¹ Ia ni sa vaojia na nona vosa kece lia o Jisu ni ra sa varorogo jiko e lelevu, sa qai curu ki Kapenaumi. ² Sa dua na turaganivalu sa tauvimate e dua na nona tamata cakacaka ka dau lomania, ia ka sa voleka sara ni mate. ³ Na gauna e rogocia kinia nai tukutuku ki Jisu na turaganivalu, sa tala sara ko koya e dua na matua ni Jutia, me vamasuti koya me mai vabula lia na nona tamata. ⁴ Na gauna lia ira yaco vi Jisu, ira sa vamasuti koya valevu, a tukunia sara ni yaga o koya, mo ni caka kinia na ka koya. ⁵ Ni sa lomania na nona matanitu, a sa tara o koya na nimamu valenilotu. ⁶ Sa mani qai vata kei ira ko Jisu. Ia ni voleka i vale ko koya, sa tala eso na wekana na turaganivalu, mera tukunia vua, Ikonu na Turaga, ni kakua ni vaceguocataki ikonu, niu sa yali yaga mo ni curu ki na noqu vale. ⁷ Au sa yali voki lia ni nanumia au, niu yaga meu qai vi iko: Ia mo ni tukunia lia na vosa ena bula kinia na noqu tamata. ⁸ Niu sa turaga lailai oi au, au sa lewa na sotia au sa tukunia vua, Mo qai yani, a sa qai yani; vi koya e dua tani, Mo qai mai, a sa qai mai, vi koya na noqu tamata, mo caka koya, a sa caka ⁹ Ia ni sa rogocia na ka kece lia o Jisu, sa kurabuitaki koya; sa vuki vi ira na lewe levu sa muri koya. A tukunia, Au sa tukunia vi ikodou, Au sa yali raicia vi ira na Isireli e dua na vabautia vakoya. ¹⁰ Ia ni sa lesu voki i vale, o ira sa talai, ira sa raicia na tamata a tauvimate ni qai bulabula vinaka ¹¹ Ena raiyavi, sa qai o koya ki na dua na koro na yacana o Neini, a ra sa levu na nona tisaipeli ira sa qai vata kei ira voki lia na lewe levu. ¹² Ia ni sa toro voleka ki na matamata ni koro, raicia sa dua sa colati ki nai bili, a luvei tinana e dua bau lia, a sa yada o koya, a ra sa lewe levu na lewe ni koro era qai vata kaya. ¹³ Ia ni raici koya na turaga, sa lomania, a tukunia vua, Kakua ni tagi. ¹⁴ A sa qai ko koya ka tara na vatavata, a ra sa tu vadua o ira na cola, A sa tukunia ko koya, Ko iko na cauravou, au sa tukunia vi iko, Tucake. ¹⁵ A sa duri cake na mate ka vatekivu me vosa. A sa solia ko koya vi tinana ¹⁶ A ra sa rere ko ira kece lia a ra sa varokorokotakia na Kalou, a tukunia, Sa qai tubu cake vi ita e dua na parofita levu; a sa qai mai na Kalou kivei ira na nona tamata. ¹⁷ Ia na kena i rogorogo sa kuruseti Jutia kece lia ki na yasana kece lia sa wavolitia. ¹⁸ A sa vatakila vi Joni na ka kece lia ko ya ko ira na nona tisaipeli. ¹⁹ A sa kacivi rau na lewe rua na nona tisapeli, o Joni, ka talai rau vi Jisu me tukunia, Oi ikonu beka o koya e qai mai, se da warakia e duatani voki? ²⁰ Ia ni rau sa yaco vua, e rau sa tukunia, sa talai kirau mai vi ikonu o Joni na dau vipapitaisotaki me tukunia, Oi ikonu beka o koya a qai mai se da warakia voki e duatani? ²¹ Ia ena tiki ni siga koya era sa lewe levu sa vabulai o koya mai na mate kei na rarawa, ka mai vi ira na yalo ca; a ra sa lewe levu sa mataboko sa lewa o koya mera rai rawa. ²² Sa qai vosa ko Jisu ka tukunia vi rau, Drau qai, ka tukunia vi Joni na veika drau sa raicia ka rogocia, ni ra sa rai na mataboko, na vukavuka, sa roro na didivara, sa vaturi cake voki na mate, sa vunautakia nai tukutuku vinaka vi ira na dravudravu. ²³ A sa kalougata ko koya ena yali ni tacaqe ena vukuqu. ²⁴ Ia ni rau sa qai voki ko irau ka tala o Joni, sa tukunia o koya vi ra na lelevu ena vuku i Joni. A cava dou a qai via ki veikau mo dou raicia? na gasau lia sa yavala ena cagi. ²⁵ ia ka cava mo dou a qaivia mo dou raicia na tamata sa vaisulu vaiukuuku, ka dau kana vinaka era sa tiko ena vivale vaturaga. ²⁶ Ia ka cava mo dou a qai via mo dou raicia? a parofita? io au sa tukunia vi ikodou, e dua sa uasivia na parofita. ²⁷ Sa i koya ka volai vaka ko ya: Raicia, au sa tala yani na noqui talatala me liutaki iko. Ena caramakia ko koya na nomu sala e matamu. ²⁸ Niu sa tukunia vi ikodou, vi ira sa sucu mai na yalewa sa yali na parofita sa uasivi cake vi Joni na daunivipapitaisotaki: ia o koya sa lailai sara ena matanitu ni Kalou sa uasivi vi koya. ²⁹ Ia ko ira kece lia na tamata ena rogocia, kei ira na daukumunia na i vacavacava, era sa vadinadina vua na Kalou, ka ni ra sa papitaisotakia ena papitaiso ni Joni. ³⁰ Ia o ira na Farisi vata kei ira voki lia na vu-ni-vunau, era sa catia na ka sa nakitia na Kalou ena vukudra, a ra sa yali ni papitaisotaki vua. ³¹ A sa tukunia na Turaga, A cava meu vatautauvatataki ira kinia na tamata ena i taba tamata koya? se ra tautauvata beka kei na cava? ³² Era sa tautauvata kei ira na gone ira sa tiko ena rara ni vivoli, ka vikaciyakia, ka tukunia, dou a yali ni meke: kitou a tagi vi kodou, ka dou a yali ni tagi yaso. ³³ Sa qai mai ko Joni na daunivipapitaisotaki, ka yali ni daukana madrai, dausomi waini, ia dou sa tukunia. Sa tiko vua e dua na tevoro. ³⁴ Sa qai mai na luve ni tamata, a sa kana ka somi, ia dou sa tukunia, Raicia, a tamata dau kana ka dau somi waini, a nodra itau era kumunia nai vacavacava kei na tamata i valavala ca. ³⁵ Ia sa vadonuya na vuku ko ira kece lia na luvena. ³⁶ A sa kerei koya e dua na Farisi me kana vata kei koya. A sa curu kina vale ni Farisi o koya ka tiko sobu me kana. ³⁷ Ka raicia sa dua na yalewa ena koro, o koya sa yalewa i valavala ca, ni sa kila sa tiko o koya ena vale ni Farisi me kana, sa yadi tani mai e dua na tavaya alapasita sa tawa ena i lumu. ³⁸ a sa tu mai dakuna i yavana, a tagi, a sa quarakia ena drau ni uluna, a sa regucia na yavana ka lumutia ena i lumu. ³⁹ Ia ni sa raicia na Farisi a sureti koya, sa nanumia lia i lomana, a vaka, Kevaka sa parofita o koya koya, sa kila na yalewa ke sa tarai koya, kei na nona i valavala voki lia; ni sa yalewa i valavala ca. ⁴⁰ A sa vosa o Jisu ka tukunia vua, I Saimoni, sa dua na ka au sa via tarogia vi iko. A sa tukunia o koya, vavuvuli, mo tukunia lia mai. ⁴¹ Sa dua na turaga, sa lewe rua na tamata erau sa dinau vua, e dua, sa lima na drau na pene na nona dinau, e dua voki sa limasagavulu. ⁴² Ia ni sa yali na nodratou ka me rau saumia kinia, sa serekia loa lia vi rau ruarua. Mo tukunia mada mai se ko cei vi rau ena lomani koya valevu. ⁴³ Sa saumia ko Saimoni ka tukunia, "Au sa vakasama, o koya sa levu cake na ka sa serekia vua. A sa tukunia vua ko koya, "Ko sa lewa vadododnu." ⁴⁴ A sa vuki vaka vua na yalewa o koya, ka tukunia vi Saimoni. Ko sa raicia na yalewa koya? Au sa curu ki na nomu vale ka yali na wai ko solia me vui kinia na yavaqu: ia sa vuya na yavaqu ko koya ena wai ni matana, a sa quwarakia ena drau ni uluna. ⁴⁵ Ko sa yali ni reguci au; ia ko koya gona sa yali ni cegu ni regucia na yavaqu niu tiko gona. ⁴⁶ Ko sa yali ni lumutia na uluqu ena waiwai; ia ko koya gona sa lumutia na yavaqu ena i lumu. ⁴⁷ Ko koya koya kau sa tukunia kinia vi iko, A nona i valavala ca sa levu sa boko sara lia, a sa loloma valevu kinia ko koya, ia ko koya sa lailai lia na nona ka sa bokocia sa loloma valailai ⁴⁸ Sa qai tukunia vua na yalewa o koya, Sa bokoci na nomu i valavala ca. ⁴⁹ Ia o ira era sa tiko vata kaya me kana era sa tukunia vakai ira, O cei koya sa bokocia voki lia nai valavala ca. ⁵⁰ A sa tukunia o koya vua na yalewa, Sa vabulai iko na nomu vabauta, mo qai ena vacegu.