¹ Ia ena dua na siga ni vacecegu, sa tu o koya e loma ni viwere ni sila; sa ra dolokia na visola ni sila na tisaipeli, sa ra qilirakia e ligadra ka ra kania. ² Eso vi ira na farisi sa ra tukunia vi ira, a cava dou sa caka e na siga ni vacecegu. ³ Sa qai vosa ko Jisu ka tukunia vi ira, dou sa yali beka ni wilikia na ka koya, na ka caka o Tevita ni sa via kana o koya ki ira sa tu vata. ⁴ Ni sa curu o koya i na vale ni Kalou, sa tauria cake na madrai dauraici, ka wasea voki lia vi ira era tiko; ko gona sa yali ni tauria mera kania na tani ka tauria dua loa lia vi ira na bete. ⁵ Sa tukunia vi ira o koya, sa Turaga voki lia ni siga ni vacecegu na luve ni tamata. ⁶ Ia sa dua voki na siga ni vacecegu, sa curu o koya i valenilotu ka vatavuvuli: ni sa tiko voki lia kinia e dua na tamata sa malai na ligana i matau. ⁷ Sa ra raici ko ira na Farisi ke sa caka na vivabulai ena siga ni vacecegu se yali, me ra vadinadinataki na ka era beitaki koya kinia. ⁸ Ni sa kila na nodra vakasama ko koya, sa tukunia sara vua na tamata sa malai na ligana, mo duri mai ka tu ena kedra maliwa. Sa qai duri tu e na kedra maliwa. ⁹ Sa qai tukunia vi ira ko Jisu, au na tarogi ikonu e dua na ka: sa rawa beka ni caka na ka vinaka na siga ni vacecegu, se ka ca? Me caka kinia na vivabulai, se vivamatei. ¹⁰ Sa qai rai wavokiti ira kece lia o Koya, sa qai vosa vua na tamata me dodokia mai na ligana, sa caka vakinia: A sa vabulai na ligana, sa va voki lia kinia na ligana kadua. ¹¹ Sa qai kuri lia ni nodra cudru: Era sa qai vivosakitakia vakai ira, se cava mada mera caka vi Jisu. ¹² Ena siga gona, sa qai, ko koya i na ulunivanua me masu, ni sa masu tiko vua na Kalou ena bogi ka lai siga mai. ¹³ Ia ni sa siga mai, sa kacivi ira na nona tisaipeli, sa qai digitakia e lewe tinikarua ka vatokai ira mei apositolo. ¹⁴ O Saimoni ko koya sa vayacania voki lia ko koya me Pita vata kei Adriu na tacina, o Jemesa vata kei Joni, o Filipi vata kei Pacolomiu. ¹⁵ O Maciu vata kei Tomasi, o Jemesa na luvei Alifio vata kei Saimoni sa vatokai na gumatua. ¹⁶ O Jutasa na taci Jemesa vata kei Jiutasa Isikarioti, o koya ka soli koya yani. ¹⁷ A sa qai sobu vata kei ira o koya, ni sa tu e na buca, ni sa lewe levu sara na nona tisaipeli, vata na tamata ka ra sa levu sara mai Jutia taucoko ki Jeruisalemi, kei na baravi kei Taia vata kei Saitoni, ni sa ra qai mai me rogoci koya, ka me ra vabulai voki lia mai na nodra mate. ¹⁸ Kei ira voki lia sa vacacani mai na yalo velavela eso; ni sa ra vabulai. ¹⁹ Ni ra sa saga kece lia o ira na tamata me ra tarai koya: ni sa vu mai vua na kaukauwa mana, ni sa qai ra vabulai kece lia. ²⁰ Sa qai soqoni ira na nona tisaipeli ka tukunia, dou sa kalougata na dravudravua; ni sa nomudou na matanitu ni Kalou. ²¹ Dou sa qai kalougata o ikodou sa via kana ni kua: ni dou na vamamautaki. Dou sa kalougata, koi ikodou sa tagi ni kua, ni dou na dredre. ²² Dou sa kalougata ni ra sa cati ikodou ko ira na tamata, ni ra sa vatabui ikodou, ka vasesewani ikodou, ka varogocatakia na yacamudou, ena vuku lia ni luve ni tamata. ²³ Dou maraua ena siga gona, ka rika ena marau: raicia, sa levu na kenai sau vi ikodou mai lomalagi: era sa caka vakinia ko ira nodra matua vi ira na parofita. ²⁴ ia dou na ca, koi ikodou sa vutuniyau! ni dou sa qai rawatia lia na nomudou vacegu. ²⁵ Dou na ca, koi ikodou sa mamau! ni dou na viakana. Dou na ca, koi ikodou sa dredre ni kua! ni dou na rarawa ka tagi. ²⁶ Dou na ca, ni sa vavinavinakatakia ikodou o ira kece lia na tamata! Ni ra sa caka voki lia kinia o ira na matua qase vi ira na parofita vailasu. ²⁷ Ni'u sa tukunia vi ikodou sa rogocia, lomani ira nomudou meca, ka caka vinaka vi ira sa cati ikodou. ²⁸ Me vinaka na nomudou vosa vi ira ka rulaki ikodou, ka qai masulaki ira sa valialia ikodou. ²⁹ Kevaka e dua sa sa sabicia na balumu e dua, solia voki vua na balumu ka dua: ka mo kua sara ni bureitakia na nomui curucuru vi koya sa yadia tani nomu kote. ³⁰ Ia mo solia vi ira kece lia ka mai kerekere vi iko; ka mo kakua sara ni tarogia voki na nomu yau vi koya sa yadia tani. ³¹ Ia me vaka dou sa vinakatia mera caka vi ikodou na tamata, dou caka voki lia kinia vi ira. ³² Ia kevaka dou lomani ira sa lomani ikodou. O cei me vavinavinaka vi ikodou? Ia o ira na tamata i valavala ca era sa lomani ira sa loloma vi ira. ³³ Ke dou sa caka vinaka vi ira lia sa caka vinaka vi ikodou, o cei me vavinavinaka vi ikodou? Ni sa cakacaka va kinia o ira sa tamatai valavala ca. ³⁴ Ia kevaka dou sa solia me tara mada lia vi ira ni dou sa vanuinui rawatia voki lia mai kinia, o cei me vavinavinaka vi ikodou? Ni sa solia voki lia ko ira na tamata ca vi ira voki na tamata ca, me ra rawatia voki lia na ka tautauvata. ³⁵ Ia mo dou lomani ira na nomudou meca, ka caka vinaka, ka soli-me-tauri ni dou sa yali nakitia me rawatia voki e dua na ka; ena levu kina na kenai sau vi ikodou, ia dou na luve i Koya sa cecere sara: ni sa lomasoli ko koya vi ira era sa yali vavinavinaka ka valavala ca. ³⁶ O koya mo dou qai yalololoma, me vaka sa yalololoma na Tamamudou. ³⁷ Ia dou kakua ni daulelewa, dou na qai yali lewa: Dou kakua ni vi beitakia ni dou na qai yali beitaki: Dou kakua ni cudruvia na tamata, ni dou na qai yali cudruvi. ³⁸ Mo dou solia, ka na qai soli vi ikodou; nai varau vinaka, ka tabakia sobu, ka qai kureitakia vata, ka vuable, era sa solia na tamata i na lomaseremudou. Ia nai varau dou sa varautakia, ena qai varautaki voki vi ikodou. ³⁹ Ni sa tarogi ira ko koya e na dua na vosa vatautauvata: E rawa beka vua na mataboko me tuberia voki e dua na mataboko? Ni rau na yali beka ni lutu ruarua i nai keli? ⁴⁰ Sa yali ni dua na tisaipeli me uasivi vua na nona vavuvuli: ia o koya yadua ka sa yaco me vinaka sara, e rau na qai tautauvata ki na nona vavuvuli ⁴¹ Ia ka vaevei ni ko sa raicia na malamala ena matai wekamu, ka ko sa guilecavia na kau sa tu e matamu? ⁴² Se ko na tukunia vacava vua na wekamu, i na wekaqu, dainia meu leutia tani mada na malamala sa tu e matamu, ia o sa yali raicia na kau sa tu e matamu. O na qai raicia vinaka ka leutia na malamala sa tu ena matai wekamu. ⁴³ Ni sa yali dua na kau vinaka me vuataki na kau ca; se na kau ca me vuatakia na vua vinaka. ⁴⁴ Ni sa kilai na kau kece lia ena vuana. Sa yali ni veti na lolo mai na wa-vavotona, se veti na vua-ni-vaini mai na wa-gadrogadro. ⁴⁵ A tamata vinaka sa yadia mai na ka vinaka mai na lololo vinaka ni lomana: ki na tamata ca sa yadia mai na ka ca mai na lololo ca ni lomana. Ni sa vosatakia na gusuda na ka sa oso valevu kinia na lomada. ⁴⁶ Ia ka vaevei ni dou sa kacivi au, "Turaga, Turaga", ka yali ni caka na ka au sa tukunia? ⁴⁷ O koya yadua sa qai mai vi au, ka rogocia na noqu vosa, ka muria, au na vatakila vi ikodou na tamata e rau sa tautauvata kaya. ⁴⁸ E rau sa tautauvata ki na tamata sa tara e dua na nona vale, ni sa kelia va titobu, ka tauyavutakia ena dela ni vatu: ia ni sa yaco na waluvu, sa coka vakaukauwa na vale gona na dobui, a sa yali ni yavalati rawa: ni sa tauyavutaki ena dela ni vatu. ⁴⁹ Ia ko koya sa rogocia ka yali caka na ka au tukunia, sa tautauvata na tamata sa tara e dua na vale e na dela ni soso, ka yali ni dua na kena yavu; a sa coka vakaukauwa na dobui, a sa lutu sara kinia; ia na ka levu na kena rusa na vale gona.