Sa dauvunau mai Jutia ko Joni na dauveipapitaiso, a sa papitaisotaki ira na lewe vuqa, 1 - 12. Sa papitaisotaki Jisu ko koya, 13 - 17.
1
Ia ena gauna ko ya sa qai mai ko Jonina dauveipapitaiso, ka dau vunau e lomai ni vanua mai Jutia,
2
ka tukunia, Dou vivutuni! ni sa voleka na matanitu valomalagi.
3
O koya oqo sa vosa kinia ko Aisea na parofita, ka tukunia, A domona e dua sa kacikaci e loma ni vanua, Dou caramaka na sala i Jiova, Cakava me dodonu na nona salatu.
4
Ia ko Joni oqo, sa vakaisulu e nai sulu vuti ni kameli, ka vau na tolona e na wa kuli - ni - manumanu; ka sa kena kakana na vodre kei na oni ni vikau.
5
A sa qai mai vua ko ira mai Jerusalemi kei Jutia taucoko, kei na yasana taucoko sa voleka ki na Joritani,
6
a sa papitaisotaki ira ko konu e na Joritani, ni ra sa vatusa tiko na nodrai valavala ca.
7
Ia ni sa raicia sa lewe vuqa na Farisi kei nai tokani i Setoki, era sa qai mai ki na nona papitaiso, sa tukunia vei ira, Oi kimudou na kawa ni gata, ko cei sa vasalataki kimudou mo dou dro tani mai na cudru, sa qai tiko mai?
8
o koya mo dou vuataka na vua e kilikili kei na vivutuni.
9
ia dou kakua ni nanumia mo dou tukunia e lomamudou, A tama i kimamu ko Eparama: niu sa tukunia vei kimudou, e rawarawa vua na Kalou me vatubura na veivatu koya me ra luve i Eparama.
10
Ia na matau sa no edaidai e na vu ni kau; ka sa ta laivi kinia na kau kece lia sa yali ni vuatakia na vua vinaka, a sa dai ki na bukawaqa.
11
E dina kau sa papitaisotaki kimudou e na wai ni dou sa qai vivutuni: ia ko koya lia ena muri au mai sa levu cake vei kirau, ia na nona vava kau sa yali ni yaga meu yadia: ena papitaisotaki kimudou ko konu ena Yalo Tabu kei na bukawaqa:
12
a sa tu lia e ligana na nonai sivi ni sila, ka sa na vasavasavataka sara o konu na sila ni nona rara, ka binia vata lia na nona sila ki na lololo; ka sa vakama ko konu na qana ena bukawaqa e yali ni bokoci rawa.
13
Sa qai mai Kalili ko Jisu ki na Joritani vei Joni, me papitaisotaki vei ikonu.
14
A sa via tarovia ko Joni, ka tukunia, Sa yaga lia vei au mo ni papitaisotaki au, ia koi kemunu o ni sa qai voki lia mai vei au?
15
A sa vosa ko Jisu, ka tukunia vua, Mo vosotia mada edaidai; ni sa kilikili kei ita me da vakabautia vaka koya nai valavala dodonu kece lia. Sa qai vosotia ko ikonu.
16
Ia ko Jisu, ni sa papitaisotaki oti, sa cabe sara lia mai na wa: ka raicia, sa qai wase rua vua na lomalagi, a sa raicia ko konu na Yalo ni Kalou ni sa qai sobu mai me vaka na ruve, ka sa mai ro toka lia vua.
17
ka raicia, sa dua na domo mai lomalagi, sa tukunia, O koya lia koya na noqu Gone ni toko, au sa dauvinakata valevu.