¹ A sa voleka na gauna ni Solevu ni Madrai Yali ni Vatubu, ka sa vatokai na kana vata ni qai-sivia. ² A ra sa vinanuyakia ko ira na bete levu vata ki na vunivola e dua na sala me ra vamatei koya kinia, ni ra rerevaki ira na tamata ³ Sa qai curu ko Setani ki na loma i Jutasa, o koya sa yacana voki lia ko Isakarioti, a sa dua vi ira na lewe tinikarua na tisaipeli. ⁴ A sa qai ko Jutasa ka vivosaki vata ki ira na bete levu vata ki ira na i liuliu ni valenisoro se me na vatakilai Jisu vacava vi ira. ⁵ A ra sa reki ka ra yalatakia me soli vua nai lavo. ⁶ A sa vadonuya ko koya , ka sa qai warakia e dua na gauna vinaka me solia koya kinia vi ira, ni ra se tu tani na lewe levu. ⁷ Sa qai yaco mai na siga ni madrai yali ni valeveni, ka dodonu me vamatei voki lia na lami ni kana vata ni qai-sivia. ⁸ Io ko Jisu sa talai Pita vata ki Joni, ka tukunia, "Mo drau qai ka varautakia na kakana ni qai sivia me da kana." A ra sa tukunia vi Jisu, " ⁹ Evei na vanua ikodou sa vinakatia me kirau varau kinia?" ¹⁰ A sa saumia vi ira, "Raicia, ni drau sa curu ki na koro drau na sota kaya e dua na tamata sa cola tu e dua na saqa wai, muri koya ki na vale sa curu kinia ko koya. ¹¹ Ka tukunia vua nai taukei ni vale, Nai Vavuvuli sa tukunia vi iko, "I vei na nodra tikinia na vulagi, na vanua au kana vata kinia vata ki iratou na tisaipeli?" ¹² Ena qai vatakila vi kodrau e dua na vanua e lala levu tu ena taba vale i cake ia ka sa vaiyaya vinaka tu. Drau varau kinia." ¹³ Io e rau sa qai, ka raica na veika kece lia sa tukunia vi rau ko Jisu. Ia rau sa varautakia na kakana ni kana vata ni qai-sivia. ¹⁴ Ni sa yaco mai na gauna ni kana vata ni qai-sivia, sa qai mai ko JIsu ka dabe vata ki iratou na tisaipeli. ¹⁵ Ia sa qai tukunia vi iratou, "Au sa vinakatia valevu me'u kana vata ki ikodou ena qai-sivia ko ya ni bera niu mate. ¹⁶ Au sa tukunia vi ikodou, au na yali ni kana voki me yacovia ni sa vataucokotaki na matanitu ni Kalou." ¹⁷ Ia ko Jisu sa tauria e dua na bilo, ni sa vavinavinaka oti, ka tukunia, "Dou tauria ko ya, ka viwaseitakia vi ikodou. ¹⁸ Niu sa tukunia vi ikodou, Au na yali voki ni gunuvia na vua ni vaini me yacovia ni sa qai mai na matanitu ni Kalou." ¹⁹ Ia sa qai tauria na madrai, ka vavinavinakatakia, ka dovia, solia vi iratou na tisaipeli, ka tukunia, ko ya na yagoqu, ka sa soli vi ikodou. Dou caka ka dau vananumi au kinia." ²⁰ A sa qai tauria voki lia na bilo ni sa oti na i varaiyavi, ka tukunia, "Ko ya na bilo vou ni noqu viyalayalati ni noqu dra, sa livirakia vi ikodou. ²¹ Ia dou raicia, sa tu vata ki au ena teveli na liga i koya sa soli au yani. ²² Ia sa qai na luve ni tamata me vaka sa lesi, ia ka ca vua na tamata gona sa soli koya yani!" ²³ Era sa qai vitarogitakia vakai ira se ko cei beka vi ira ena caka na ka koya. ²⁴ Ia era a vileti voki lia e liu se ko cei vi ira ena cavuti me uasivi cake. ²⁵ A sa tukunia vi ira ko koya, Era sa lewai ira na vimatanitu ko ira na nodra tui; ia ko ira sa vitalia vi ira, era sa vatokai me daucaka vinaka. ' ²⁶ Ia dou kakua ni vakinia ko ikodou. Io, ko koya vi ikodou sa levu cake, me sa vaka lia na gone, ia ko koya sa turaga me vataki koya sa dauviqaravi. ²⁷ Ko cei vi rau sa uasivi cake, ko koya sa tiko me kana se ko koya sa dauviqaravi? E yali ni ko koya sa dabe ena teveli? Ia au sa maliwai ikodou na dauviqaravi. ²⁸ Ia ko ikodou lia dou sa dau tiko vata ki au ena noqu vosotia na dau vivatovolei. ²⁹ Au sa solia vi ikodou e dua nai varau, me vaka sa solia vi au ko tamaqu, ³⁰ ka rawa ni ko kana ka gunu ena teveli ena noqu matanitu vata ki koya sa dabe ni viliutaki ka vatulewatakia na yavusa Isireli. ³¹ "I Saimoni, I Saimoni, qaraunia, sa kerei iko oti ko Setani me vatovolei iko me vaka na witi. ³² Ia ka'u sa masulaki iko, me kakua ni malumalu na nomu vabauta: ia ni ko sa saumaki voki, mo vataudeitaki ira na wekamu." ³³ Sa qai tukunia vua ko Pita, Turaga, au sa varau me'u qai vata ki ikodou ki na valenivesu vata ki na mate voki lia. ³⁴ A sa saumia ko Jisu, "Au sa tukunia vi iko, Pita, ni sa bera ni tagi na savulaci na toa, ko na cakataki mada vatolu na nomu kilai au. ³⁵ A sa tukunia ko Jisu vi ira, Ni’u a talai ikodou lowa ka yali na nomudou taga ni lavo, se na taga ni vaqa, se nai vava, dou a dravudravua li e na dua na ka? A ra sa tukunia, E yali. ³⁶ Sa qai tukunia ko koya vi ira, Ia ni kua, ko koya sa tu vua na taga i lavo, me yadia, me va vokia kinia na taga kakana: ia ko koya sa yali vua nai seleiwau, me volitakia na nonai sulu, ka volia kinia e dua. ³⁷ Ni'u sa tukunia vi ikodou, e dodonu me vayacori vi au na ka sa volai vaka ko ya, sa wili vata ki ra na tamata ca.' Ni sa vayacori sara me oti na veika kece lia ena vukuqu. ³⁸ Ia ra mani tukunia, Turaga, raicia, e rua lia nai seleiwau ko ya." A sa qai saumia vi ira, "Sa rautia" ³⁹ A sa qai ki tautuba, qai me vaka na nonai valavala, ki na ulunivanua ni violive, as muri koya ko ira na nona tisaipeli. ⁴⁰ Ia ni ra sa yaco ki na yasana gona, sa tukunia vi ira ko Jisu, "Dou vatawa ka masu me kakua ni warai ikodou na meca." ⁴¹ A sa qai tani vayawa mai vi ira me vaka ni viritakia e dua na vatu, sa tekiduru sobu ka masu. ⁴² ka tukunia, Tamaqu, kevaka ikonu sa vinakatia, ni yadi tani vi au na bilo gona: ia me yaco lia na nomuni lewa. ⁴³ Ia sa rairai mai vi koya e dua na agilosi mai lomalagi, a sa mai vakaukauwataki koya. Ia ni sa yaluma sara, sa masu vagumatua cake kinia: ⁴⁴ ia na nona buno sa vaka na titiri ni dra ni sa lutu ki na qele. ⁴⁵ Ia ni sa tu cake voki mai na masu, sa qai vi ira na tisaipeli ka raicia ni ra sa moce baletia ni sa rarawa na lomadratou ⁴⁶ ka tarogi ira ko koya, dou sa moce ena vuku ni cava? Dou tu cake ka masu, me kakua ni rawai ikodou na vere." ⁴⁷ Ni sa vosa tiko ko Jisu, raicia, e dua nai lawalawa era sa basika vata mai ki Jiutasa, e dua vi iratou na lewe tinikarua, ka liutaki ira. Sa qai volekati Jisu ka regucia, ⁴⁸ sa tukunia vua ko Jisu , I Jiutasa, ko sa varaitakia na Luve ni Tamata ena dua nai regu?" ⁴⁹ Ko ira era sa tiko vavolivoliti Jisu sa raicia na ka gona, era sa tukunia, "Turaga, me kimamu tatalaki ira ena i seleiwau?" ⁵⁰ Ka sa dua vi ira sa yavitia na nona tamata na bete levu, ka takia tani na daligana i matau. ⁵¹ Sa tukunia ko Jisu, "Sa rautia!" Ka tara na daligana na tamata ko ya ka vabula. ⁵² Sa qai tukunia ko Jisu vi ira na bete levu, vi ira turaga ni valu ni valenisoro vata ki ira na qase era sa qai mai vakaukauwa vua, "Au kurabui ni dou sa qai mai vi au vata nai seleiwau ki nai wau mo dou mai vesuki au, me vaka na daubutako? ⁵³ Au dau tiko vata ki ikodou ena valenisoro ena visiga, dou sa yali ni tovolea mo dou vesuki au! Ia ena gauna ko ya dou caka na ka sa yaga vi ikodou. Ia na nomudou gauna koya vata ki na kaukauwa ni butobuto." ⁵⁴ A ra tauria vakaukauwa, ka yadi koya tani ki na nodra vale na bete levu. Ia sa muri vayawa mai ko Pita. ⁵⁵ Ia ni sa waqacia na buka ena rara ni mata ni vale, ka ra sa tiko sobu vata ki Pita. ⁵⁶ Ia e dua na vada sa raici koya ni sa dau tiko voleka ki na buka, a sa varaici koya matua, ka tukunia, Ko koya voki lia koya ka dau tiko kaya. ⁵⁷ A sa cakitakia ko Pita, ka tukunia, Yalewa, au sa yali ni kilai koya. ⁵⁸ A sa dede valailai lia sa dua tani voki sa raici koya, ka tukunia, "Ko iko voki lia e dua vi ira. A sa tukunia ko Pita, Ko iko, e yali ni koi au. ⁵⁹ Sa oti voki e dua na yauwa sa mai tarogia vamatua ka tukunia. " Sa dina lia sa tiko kaya ko koya koya, ni sa kai Kalili." ⁶⁰ Ia ko Pita sa tukunia, "Ko iko, au sa yali ni kila na ka ko sa tukunia." Ia ni sa vosa tiko ko koya, sa tagi sara na toa. ⁶¹ A sa vuki na Turaga, ka varaici Pita. A sa nanumia ko Pita na vosa ni Turaga, ni sa tukunia vua, Ni a bera ni tagi na toa, ko na cakitaki au mada vatolu. ⁶² A sa qai ki tautuba ko Pita ka tagi valevu sara. ⁶³ Ia ko ira na tamata era sa tauri Jisu, era sa valialiai koya ka vacukia. ⁶⁴ Ia ni ra sa tabonakia na matana, ka tarogia, ka tukunia, Tukunia mai se ko cei sa sabici iko. ⁶⁵ Ia ka levu voki na ka era sa tukunia ni ra sa vosavacacatakia. ⁶⁶ Ia ni sa yaco me siga na vanua, era sa soqoni vata ko ira na nodra qase na tamata vata ki ira na bete levu vata ki ira na vunivola, era sa yadi koya ki na vale ni vilewai, ⁶⁷ ka tarogia, O iko na Karisito, se yali tukunia mai vi kimamu," Ia sa tukunia vi ira, "Kevaka au na tukunia vi ikodou, ikodou na yali ni vabautia, ⁶⁸ ia kevaka au na tarogia vi ikodou, ikodou na yali ni saumia. ⁶⁹ Ia na gauna ko ya, na Luve ni Tamata ena dabe ena liga i matau ni Kalou kaukauwa" ⁷⁰ Era sa tukunia kece, "Kevaka ko sa Luve ni Kalou?" Sa tukunia vi ira ko Jisu, Dou sa tukunia dina, sai au lia. ⁷¹ Era sa qai tukunia, "Sa yaga vacava me dua nai vadinadina? ni da sa rogocia lia koi ita mai na gusuna dina.