Sa dauveretaki Jisu na tevoro, 1 - 11. Sa laki tiko ki Kapenanumi ko Jisu, 12 - 16. Sa dauvunau ko Jis; a sa kacivi Pita, kei Adriu, kei Jemesa kei Joni, me ratou nonai talatala, 17 - 22. Sa veilakoyaki ko Jisu me vunau ka vabulai ira na mate, 23 - 25.
1
Sa qai yadi Jisu i colo na Yalo Tabu ki na vikau, me dauveretaki koya na tevoro.
2
Ia ni sa lolo ko koya ena siga e vasagavulu kei na bogi e vasagavulu, sa qai vikana.
3
A sa qai mai vei koya na dauvere, ka tukunia, Kevaka ko sa Luve ni Kalou, mo tukunia mada me vuki mei buli madrai na veivatu koya.
4
A sa vosa ko koya, ka tukunia, Sa volai, Ena yali ni bula na tamata e na madrai duaduaga, sa bula ga e na vosa kece lia sa qai mai na gusu ni Kalou.
5
Sa qai yadi koya na tevoro ki na koro tabu, ka vatikori koya ki dela ni vale ni soro,
6
a sa tukunia vua, Kevaka ko sa Luve ni Kalou mo rika sobu: ni sa volai, Ena varoti ira na nona agilosi ko koya ena vukumu: Ia era na keveti konu e na ligadra, De dua na siga sa tavutu kinia na yavamunu ki na vatu.
7
Sa tukunia vua ko Jisu, Sa volai tale kinia, Mo kakua ni vatovolei Jiova na nomu Kalou.
8
Sa yadi koya voki lia na tevoro kina dua na ulunivanua cecere sara, a sa varaitakia vei konu na matanitu kece lia e vuravura, kei na kedrai ukuuku;
9
a sa tukunia vua, A ka kece lia oqori kau na solia vei konu, kevaka ko na cuva sobu ka varokoroko vei au.
10
Sa qai tukunia vua o Jisu, Mo qai tani, Setani, ni sa volai, Mo varokoroko vei Jiova na nomu Kalou, ia mo qaravi koya duadua lia.
11
Sa qai daini koya na tevoro, ka raicia , sa qai mai eso na agilosi ka qaravi koya.
12
Ia ni sa rogocia ko Jisu sa dai ki na vale ni veivesu ko Joni, sa qai tale ki Kalili;
13
a sa daini Nasareci, ka sa qai tiko vadua ki Kapenanumi, o koya sa tu lia e na baravi, e nai yalayala kei Spuloni kei Nafitalai:
14
me vayacori kinia na vosa sa tukunia ko Aisea na parofita, ka tukunia,
15
A vanua ko Sepuloni, kei na vanua ko Nafitalai, E na yasayasa ni wai, e na tai kadua ni Joritani, ko Kalili ni vimatanitu tani,
16
Ko ira lia na tamata ka tiko ena butobuto, Era sa raicia na rarama levu; Ia vei ira voki lia ka tiko ena vanua ni mate kei na yaloyalo sa cabe cake voki lia na rarama.
17
Mai na gauna lia ko ya sa vatekivu kinia ko Jisu me dauvunau, ka tukunia, Dou vivutuni! ni sa voleka na matanitu valomalagi.
18
A sa qai voli ko Jisu ena baravi mai Kalili, a sa raicia e le rua erau vitacini, ko Saimoni sa vatokai ko Pita, kei Adriu na tacina voki lia, erau sa viritakia na lawa ki wai: ni rau sa gonedau.
19
A sa qai tukunia vei rau ko koya, Drau muri au mai, kau na qisi kimudrau mo drau gonedau ni tamata.
20
A rau sa dainia sara lia na nodrau lawa, ka muri koya
21
A sa qai tani maikea ko konu vaka kiliu, a sa raicia e le rua voki lia erau vitacini, ko Jemesa na luve i Sepete, kei Joni na tacina, eratou sa toka vata kei Sepete na tamadrau mai waqa, a rau sa oneva na nodratou lawa; a sa kacivi rau voki lia.
22
A rau sa dainia sara na waqa kei na tamadrau, ka muri ikonu.
23
A sa vilakoyaki voli e Kalili taucoko ko Jisu, a sa vatavuvuli ena nodra veivale ni lotu, a sa vunautakia nai tukutuku vinaka ni matanitu, a sa vabulai ira na tamata mai na mate kece lia, kei na malumalumu voki lia.
24
A sa rogovaki kinia na kenai rogorogo ki Siria taucoko: a sa yadi vi konu ko ira kece lia na sa tauvimate, era sa tauvi ena mate tani eso kei na yaluma, kei ira lia sa curumi ira na tevoro, kei ira voki lia sa tauvi lialia, kei ira sa tauvi paralasi; a sa vabulai ira o konu.
25
A ra sa lewe vuqa sara sa muri koya mai Kalili, vei Tikapoli, kei Jerusalemi, kei Jutia, kei na tai kadua lia ni Joritani.