¹ A sa vasinaiti ko Jisu ena Yalo Tabu, ni sa lesu voki mai na uci wai ko Joritani mai yadi koya sara ki na loma ni vikau. ² Sa temaki koya na tevoro na loma ni vasagavulu na siga, ka sa yali lia ni kania e dua na ka ena loma ni visiga koya,ni oti gona sa qai viakana. ³ Sa qai tukunia vua na tevoro, kevaka ko sa luve ni Kalou, Mo varotia na vatu koya me vuki me madrai. ⁴ A saumia vua ko Jisu, Ni sa volai. A yali ni bula na tamata ena madrai dua loa lia, sa bula lia ena vosa kece lia ni Kalou. ⁵ A sa yadi Jisu ki colo, ka varaitakia vua na vimatanitu kece lia i vuravura ena dua vata lia na gauna. ⁶ A sa tukunia vua na tevoro, "Au na solia vi iko na vimatanitu kece lia vata ki na i ukuuku voki lia ni sa soli vi au ka rawa me'u solia vi koya au sa vinakatia me soli vua. ⁷ Ia kevaka ko na cuva ka qaravi au ena qai nomu kece lia. ⁸ Ia sa qai vosa ko Jisu ka tukunia vua, ni sa volai "Mo qaravi Jiova na nomu Kalou ka qaravi koya dua loa lia. ⁹ A sa liutaki Jisu na tevoro i Jerusalemi ka daini koya ki na viyasana cecere ni vale ni soro, ia ni sa qai tukunia vua, kevaka ko sa luve ni Kalou "Mo rika sobu gona. ¹⁰ Ni sa volai, ni na solia nai varo vi ira na Agilosi ena vukumu me maroroi iko. ¹¹ Ia, era sa laveti iko ena ligadra me kakua ni tavutu na yavamu ki na vatu. ¹² Sa saumia ko Jisu, ka tukunia, Mo kakua ni vatovolei Jiova na nomu Kalou. ¹³ Na gauna sa vatovolei Jisu oti kinia na tevoro, sa qai tani vua ka me yacovia voki na gauna. ¹⁴ Ia, ko Jisu sa qai voli e Kalili ena kaukauwa ni Yalo Tabu sa rogovaki nai tukutuku baleti koya sa robotia na viyasana kece lia. ¹⁵ Ia, sa qai vatekivu me vatavuvuli ena nodra vivalenilotu, ka sa dokai kece lia. ¹⁶ Sa qai mai ki Nasereci i na vanua e susu kinia na kena i tovo, ka curumia na valenilotu ena siga ni Vacecegu ka tucake me wili vola . ¹⁷ A soli vua na i vola vivigi nei Aisea na Parofita, ka dolavia ka raicia na tikinia sa volai kinia. ¹⁸ "Sa tu vi au na Yalo i Jiova, ni sa lumuti au meu vunautakia nai tukutuku vinaka vi ira na dravudravua. Sa talai au mai meu vunautakia na visereki vi ira na bobula kei na rai rawa vi ira na mataboko ka meu na vagalalataki ira na dau raici sobu. ¹⁹ Meu vunautakia na yabaki vinaka i Jiova." ²⁰ Ia, sa vivigia voki nai vola vivigi ka solia voki vua nai vatawa, ka mani dabe sobu. ²¹ Sa qai tekivu me vosa vi ira, ni sa qai vataucokotaki na i Vola Tabu mo dou rogocia e daligamudou. ²² Era sa qai cavutia na vosa vinaka me baleti koya ka ra kurabuitakia na vivosa vinaka sa cavutia mai na gusuna, ia era sa tarogia " Sa yali li ni luvei Josefa ko koya gona"? ²³ Sa qai tukunia vi ira ko koya, " Io, o ni na cavutia kinia vi au nai vosavosa koya, Vuniwai, mo vabulai iko mada. ²⁴ Sa tukunia voki lia ko koya, Au sa tukunia vaidina vi ikodou, sa yali ni dua na parofita sa vinakati ena nona vanua ²⁵ Ia na ka dina meu tukunia vi ikodou, sa lewe levu na yada i Isireli na gauna i Ilaija, sa tasogo na lomalagi me tolu na yabaki ka vula ono. A sa yaco na dausiga levu sa robotia na vanua taucoko. ²⁶ Ia ko Ilaija ka yali ni qai vei ira ka talai lia vua e dua na dawai mai Serepita ena yasayasa va Saitoni. ²⁷ A ra sa lewe levu na tauvi vukavuka i Isireli ena gauna i Ilaisa na Parofita ,ia e yali ni dua vi ira e vabulai me vataki Neumaia lia na kai Siria ²⁸ O ira kece na tamata ka tiko ena loma ni valenilotu era sa cudru valevu ni ra sa raicia na veika kece ko ya. ²⁹ Sa ra qai tucake, biliraki koya tani kina i bili ni koro, sa ra yadi koya kina ulunivanua sa tara kinia na koro mera biligi koya sobu kinia bara-ni-savu. ³⁰ Ia sa curu yani ena kedra maliwa, ka qai tani yani. ³¹ A sa qai sobu ki Kapanaumi, a koro levu mai Kalili, a sa tekivu vatavuvuli ena siga ni vacecegu. ³² Era kurabui e nona i vavuvuli baletia ni sa vosa e na nona kaukauwa lia. ³³ Ena gauna vata gona , sa tiko voli ena loma ni valenilotu e dua na tamata ka curumi tevoro, ka sa qoqolou ena domoilevu, ³⁴ ka tukunia, Ulei! a cava vi ita, i Jisu na kai Nasareci? ko sa qai beka mai me rawai kitou? au sa kilai iko, na nona Le Dua Yalosavasava na Kalou. ³⁵ A sa vunauci koya ko Jisu, ka tukunia, Mo galu lia, ka qai tani mai vua. Ia ni sa bitabitalaki koya mada na tevoro ena kedra maliwa, sa qai tani mai vua, a sa yali ni vamavoatakia. ³⁶ A ra sa kurabui kece lia, ka vivosaki vakai ira, ka tukunia, A cava beka na vosa ko ya! ni sa vosa vaturaga ka vamana ko koya vi ira na yalo velavela, a ra sa qai tani sara. ³⁷ A sa kuruvaki yani na kenai rogorogo ki na viyasana kece lia ni vanua sa vavolivolitia. ³⁸ A sa qai tani mai valenilotu ko koya, ka curu ki na vale i Saimoni. A sa tauvi koya na tina ni wati i Saimoni e dua na katakata levu; a ra sa masuti koya ena vukuna. ³⁹ A sa tu ena tikinia ko koya, ka vunaucia na katakata: a sa takali vua; a sa tucake sara ko koya, ka qaravi iratou. ⁴⁰ Ni sa dromu sobu tiko na siga, era sa qai yani vi Jisu na tamata ka yadi ira yani na dui wekadra ka tauvi ira tu na vimataqali mate eso; a sa tabaki ira yadudua ena ligana o koya ka vabulai ira kece sara. ⁴¹ Era sa qai tani voki lia na tevoro mai vi ira e lewe levu, era sa qoqolou ka tukunia, “Sa ikonu na Karisito na Luve ni Kalou!” A sa qai varoti ira na tevoro o Jisu, ka yali ni vatara me ra vosa, baletia ni ra sa kila ni sai koya na Mesaia. ⁴² Ia ni sa kida na savulaci, sa qai ko koya ki na dua na vanua lala. Era sa qai vaqarai koya ko ira na tamata, ka ra mani yaco sara vua, ka via tarovi koya me kakua ni daini ira. ⁴³ Ia sa mani tukunia vi ira o koya, “E dodonu me'u vunautakia voki lia na i tukutuku vinaka ni matanitu ni Kalou ena vikoro voki eso, ni sai koya ko ya na i naki ni noqu talai mai.” ⁴⁴ A sa vunau voli o koya ena vivalenilotu e Jutia.