¹ Ena dua na gauna ni sa tucake sara tu lia o Jisu ena yasa ni drano ko Kenisareti, era visugusugu yani na tamata mera rogocia na Vosa ni Kalou. ² A sa raicia e rua na waqa, sa vesu tu ena yasa ni drano, ia eratou yali ni tu kinia na kena i taukei. ³ A sa vodokia e dua na waqa a nei Saimoni, a sa tukunia, me tosoi yani valailai ki wai. A sa tiko sobu o koya i waqa, ka vavulici ira na lelevu era muri koya voli. ⁴ Ia ni sa vaotia na nona vosa, sa tukunia vi Saimoni, "Toso yani ki wai titobu, ka dou viritakia sobu na nomudou lawa me rawa ni levu na ika e rawa mai kinia. ⁵ A sa saumia ka tukunia ko Saimoni, "Vavuvuli kitou a qoli tiko ena bogi taucoko ka yali ni rawa e dua na ka, ia na vuku lia ni nomuni vosa kitou sa na balatia voki na lawa." ⁶ Ia na gauna eratou sa caka oti kinia na ka ka tukunia viratou o Jisu, sa levu sara na ika eratou sa rawa mai, ka voleka voki ni bote na nodratou lawa. ⁷ Eratou sa kacivi iratou na nodratou i tokani eratou jiko ena waqa ka dua, me ratou mai vivuke vi iratou. Eratou sa qai mai ka vatawana na waqa ruarua ka voleka ni dromu. ⁸ Ia ni sa raicia ko Saimoni Pita, sa cuva sobu ki na yava i Jisu, ka tukunia, munu qai tani vi au na Turaga, niu sa tamata i valavala ca. ⁹ Ia ni sa kurabui o koya kei ira kece ka ra tu vata kaya ena vuku ni levu ni ika sa qai rawa. ¹⁰ Sa vakinia o Jemesa vata kei Joni, na luvei Sepete, ka rau i tokani kei Saimoni. A sa tukunia o Jisu vi Saimoni, "Mo kakua ni rere, baletia me tekivu ni kua ka qai yani o na dau qolivi ira na tamata. ¹¹ Ia ni ratou sa yadia ruarua na waqa ki vanua, eratou sa daini sara tu na kece, ka muri koya. ¹² Ia ni sa tiko ena dua na koro ko koya, sa tiko kinia e dua na tamata sa roboti koya na vukavuka. Ia ni sa raici Jisu, a sa cuva vatoboicu ka vamasuti koya, ka tukunia, "Turaga, kevaka sa rawa mo ni vasavasavataki au." ¹³ A sa dodo yani na ligana ka tarai koya, ka tukunia, "Au sa vinakatia sara lia mo savasava mai." A sa vabulai sara mai na nona vukavuka. ¹⁴ A sa varotia vua me kakua ni tukunia vua e dua , ia, mo qai lia ka varaitaki iko vua na bete ka caboria na nomu i soro mo vasavasavatakia kinia, me vaka na vosa nei Mosese me vadinadina vi ira. ¹⁵ Ia, na kena i rogorogo sa rogovaki vayawa sara, a sa lewe levu sara era sa soqoni vata mai mera mai rogoci koya, ka ra vabulai voki lia mai nai vauni mate. ¹⁶ A sa qai sara yani o koya ki na vanua lala ka masu ¹⁷ Ia ni sa vatatavuvuli tiko ko koya ena dua na siga, ka ra sa tu voleka vakinia eso na Farisi vata ki na Vunivola ni lawa, o ira koya era qai mai na koro ko Kalili vaka voki lia kinia mai Jiutia mai Jerusalemi. A sa tu vua na kaukauwa ni Turaga me vabulai ira. ¹⁸ Ia na gauna koya sa ra colati koya tiko ena i mocemoce e dua na tamata tauvi paralasi, ka vaqara e dua na sala me ratou curumaki koya kinia i loma ni vale ka ratou daini koya ena mata i Jisu. ¹⁹ Eratou sa mani kabatakia cake e dela ni vale ka vatukutukutakia sobu ki na mata i Jisu, ena kedra maliwa na tamata. ²⁰ Ni sa raicia o Jisu na nodratou vabautia, sa qai tukunia vua, "Sa bokoci na nomu i valavala." ²¹ A ra sa tekivu vaqaqa i lomadra o ira na vunivola vata kei ira na Farisi, ka ra tukunia, "O cei koya sa mai vosa vacacatakia na Kalou, e yali voki ni dua e rawa ni bokocia rawa na Kalou dua loa lia?" ²² Ia ni sa qai kila o Jisu na nodra vanananu, sa saumia ka tukunia vi ira, "Na cava dou sa vaqaqa tiko kinia e lomamudou na ka koya. ²³ Na cava e rawarawa cake, me tukuni, 'Sa bokoci na nomu i valavala ca' se me tukuni, Tucake ka qai'? ²⁴ Me rawa ni dou kila kinia ni sa tu na kaukauwa vua na Luve ni Tamata e vuravura me bokocia na i valavala ca," -sa qai tukunia vua tamata tauvi paralasi-"Au sa tukunia vi iko, mo tucake, tauria na nomui mocemoce ka qai i nomu vale" ²⁵ A sa tucake sara o koya e matadra, ka tauria cake na nomu i mocemoce o davo tu kinia. Ia, sa qai sara yani kina nona vale, vacecerea na Kalou. ²⁶ Era sa kidacala kece lia, ka varokorokotakia na Kalou; ka sa yacovi ira voki lia na rere, ka ra sa tukunia, "Sa vivakurabuitaki dina na veika eda sa raicia ni kua." ²⁷ Ni sa oti na ka kece koya, sa toso sara o Jisu ka sota vata kei na dua na dau kumunia nai vacavacava na yacana o Livai. A dabe toka o koya ena vanua ni kumuni vacavacava, ka sa tukunia o Jisu, "Muri mai." ²⁸ Sa qai dainia tu na ka kece sara lia ka muri koya. ²⁹ Sa qai varautakia e dua na magiti levu o Livai ena nona vale me baleti Jisu. Ka ra sa lewe levu na dau kumunia nai vacavacava era sa tiko kinia ki na so voki lia na tamata me ra dabe ena teveli me ra kana. ³⁰ Ia era sa qai vosa kudrukudru ko ira na Farisi kei ira voki lia na vunivola vi iratou na tisaipeli, ka tukunia, "A cava eratou sa kana ka gunu vata kinia kei ira na dau kumunia nai vacavacava kei ira na tamata i valavala ca." ³¹ Sa qai saumia o Jisu, "O ira na tamata bula vinaka sa yali ni yaga vi ira na vuniwai; vi ira lia na tauvimate. ³² Au sa yali ni qai mai meu kacivi ira na i valavala dodonu, ia ko ira lia nai valavala ca mera vivutuni." ³³ Era sa tukunia vua, " O ira na tisaipeli nei Joni era sa dau lolo ka masu, kei ira na nodra tisaipeli na Farisi era caka vakakinia. Ia, o iratou na nomu tisaipeli era sa kana ka somi." ³⁴ Sa tukunia o Jisu, "E rawa beka me ra lolo na weka ni tagane vou ena gauna e tiko kinia vata kei ira na tagane vou? ³⁵ Ia ena yaco mai na siga ena yadi tani kinia mai vi ira na tagane vou, gona sara lia na gauna ira na qai lolo kinia." ³⁶ Ia sa qai tukunia voki lia vi ira e dua na vosa vatautauvata, E yali ni dua na tamata me cula vata na tiki ni sulu vou ki na tiki ni sulu madra baletia ena qai dresukia na tiki ni sulu vou, na tiki ni sulu madra. ³⁷ Ena yali voki lia na tamata me talocia na waini vou kina tavaya kulini manumanu madra, de na qai vacabotetakia na tavaya na waini vou ka ka tasova yani, ni sa ca voki lia na tavaya. ³⁸ Ia e vinaka lia me talocia na waini vou ki na tavaya vou, baletia me maroroi vinaka kinia. ³⁹ Sa yali ni dua na tamata me somia oti na waini makawa me qai vinakatia na waini vou. A sa tukunia o koya, sa vinaka na waini makawa."