¹ Ia ena matai ni siga ni wiki, ena savulaci caca, e ratou sa qai mai kinai bulubulu, e ratou sa yadia vata ki iratou eso na ka boi vinaka eratou sa varautakia tu. ² E ratou raicia ni sa vaqiqici tani na vatu mai nai bulubulu. ³ E ratou sa curu e loma ka yali kunea na yagoi Jisu. ⁴ A sa yaco ni ratou sa kurabuitakia na ka sa yaco, ka vasauri, sa tu voleka e yasadratou e rua na tamata enai suli lumilumisa. ⁵ E ratou sa rere ka cuva sobu ena qele, rau sa tukunia vi iratou, "cava dou sa mai vaqarai koya sa bula ena kedra maliwa na mate?. ⁶ "Sa yali gona o koya, sa tucake voki. Nanumia na nona vosa vi ikodou, nona sa tiko vata ki ikodou mai Kalili, ⁷ ni sa tukunia, ena soli yani na luve ni tamata ena ligadra na tamata ca, ka na lauvako ki na kauveilatai ka na tucake voki ena i ka tolu ni siga. ⁸ A ratou sa qai nanumia na nona vosa, ⁹ ka suka tani mai enai bulubulu, ka tukunia na ka kece lia koya vi ira na lewe tini kadua, vi ira kece lia na kena vo. ¹⁰ Sa yaco ko Meri na yalewa ni Makitala, Joana, Meri na tinai Jemesa vata ki ira na yalewa era tiko vata ki iratou e ratou sa mai tukunia na veika koya vi iratou na apositolo. ¹¹ A sa vaka nai tukutuku lowa vi ira na nodratou vosa, a ra sa yali ni vadinatia. ¹² Sa qai cavutu ko Pita, ka cici kinai bulubulu, ia ni sa cuva sobu, ka raicia nai sole lineli ni sa no lowa, a sa qai tani a sa kurabui e lomana ena vuku ni ka sa yaco. ¹³ Ka raicia sa lewe rua vi ira sa qai ena siga dina koya ki na dua na koro lailai ko Emeo na yacana, e vitu beka na maile mai Jeruisalemi. ¹⁴ A rau sa vitalanoatakia na veika kece lia sa qai yaco ¹⁵ Ia ni rau sa vitalanoatakia ka viwaseitakia, sa toro voleka ko Jisu, ka qai vata kirau. ¹⁶ A sa vamatabuwawatakia na matadrau me rau kakua kilai Koya. ¹⁷ A sa tukunia vi rau ko koya, "ai tukutuku cava koya drau sa vivosakitakia ni drau sa qai tu?" A rau sa tu vadua ka vavevekumata. ¹⁸ A sa dua vi rau, na yacana ko Kaliopasa, sa vosa vua ka tukunia o iko dua loa beka na vulagi mai Jeruisalemi ka yali ni kila na veika sa qai yaco ena gauna koya?" ¹⁹ A sa tarogi rau ko koya, "a ka cava?" a rau sa tukunia vua, na ka sa baleti Jisu nai kai Nasareci, a parofita sa levu ena cakacaka ki na vosa ena mata ni Kalou ki na matadra kece lia na tamata. ²⁰ A sa soli koya ko ira na bete levu vata ki ira na nimamu Turaga me lewai me mate, a ra sa vakotia ki na kauveilatai ²¹ Ia kimamu a nuitakia ni sai koya lia koya ena vabulai ira na Isireli. Ia koya voki lia na kenai ka tolu ni siga ni kua ni sa caka oti na ka koya. ²² Ia ka so voki lia na nimamu yalewa, e ratou sa vamatalautaki kimamu, ni ratou a qai kinai bulubulu e savulaci caca. ²³ Ia ni ratou sa yali kunea na yagona, e ratou sa lesu voki mai ka tukunia, ni ratou a raicia eso na agilosi sa rairai vi iratou, ka tukunia sa bula ko koya. ²⁴ O iratou voki lia eso eratou sa dau tiko vata ki kimamu, eratou sa qai ki nai bulubulu, a ratou sa raicia ni sa vaka na ka eratou a tukunia na yalewa. Ia eratou sa yali ni raici koya. ²⁵ A sa tukunia vi rau ko koya, drau sa sesewa, ka yali ni vabautia na ka kece lia sa tukunia ko ira na parofita. ²⁶ E yali beka ni kilikili ki koya na Karisito mo vosotia mada na veika koya me qai curu ki na nona i ukuuku. ²⁷ Ka sa vatekivu enai vola i Mosese ka yacovi ira kece lia na parofita, ka serekia vi rau nai Vola Tabu kece lia na vosa ka tukunia ko koya. ²⁸ a ratou sa torovia na koro lailai e rau sa qai kinia. A sa qai ko koya me vaka sa via qai ki liu. ²⁹ A rau sa cikevia matua, ka tukunia, ni tiko lia ki kirau, ni sa qai raiyavi, a sa kala na siga, a sa curu ko koya me tiko vata kirau ³⁰ Ia ni ratou sa tiko sobu me ratou kana, sa tauria na madrai ko koya, ka lotutakia, ka dovia, ka solia vi rau. ³¹ A sa lau na matadrau, a rau sa kilai koya. A sa takali ko koya mai na matadrau. ³² A rau sa vitukuniyakia vairau, sa yali li ni katakata sara na lomadaru ni datou sa vivosaki kaya ena gaunisala, ni sa vamacalatakia vi kidaru nai Vola Tavu ko koya? ³³ A rau sa cavutu ena tiki ni raiyavi koya, ka lesu voki ki Jeruisalemi, a rau sa raici ira na lewe tinikadua ni ra soqoni vata mai ki ira era dau tiko vata ki ira. ³⁴ A ra sa tukunia, sa dina sa tucake voki na Turaga, ka sa rairai vi Saimoni. ³⁵ A rau sa tukunia voki lia na veika sa caka e gaunisala, ka ni rau sa kilai koya voki lia ni sa dovia tiko na madrai. ³⁶ Ia ni ra sa vosa tiko va koya, sa tu sara ena kedra maliwa ko JIsu, ka tukunia vi ira, dou vacegu lia. ³⁷ A ra sa kidroa ka rere sara, a ra sa nanumia ni ra sa raicia e dua na yalo. ³⁸ A sa tukunia vi ira ko koya, dou sa kidroa ena vuku ni cava? Ka sa tubu na vanananu ena lomamunu ena vuku ni cava? ³⁹ Tarai au, ka raicia na ligaqu vata ki na yavaqu ni sai au dina lia, ka raicia, ni sa yali ni valewena se vasuina na yalo me vaka dou sa raicia vi au. ⁴⁰ Ia ni sa vosa oti ko koya sa varaitakia vi ira na ligana vata ki na yavana. ⁴¹ Era se yali tiko lia ni vabautia ena levu ni reki vata ki na marau, sa tukunia vi ira, "Sa tu e dua na kakana vi ikodou, se yali?" ⁴² A ra sa solia vua e dua na tiki ni ika tavu. ⁴³ A sa tauria ko koya, ka kana e matadra. ⁴⁴ A sa tukunia vi ira ko koya, koya na vosa kau a dau tukunia vi ikodou ena gauna au a dau tiko kinia vata ki ikodou, ni veika kece lia e volai enai Vunau i Mosese vata ki na nodrai vola na parofita vata ki na Same me na vavotukana. ⁴⁵ Sa qai vararamatakia ko koya na nodra vasama me ra kila nai Vola Tabu. ⁴⁶ A sa tukunia vi ira, " Io, ni sa volai ena dua na gauna makawa, ni na vasaurarataki na Mesaia, ka mate, ka qai tucake voki enai katolu ni siga". ⁴⁷ Me vunautakia voki lia na vivutuni, vata ki na vabokoci ni valavala ca, ena vuku ni yacana vi ira na lewe ni vivanua kece lia me tekivu mai Jeruisalemi. ⁴⁸ Ia koi ikodou nai vadinadina ni veika kece koya. ⁴⁹ Ka raicia au sa tala yani na ka sa yalatakia tu ko Tamaqu vi ikodou. Ka mo dou tiko lia ena koro me yacovia ni sa vaisulutaki ikodou ena kaukauwa mai colo. ⁵⁰ A sa yadi ira yani i Pecani, ka lavetia cake na ligana ka vosa vakalougatataki ira. ⁵¹ A sa yaco, ni sa vosavakalougatataki ira tiko, sa yadi tani vi ira, a sa yadi cake ki lomalagi. ⁵² A ra sa qaravi koya ka lesu voki ki Jeruisalemi ena reki. ⁵³ Era jiko lia ena vale ni lotu ka vacaucautakia na Kalou.