luve ni Kalou. 10 Sa kalougata ko ira era sa dau vacacani ena vuku ni valavala dodonu: ni sa nodra na matanitu valomalagi. 11 Dou sa kalougata, ni dou sa vasewasewani, ka vacacani, ka vosavacacataki vailasu e na kakecega e ca, ena vukuqu: 12 dou reki, ka marau valevu: ni sa levu na kenai sau vei kimudou mai lomalagi: ni sa va koya na nodra vacacani ira na parofita era sa bula eliu vei kimudou. 13 Oi kimudou na masima kei vuravura; ia kevaka sa seavu mai na masima na kena tuituina, ena vatuituinataki tale ena cava? sa qai yali ni yaga e dua na ka, me dai lia ki tautuba, ka me butuka sobu ko ira na tamata. 14 Oi kimudou na rarama kei vuravura. Na koro sa tara toka e na ulu-ni-vanua sa yali ni tabonaki rawa. 15 Sa yali voki lia ni tutuvaki na cina, ka me qai toka e ruku ni varau ni sila, e na kenai tutu lia; sa qai cinavi ira kece lia sa tiko e vale. 16 Me caudre va kinia na nomudou rarama e na matadra na tamata, me ra raicia na nomudoui valavala vinaka, ka varokorokotaka na Tamamudou sa tiko mai lomalagi. 17 Dou kakua ni vasama niu sa qai mai meu vaotia na vunau, se na nodra vavuvuli na parofita; au sa yali ni qai mai meu vaotia, meu vayacora voki lia. 18 Ni'u sa tukunia vaidina vei kimudou, Ena takali mada ko lomalagi kei vuravura, ia ena yali ni takali mai na vunau e dua na mata-ni-vola lailai se dua na tikina lailai sara, ena yaco mada lia na ka kece. 19 O koya ena vatokai kinia me lailai sara na matanitu valomalagi, ko koya yadua ena talaidredre mai na vunau koya sa lailai sara, ka vatavuvuli kinia vei ira na tamata; me levu ena matanitu valomalagi. 20 Niu sa tukunia vei kimudou, Kevaka sa yali ni uasivi cake na nomudoui valavala dodonu e na nodra na vunivola kei ira na Farisi, dou sa yali sara ni curu kinia na matanitu valomalagi. 21 Dou sa rogocia ni sa kainaki vei ira eliu, Mo kakua ni laba; ia ko koya ena laba, ena cudruvi koya na mataveilewai; 22 ia ko konu , ka'u sa tukunia vei kimuodou, O koya yadua sa cudru walega vua na wekana, ena cudruvi koya lia na mataveilewai: ia ko koya ena vosavacacataka na wekana, ni sa beitakia me ca, ena cudruvi koya na mataveilewai levu: ia ko koya ena rurulialiataki koya, ena cudruvi e na bukawaqa mai eli. 23 O koya, kevaka ko sa yadia na nomui madrali ki nai cabocabo ni soro, a sa nanumia mai kinia sa dua na ka sa beitaki ikonu kina na wekamu; 24 dainia tu na nomui madrali e na mata ni cabocabo ni soro, ka mo qai, mo drau vivinakati mada eliu ki na wekamu, mo qai mai ka vacabora na nomui madrali. 25 Kusarawa mo drau vivinakati kaya sa beitaki ikonu, ni drau sa qai vata kaya e na gaunisala; de soli ikonu ko koya sa beitaki ikonu vua na turaga-ni-lewa, ka soli konu vua na turaga-ni-lewa vua na ovisa, ko na qai biu ki na vale ni veivesu. 26 Au sa tukunia vakaidina vei konu, O na yali sara ni sereki maikinia, ko na saumia kece mada nai lavo. 27 Dou sa rogocia sa kainaki vei ira eliu, Mo kakua ni dauyalewa: 28 ia ko konu, au sa tukunia vei kimudou, O koya yadua ena raicia na yalewa me dodomo kinia, sa dauyalewa oti kaya e lomana. 29 Ia kevaka sa vacalai ikonu na matamu i matau, vecuka tani, ka dainia tani vei ikonu: ni sa vinaka vei ikonu me yali laivi e dua na tikimu, ka me kakua ni dai ki eli na yagomu taucoko. 30 Ia kevaka sa vacalai ikonu na ligamu i matau; muduka tani; ka dainia tani vei iko; ni sa vinaka vei ikonu me yali laivi e dua na tikimu, ka me kakua ni dai na yagomu taucoko. 31 Sa kainaki voki lia, Ko koya sa dainia tani na watina; me solia vua nai vola ni veibiu: 32 ia koi au, ka'u sa tukunia vei kimudou , Ko koya sa dainia na watina, ke sa yali ni dautagane, sa vavuna na nona dautagane; ia ko koya erau sa viwatini kaya sa dai, sa dauyalewa. 33 Dou sa rogocia voki lia, ni sa tukunia vei ira eliu, Mo kakua ni bubului vailasu, ia mo vayacoria vua na Turaga na ka ko sa bubului kinia. 34 ia koi au, kau sa tukunia vei kimudou, Dou kakus sara ni bubului: kakua. ki lomalagi, ni sa i tikotiko vaturaga ni Kalou: 35 kakua ki vuravura; ni sai tutu-ni-yavana: kakua, ki Jerusalemi; ni sa nona koro na Tui levu. 36 Mo kakua ni bubului ki na ulumu; ni ko sa yali ni vukicia rawa e dua na drauna me vulavula se loaloa. 37 Ia me io, na io, me yali na yali, na nomudou vosa; ia na ka sa levu cake, sa tubu e na ca. 38 Dou sa rogocia sa kainaki, Me kenai sau ni mata na mata, ka me kenai sau ni bati na bati, 39 Ia koi au, kau sa tukunia vei kimudou, Dou kakua ni visausaumitakia na ca: ia kevaka e dua sa sabicia na balumu i matau, golea voki lia na kena i karua. 40 Ia kevaka e dua sa via yadi ikonu vei ira na mataveilewai, ka me yadia tani na nomui curucuru, dainia me yadia tani voki lia na nomui tutuvi. 41 Ia kevaka e dua sa vasaurarataki ikonu mo drau qai voki lia e dua na maili, drau qai lia na kena i karua. 42 Solia vua sa mai kerekere vei ikonu, ia kakua ni vuki tani vua sa via kerea mada e dua na nomu ka. 43 Dou sa rogocia sa tukuni lia, Mo lomana na wekamu, ka cata na nomu meca: 44 ia koi au, ka'u sa tukunia vei kimudou, Dou lomani ira na nomudou meca, vosavinaka vei ira sa rulaki kimudou, caka vinaka vei ira sa cati kimudou, ka masulaki ira sa valialiai kimudou, ka vacacani kimudou; 45 mo dou luvena na Tamamudou sa tiko mai lomalagi; ni sa vacabea ko konu na nona matanisiga vei ira na tamata ca kei ira voki lia na tamata vinaka, a sa vatauca mai na uca vei ira na tamata yalododonu, kei ira voki lia na tamata tawa yalododonu. 46 Ia kevaka dou lomani ira sa lomani kimudou, a cava ena kimudoui sau? era yali lia ni cakava va koya ko ira sa kumunia na vacavacava? 47 Ia kevaka dou vikidavaki duadua lia kei ira na wekamudou, a cava dou sa uasivi cake kinia? era yali lia ni cakava va koya ko ira na lewe ni veimatanitu tani? 48 O koya lia mo dou qai vinaka sara, me vaka voki lia sa vinaka sara na Tamamudou sa tiko mai lomalagi.