Sa vavulici ira na nona tamata ko Jisu, e na i loloma, 1 - 4; e na masu, 5 - 15; e na lolo, 16 - 18. Sa varota me ra kakua ni daulomana na ka vavuravura, 19 - 23; se lomaocaoca, 24 - 34.

1 Dou raici kimudou vinaka mo dou kakua ni kitakana nomudoui loloma e na matadra na tamata, me ra raici kimudou kinia; kevaka e vaka koya, ena yali na kimudoui sau mai vua na Tamamudou sa tiko mai lomalagi. 2 Ko koya lia koya , ni ko sa kitaka lia na loloma, mo kakua ni uvuca na davui e matamu, me va lia era dau kitaka na dauvivakaisini e na vei vale ni lotu kei na veigaunisala, me ra dokai kinia vei ira na tamata. Au sa tukunia vaidina vei kimudou , Sa tu ga vei ira na kenai sau. 3 Ia ko konu, ni o sa soli ka ni loloma, me kakua ni kila lia na ligamu i mawi na ka sa kitaka na ligamu i matau. 4 me vuni kinia na nomui loloma: ia na Tamamu sa raicia na ka e vuni, ena saumia votu vei ikonu. 5 Ia ni ikonu sa masu, mo kakua ni vataki ira na dauvivakaisini: ni ra sa vinakatia me ra tu e na veivale ni lotu kei na veitutu-ni-sala ni ra masu, me ra raicia kinia ko ira tamata. Au sa tukunia vaidina vei kimudou, Sa tu lia vei ira na kenai sau. 6 Ia ko ikonu, ni konu sa masu, curu ki na nomu loqi, ia ni ko sa sogotia na kena katuba, masu vua na Tamamu sa tabogo; ia na Tamamu sa raicia na ka e vuni ena sauma votu vei ikonu. 7 Ia ni dou sa masu, kakua ni vosa balabalavu lia, me vataki ira na tawa lotu; ni ra sa nanumia era na rogoci lia ni ra sa vosa balabalavu. 8 O koya mo dou qai kakua ni vataki ira; ni sa kila eliu na Tamamudou na ka sa yaga vei kimudou, a sa muri na nomudou kerekere vua. 9 O koya mo dou qai masu va koya: Tama i kimami mai lomalagi, Me varokorokotaki na yacamunu. 10 Me yaco na nomunu lewa. Me caka na lomamunu e vuravura me vaka lia sa caka mai lomalagi. 11 Solia mai vi kimami ena siga koya na kakana e yaga vei kimami. 12 Ia kakua ni cudruvi kimami e na vuku ni neimamu valavala ca, me vaka kimamu sa yali ni cudruvi ira era sai valavala ca vi kimami. 13 Ia kakua ni yadi kimami ena vere, ka mo ni vabulai kimami mai na ca: Ni sa nomunu na lewa, kei na kaukauwa kei na varokoroko, ka yali ni mudu. Emeni. 14 Ia kevaka dou sa yali ni cudruvi ira na tamata sa caka cala, ena yali voki lia ni cudruvi kimudou na Tamamudou valomalagi: 15 Ia kevaka dou sa cudruvi ira lia na tamata sa caka cala, ena cudruvi kimudou voki lia ena vuku ni nomudou caka cala na Tamamudou. 16 Ia ni dou sa lolo, kakua ni vaveveku mata me vataki ira na dauvivakaisini; ni ra sa vatani taka lia na matadra, me rairai vei ira tamata na nodra lolo. Au sa tukunia vaidina veikimudou, Sa tu lia vei ira na kenai sau. 17 Ia ko ikonu, ni konu sa lolo, lumutia na ulumu, ka tavoya na matamunu: 18 me kakua ni rairai kinia vei ira na tamata na nomu lolo, vua lia na Tamamu sa tabogo: ia na Tamamu sa raicia na ka sa vuni ena saumia votu vei ikonu. 19 Dou kakua ni kumunia vata vei kimudou nai yau e vuravura, e dau vacacana kinia na sarasara kei na veveka, a sa ravabasuka kinia na daubutako me butakocia: 20 ia mo dou kumunia vata, na nomudou yau mai lomalagi, sa yali ni vacacani kina na sarasara se na veveka, a sa yali ni ravubasuka kinia na daubutako me butakocia: 21 ni na tiko voki lia na yalomudou e na yasana sa tiko kinia na nomudoui yau. 22 A cina ni yago na mata; o koya ke sa vinaka na matamunu, ena rarama kinia na yagomu taucoko. 23 Ia kevaka e ca na matamu, ena butobuto na yagomu taucoko. Ia kevaka sa butobuto na rarama sa tu e lomamu, ena vavei na kena levu ni butobuto ko ya! 24 Sa yali e dua na tamata sa qaravia rawa e le rua na turaga; ni na cata e dua, ka lomani koya kadua; se na kabita e dua, ka beci koya kadua. Dou sa yali ni qaravia rawa na Kalou kei na yau. 25 O koya lia kau sa tukunia kinia vi kimudou, Mo dou kakua ni lomaocaoca e na vuku ni nomudou bula, e na ka mo dou kania, se na ka mo dou gunuvia: se e na vuku ni yagomudou, e na ka mo dou vasulu kinia. Sa ka levu na bula, na kakana na ka lailai, se yali? a yago tale voki lia na ka levu, a ka lailai nai sulu, se yali? 26 Dou raicia na manumanu vuka; ni ra sa yali ni dauveikabukaburaki, se dautamusuka, se daukumunia vata ki na lololo; a sa vakani ira na Tamamudou valomalagi. Dou sa yali beka ni yaga vakalevu cake vei ira? 27 Ia ko cei vi kimudou, ni sa lomaocaoca, sa rawarawa me vakuria valailai lia na siga ni nona bula? 28 Ia dou sa lomaocaoca vacava e na vuku ni sulu? Dou vananumia na viavia ni veikau, era sa tubu vakaevei: era sa yali ni daucakacaka, se dautali: 29 ia ka'u sa tukunia vi kimudou, o Solomoni e na nonai ukuuku kece lia sa yali ni vaisulu me vaka lia e dua vei ira koya. 30 Ia kevaka sa vasuluma va koya na Kalou na co ni veikau, ka tu edaidai, a sa dai ki na lovo e na mataka ena yali lia ni gu valevu cake me vasulumi kimudou, koi kimudou sa lailai na nomudou vabauta? 31 O koya mo dou qai kakua ni lomaocaoca, sa tukunia, A cava eda na kania? se, A cava eda na gunuvia? se, A cava eda na vaisulu kinia? 32 ni sa dau vasaqara na ka kece lia ko ira na lewe ni vivanua: ni sa kila na Tamamudou valomalagi sa yaga lia vi kimudou na ka kece lia koya. 33 ia dou vasaqarataumada na matanitu ni Kalou, kei na nona yalododonu: ia ena soli me kenai kuri vei kimudou na ka kece voki lia koya. 34 O koya mo dou qai kakua ni lomaocaoca na mataka: ena lomaocaoca na mataka e na vuku ni kena ka. Sa rautia na siga na kena ca. 46 Ia ka vakaevei ni dou sa kacivi au, "Turaga, Turaga", ka yali ni caka na ka au sa tukunia? 47 O koya yadua sa qai mai vi au, ka rogocia na noqu vosa, ka muria, au na vatakila vei ikodou na tamata e rau sa tautauvata kaya. 48 E rau sa tautauvata ki na tamata sa tara e dua na nona vale, ni sa kelia va titobu, ka tauyavutakia e na dela ni vatu: ia ni sa yaco na waluvu, sa coka vakaukauwa na vale gona na dobui, a sa yali ni yavalati rawa: ni sa tauyavutaki e na dela ni vatu.