¹ Sa oti sa qai voki e muri o koya ena vikoro kece lia ki na vi koro lalai kece lia, ka vunau ka tukunia na i tukutuku vinaka ni matanitu ni Kalou kei ira vata kaya na lewe tinikarua, ² kei na yalewa eso, sa vabulai oti mai na yaloca eso ka curumi ira ki na malumalumu, ko Meri sa vatokai na yalewa ni Makitala, sa qai tani oti vua e vitu na tevoro, ³ kei Joana na wati Kusa na matanivanua nei Eroti vata kei Susana, ka lewe levu voki era sa qaravi koya e na nodra i yau. ⁴ Ia ni sa lewe levu sara era soqoni vata, sa qai mai vi koya mai na vi koro, sa vosatakia na vosa vatautauvata; ⁵ Sa dua na dau teitei sa kaburakia na nona sore ni sila; ia ni sa kaburakia tiko, sa lutu eso ena tutu ni sala, sa butubutukia sobu, a ra sa mai kania na manumanu vuka. ⁶ A sa lutu eso ki na vatu; sa tubu cake, qai raqosa sara, ni sa yali ni suasua. ⁷ A sa lutu eso ena loma ni vi wa-vavotona; a sa tubu cake kaya na vi wa-vavotona, ka varugutia. ⁸ A sa lutu eso ena vanua vinaka, a sa tubu cake ka vuatakia e drau na vuana. Ni sa vosatakia oti ko koya na veika koya, sa kacivakia, Ko koya sa va daligana me rogocia me mani rogocia sara. ⁹ A sa vatarogi koya ko ira na nona tisaipeli ka tukunia, A cava beka nai balebale ni vosa va tautauvata koya? ¹⁰ A sa tukunia o koya, sa soli vi ikodou mo dou kila na veika vuni ni matanitu ni Kalou; ia sa nodra na tani na vosa va tautauvata lia; me ra raicia, ka yali ni raicia, ka raicia ka yali ni kila. ¹¹ Ia na vosa vatautauvata sa vaka koya, na sila, na vosa ni Kalou. ¹² Ia ko ira ka vaka na tutu ni sala, ko ira sa rogocia; sa qai mai na tevoro, sa yadia tani na vosa mai na yalodra, de ra vadinatia ka bula kinia. ¹³ Ia ko ira sa vaka na vatu, sa ira sa rogocia, ka vabautia na vosa ena reki; ia sa yali na wakadra, a ra sa vadinatia vadede valailai lia, ia ni sa yaco na gauna ni dau veretaki, era sa bale voki. ¹⁴ Ia o koya sa lutu i na vi wa-vavotona, sa ira sa rogoca, era sa qai yani, era varuguti ena loma ocaoca vata ki nai yau vata ki na marau ni na bula koya, ki na vuadra sa yali kinia na matua dina ¹⁵ Ia ko koya ena vanua vinaka sa vakai ira sa yalodina ka vinaka,a ra sa rogocia na vosa, ka tauria dei ka vavuana tiko lia. ¹⁶ Sa yali na tamata sa tutuvakia na cina, ka qai ubia ena ruku se dainia e ruku ni mocemoce; a sa dainia lia ena kena i tutu, me ra raicia na kena rarama ko ira sa curu mai. ¹⁷ Ni sa yali e dua na ka sa vuni, me yali ni varairaitakia; se tabogo, me yali ni kilai se vavotui mai. ¹⁸ Koya mo dou qarauni ikodou, ena nomudou rogocia ni sa dua na ka sa tu vua e dua na tamata, ena qai soli vua; ia na tamata sa yali ni tu vua e dua na ka ena qai yadi tani mai vua na ka sa nanumia sa tu vua ¹⁹ Sa qai mai vua na tinana kei iratou na tacina, eratou sa yali ni toro rawa mai vua ena vukudra na lewe levu. ²⁰ A sa tukunia ko iratou eso, ka tukunia, sa tu e tuba na tinamu vata kei ratou na tacimu, eratou sa via raici iko. ²¹ a sa vosa ko koya ka tukunia vi ira, A tinaqu kei na taciqu ko ira koya, a ra sa rogocia na vosa ni Kalou ka caka. ²² Ia sa dua na siga koya, sa vodokia ko koya e dua na waqa vata kei ira voki lia na nona tisepeli; a sa tukunia vi ira ko koya, tou qai ki tai kadua ni drano. A ra sa qai yani. ²³ Ia ni ra soko, sa moce ko koya; sa qai sobu mai na cava ena drano; era sa luvu tiko ka voleka ni mate. ²⁴ A ra sa qai mai ka vayadrati koya, ka tukunia, ikonu na turaga, ikonu na turaga, edatou sa na mate. Sa qai tucake ko koya, ka vunaucia na cagi kei na wai cudrucudru; ka rau sa cegu kinia, a sa maravu sara. ²⁵ A sa tukunia vi ira ko koya, sai vi na nomudou vabautia? A ra sa rere ka kurabui ka vitukuniyakia vaka ira, Ko cei beka koya; sa varotia na cagi kei na wai, a rau talairawarawa vua? ²⁶ A ra sa yaco na nodra vanua na kai Katara, sa donui Kalili. ²⁷ Ia ni sa sobu ki vanua ko koya, sa sota vata e dua na tamata mai nakoro, sa tiko va dede vua eso na tevoro, sa dau yali ni vaisulu, se tiko i vale, i nai bulubulu lia. ²⁸ Ia ni sa raici Jisu, sa kaikaila cake, ka cuva sobu vua, ka tukunia e na domo i levu, a cava vi kidaru, I Jisu na luve ni Kalou cecere sara? Au sa vamasuti ikonu mo kakua ni vararawataki au. ²⁹ Ni sa tukunia oti ko koya vua na tamata yalo velavela me qai tani vua na tamata; ni sa tauvi koya valevu; a sa vesu tiko ko koya ena sinucodo kei na i vesu me tauri kinia; a sa musulakia na i vesu , sa tovoci koya na tevoro ki veikau. ³⁰ A sa tarogi koya ko Jisu, ka tukunia, Ko cei na yacamu, A sa tukunia ko koya; ko Vavakoso; ni ra sa lewe levu na tevoro sa curumia taudua, ³¹ a ra sa vamasuti koya me kakua ni tukunia vi ira me ra qai yani ki bulu. ³² Sa dua na qele ni vuaka ena ulunivanua ka ra sa masuti koya me daini ira me ra curumi ira. A sa daini ira ko koya. ³³ A ra sa qai tani mai vua na tamata na tevoro, a ra sa curumi ira na vuaka, a ra sa cicivia sobu kece sara lia na baba na qele ni vuaka ki na drano ka ra luvu kinia. ³⁴ Ia ko ira sa vakania, ni ra sa raicia na ka sa yaco, era sa tuba, ka qai tukunia ena koro kei na viyasana ki vanua. ³⁵ A ra sa qai yani me ra raicia na ka sa caka, a ra sa yaco vi Jisu, ka raicia na tamata, sa qai tani vua ko ira na tevoro, ni sa tiko e na yava i Jisu, ka sa vaisulutaki, ka yalomatua; a ra sa rere. ³⁶ Ko ira voki lia era raicia, era sa tukunia vi ira na ka sa bula kinia ko koya ka curumia lia ko ira na tevoro. ³⁷ Sa ra qai masuti koya o ira kece lia na lewe ni yasana o Katara me qai tani vi ira: ni sa kani ira na rere levu: a sa vodokia na waqa ko koya ka lesu voki yani. ³⁸ Na tamata ka qai tani vua na tevoro sa masuti koya me dani koya me rau tiko vata kaya: ³⁹ mo lesu voki ki na nomu vale, ka tukunia na kena levu ni veika sa caka vi iko na Kalou. A sa qai ko koya, ka tukunia ki na koro koya na kena levu ni veika sa caka vua o Jisu. ⁴⁰ Ia ni sa lesu voki ko Jisu, era sa vacegui koya ko ira na tamata: ni ra sa waraki koya ko ira kece lia. ⁴¹ Ka raicia sa dua na tamata ko Jairo na yacana, e dua na turaga ni valenilotu, sa qai mai ka cuva sobu ki na yavai Jisu, ka vamasutia me qai ki na nona vale, ⁴² ni sa dua loa lia na luvena yalewa, e tinikarua na nona yabaki, a sa voleka ni mate. Ia ni sa qai ko koya era sa drigiti koya na lewe levu. ⁴³ Ka dua na yalewa sa turivi dra balavu ka yabaki tinikarua, sa vaotia vi ira na vuniwai na ka kece lia sa tu vua me bula kinia, a sa yali ni bula vua e dua. ⁴⁴ sa qai mai dakuna, tara na nona tutu ni sulu: sa mudu vasauri kinia nai davedave ni nona dra. ⁴⁵ Sa tukunia ko Jisu ko cei sa tarai au? Ia ni ra sa qai tukunia kece lia, ni ra sa yali ni kila, sa tukunia o Pita kei ira sa tiko vata kei iratou ikonu na Turaga, sa vaososoi ikonu na lewe levu era sa vidrigidrigiti, ia ko ni sa tarogia, o cei sa tarai au? ⁴⁶ A sa tukunia ko Jisu sa dua sa tarai au: niu sa kila sa qai tani vi au na kaukauwa. ⁴⁷ Ia ni sa kila na yalewa sa yali ni vuni, sa qai mai ka sautaninini, ka cuva sobu vua, ka tukunia e matadra kece lia na lewe levu na ka sa tarai koya kinia, ki na nona bula vasauri kinia. ⁴⁸ A sa tukunia vua ko koya, na luvequ yalewa, mo vacegu: sa vabulai iko na nomu vabautai: mo qai ena vacegu. ⁴⁹ Ni sa vosa tiko ko koya, sa qai mai e dua mai na vale ni turaga ni valenilotu, ka tukunia, sa mate na luvemu yalewa: kakua ni vaocatakia na i vavuvuli. ⁵⁰ Ia ni sa rogocia ko Jisu, sa vosa vua, ka tukunia, kakua ni yalolailai: vadinatia lia ena qai vabulai lia o koya ⁵¹ Ia ni sa curu i vale o koya, sa yali ni vatara e dua me curu kinia, ko iratou lia o Pita vata kei Jemesa vata kei Joni vata ki na tama ni goneyalewa vata kei na tinana. ⁵² A ra sa tagi kece lia, ka tagicakia: a sa tukunia o koya, kakua ni tagi; sa yali ni ciba ko koya, sa moce lia. ⁵³ A ra sa dredrevaki koya ni ra sa kila sa ciba ko koya. ⁵⁴ Sa tovoci ira kece lia i tuba, tara na ligana, ka kaci, ka tukunia, ko iko na gone duri cake. ⁵⁵ A sa lesu voki mai na yalona, a sa duri cake sara: a sa tukunia me soli vua e dua na kena. ⁵⁶ A rau sa kurabui sara na nona matua: a sa varotia vi rau ko koya me rau kakua ni tukunia vua e dua na ka sa caka.