¹ A sa cavutu ko ira kece lia na lewe levu, ka yadi koya vi Pailato. ² A sa vatekivu me ra bitakia, a ra sa tukunia, "Kitou sa raici koya sara lia, ni sa vukici ira vatani na lewe ni vanua, sa vatabuya na soli vaicavacava vi Sisa, sa tukunia ni Karisito na Tui ko koya." ³ A sa tarogi koya ko Pailato, ka tukunia. Ko iko na nodra Tui na kai Jutia se yali? A sa vosa o koya ka tukunia vua, ko sa tukunia dina mai. ⁴ Sa qai tukunia ko Pailato vi ira na bete levu vata ki ira na lewe levu, Au sa yali raicia e dua na ka ca vua na tamata koya. ⁵ Era sa qai gumatua valevu mai, ka tukunia, sa vayavalati ira na tamata e Jutia taucoko ko koya ena nona i vavuvuli, sa vatekivu mai Kalili ka yaco ki na yasana koya. ⁶ Ia ni sa rogocia ko Pailato, sa tarogia, se sa kai Kalili ko koya se yali. ⁷ Ia ni sa kila sa dau tiko ko koya ena yasana sa lewa kinia ko Eroti, sa talai koya vi Eroti, ko koya voki lia sa tiko mai Jerusalemi ena gauna gona. ⁸ Ia ni sa raici Jisu ko Eroti, sa reki sara ni sa gadrevia me raicia, ni sa rogocia vua, ni sa nuitakia me raici koya ni caka e dua na cakacaka mana. ⁹ A sa levu na ka sa tarogia vua, sa yali na ka sa tukunia ko koya. ¹⁰ A ra sa tu kinia na bete levu vata ki ira na Vunivola, a ra sa bitakia valevu sara. ¹¹ Ia ko Eroti vata ki ira na nona sotia, era sa vasewasewania, ka valialia, a ra sa vaicurucurutakia ena dua nai sulu lumilumisa, a ra sa tala voki yani vi Pailato. ¹² A rau sa vivinakati voki ena siga koya ko Eroti ki Pailato, ni rau vicati tu e liu. ¹³ Ia ko Pailato ni sa vasoqoni ira vata na bete levu vata ki ira na turaga vata ki ira kece lia na tamata, ¹⁴ sa tukunia vi ira, Dou sa yadia mai vi au na tamata koya, me vaka e dua na vukici ira vatani na tamata, ia raicia au sa tarogia ena matamudou, ia kau sa yali raicia vua na tamata koya e dua na ca dou sa bitakia vua. ¹⁵ Ko Eroti voki lia, e yali, niu a talai ikodou vua, raicia sa yali na ka e raicia vua o Eroti me mate kinia. ¹⁶ O koya, au na vakanakuitatakia ka serekia. ¹⁷ Ni sa dodonu me sereki vei ira e dua na tamata ena solevu koya. ¹⁸ A ra sa sosoraki vata kece lia, ka tukunia, Me yadi tani vi kimamu o koya me sereki lia o Parapa. ¹⁹ Ko koya ka dai tu i vale ni vivesu, ni sa vatubu vivala ena koro ka ni ma laba voki lia. ²⁰ Ia ni sa via sereki Jisu ko Pailato, sa vosa voki vi ira. ²¹ A ra sa kacivakia, ka tukunia, "Vakotia lia ki na kauveilatai, vakotia lia ki na kauveilatai." ²² A sa tukunia vatolu vi ira ko koya. A cava na ka ca sa caka o koya? Au sa yali ni raicia vua e dua na ka caka cala. Sa yali ni dodonu voki lia me mate, au sa na vakanakuitatakia lia ka serekia. ²³ Era sa qai gumatua ni tabalakia na kaci, ni ra sa kerea me vakoti lia ena kauveilatai. Era sa rawa na lomadra. ²⁴ A sa lewa ko Pailato me yaco na nodra cikecike. ²⁵ A sa serekia ko koya mai ko era sa kerea ko koya ka bala i vale ni veivesu, ena vuku ni visei kei na laba. Ia sa soli Jisu me vaka na nodra gagadre. ²⁶ Ia ni ra sa yadia koya yani, a ra sa tauria e dua na kai Kirini, ko Saimoni, o koya sa qai mai vanua, a ra sa tauri koya ka ra dainia vua na kauveilatai, me cola ka muri Jisu. ²⁷ A ra sa lewe levu sara era sa muri koya, vata ki ira voki lia na yalewa, a ra sa tagi ka tagicakia. ²⁸ A sa vuki vi ira ko Jisu, ka tukunia, o ikodou na yalewa ni Jerusalemi, Dou kakua ni tagicaki au ia dou tagicaki ikodou ki ira na luvemudou. ²⁹ raicia, sa voleka ni yaco na siga, ena tukuni kinia. Sa kalougata na yava vata ki na kete sa yali ni sucu mai kinia na gone. ³⁰ Era na qai tukunia ki na viulunivanua, "Lutuki kimamu mai," ki na vi vanua cecere "Ubi kimamu mai." ³¹ Ia kevaka era caka ni veika koya ni sa drokadroka na kau, a cava ena caka ni sa madu. ³² A rau sa lewe rua tani voki lia, na tamata caka ca, eratou sa yadi vata kaya me ratou vamatei. ³³ Ia ni ra sa yaco kina yasana, a yacana ko Kalivari (A vanua ni qavokavoka) a ra sa vakotia ena kauveilatai. ³⁴ Sa qai tukunia ko Jisu, "I Tamaqu, kakua ni cudruvi ira ,ni ra sa yali ni kila na ka era sa caka jiko." A ra sa vota na nona i sulu, ka ia na vawiri madigi. ³⁵ A ra sa tu na lewe levu me ra varaicia. Ko ira voki lia na turaga era sa valialia, ka tukunia, o koya "Sa dauvabulai ira na tani, me na vabulai koya mada, kevaka sa Karisito ko koya, na digitaki ni Kalou." ³⁶ Ko ira voki lia na sotia era sa valialiai koya, era sa qai mai ka solia vua na wai wiwi ³⁷ a ra sa tukunia vua, kevaka ko sa nodra Tui na kai Jutia, vabulai iko mada. ³⁸ A sa dua nai vola sa toka i colo vua, sa volai ena vosa va-Kirisi ki na vosa vaka Roma vata ki na vosa va-Iperiu, O KOYA KOYA NA NODRA TUI NA KAI JUTIA. ³⁹ A sa vosa vacacataki koya e dua virau na tamata caka ca, ka tukunia, "Kevaka sa Karisito ko iko, vabulai iko vaka voki lia o kirau." ⁴⁰ A sa tukunia na kena i karua, ka vunauci koya, "Ko sa yali ni rerevakia beka na Kalou ni ko sa lewai mo mate vaidina? ⁴¹ ia sa dodonu vi kitaru me saumia vi kodrau me vaka na nodar i valavala; ia na tamata koya sa yali ena ca e caka." ⁴² A sa tukunia vi Jisu ko koya, "ikonu na Turaga nanumi au ni ikonu sa qai mai nomuni matanitu." ⁴³ A sa tukunia vua ko Jisu, "au sa tukunia vaidina vi iko ena siga lia ni kua e daru na jiko vata lia mai parataisi." ⁴⁴ Ia sa i ka ono ni auwa, a sa butobuto na vanua taucoko ka yacovia nai ka ciwa ni auwa. ⁴⁵ A sa vabutobutotaki na matani siga; a sa kasei rua nai lati ni valenisoro. ⁴⁶ Ia ni sa kaci ena domo levu o Jisu, ka tukunia, "I Tamaqu au sa solia na yaloqu ki na ligamunu," ia ni sa vosa oji sa qai ciba. ⁴⁷ Ia ni sa raicia na Turaga ni valu na ka sa yaco, sa varokorokotakia na Kalou, ka tukunia, "e dina lia sa tamata dodonu na tamata ko ya." ⁴⁸ Ia ko ira kece lia na tamata era sa qai mai me raicia na ka koya, ni ra sa raicia na ka sa yaco, era sa tavia na lomaseredra, ka lesu voki yani. ⁴⁹ O ira voki lia na wekana vata ki ira na yalewa era muri koya mai Kalili, era sa tu vayawa ka raicia na veika sa yaco. ⁵⁰ Ka sa dua na tamata sa yacana ko Josefa, sa dua vi ira na matavilewai; a tamata vinaka ka dodonu. ⁵¹ (a sa yali ni loma vata se cakacaka vata ki ira) A kai Arimacea e dua na nodra koro na kai Jutia, a sa warakia voki lia na matanitu ni Kalou. ⁵² Sa qai ko koya vi Pailato, ka kerea lia na yago i Jisu. ⁵³ A sa dainia sobu mai, ka solegia ena dua nai sole lineni, ka vadavoria ena dua nai bulubulu sa ta ena vatu, sa yali ni dua e davo kinia. ⁵⁴ Ia sa siga Varau, a sa roro mai na siga ni vacecegu. ⁵⁵ Ia ko iratou voki lia na yalewa, eratou a qai vata kaya mai Kalili, eratou sa muri yani, a ratou sa raicia nai bulubulu, vata ki nai valavala ni kena koto na yagona. ⁵⁶ A ratou sa lesu voki, ka varautakia eso na ka boivinaka vata ki nai lumu: a ratou sa vacegu ena siga ni vacecegu me vaka na vunau.