¹ A sa yaco na siga koya, ni sa vavulici ira tiko na tamata ko koya ena valenisoro, ka vunitakia na i tukutuku vinaka, era sa qai mai na bete levu vata ki na vunivola vata ki na qase, ² a ra sa tarogi koya, tukunia mai vi kitou, se ko sa lesi mai vi mo caka na veika ko ya? se ko cei sa solia vi iko na i lesilesi ko ya? ³ A sa vosa ko koya, ka tukunia vi ira, Au na tarogi iko voki lia ena dua na ka; ia dou tukunia mai vi au; ⁴ Na vipapitaisotaki nei Joni, sa vu mai Lomalgi, se vu mai na tamata? ⁵ A ra sa vivosakitakia vataki ira, ka tukunia, "Kevaka eda na tukunia, 'Ni sa mai lomalagi,' Ia na cava dou sa yali ni vabauti au kinia?' ⁶ Ia kevaka eda sa tukunia,, 'Mai vua na tamata,' era sa na vaviriki ita na vatu ko ira kece lia na tamata; ni ra sa vadinatia ni sa parofita ko Joni. ⁷ Era sa saumia ni ra sa yali kila na vanua se sa qai mai vi. ⁸ Sa qai tukunia vi ira ko Jisu, "Au yali voki lia ni varaitakia vi ikonu se kaukauwa cava au sa caka kinia na veika kece lia." ⁹ Sa qa tukunia ko koya na vosa vatautauvata ko ya vi ira na tamta: sa dua na tamata sa teivakia e dua na were ni vaini, la lisitakia vi ira eso nai vatawa ni were, ka qai sara vayawa kina dua tani ka tiko vadede kinia. ¹⁰ Ia ni sa yaco na kena sa tala ko koya e dua na nona tamata vi ira nai vatawa me ra solia vua eso vua ni vaini, Ia era sa yaviti koya nai vatawa ni were, ka vatalai koya tani ka yali na e yadia. ¹¹ Sa qai tala voki ko koya e dua na nona tamata ka ra sa yaviti koya voki lia, ka vamaduatakia, ka vatalai koya tani ka yali ni yadia e dua na ka. ¹² Sa qai tala voki lia nai katolu ni nona tamata ka ra sa vamavoatakia, ka ra vatala tani. ¹³ Sa qai tukunia na turaga nai taukei ni were ni vaini, 'A cava me'u caka? Au na tala na luvequ lomani. Ena rawa ni ra dokai koya.' ¹⁴ "Ia ni ra sa raicia nai vatawa ni were, era sa vivosaki vaka ira, ka tukunia, 'Ko koya ko ya nai taukei ni were mai muri. Tou vamatei koya ka me nodatou na vanua.' ¹⁵ Era sa vatalai koya tani ki na i bili ni were ka vamatei koya. Se cava ena caka nai taukei ni were ni vaini vi ira? ¹⁶ Ena qai qai mai ka varusai ira nai vatawa ni were, ka solia na were ni vivaini ki na so voki nai vatawa ni were."Ena gauna era sa rogocia kinia nai tukutuku, era sa tukunia, "Me yali ni yaco vaka kinia!" ¹⁷ Ia sa raici ira ko Jisu, ka tarogia, "Na cava nai balebale ni ka sa volai: 'Na vatu ka besetakia na matai ni vale sa yaco me vadei ni tutu ni vale'? ¹⁸ Ko ira voki lia era lutu ni dela ni vatu koya, ena dasila kinia, ia ko koya ena lutukia, ena vurumemea." ¹⁹ Era sa qai via tauri koya na bete levu ki ira vunivola ena gauna ko ya, ni ra sa kila ni sa cavutia tiko na vosa vatautauvata baleti ira. Ia era sa rerevaki ira na lewe levu. ²⁰ A ra sa varaici koya vamatua, ka ra tala eso na tamata me nodra yamata vuni me ra veretakia, a ra sa rairai me vatakia tamata yalododonu, ka ra varogocia na nona vosa nei Jisu, de rogocia kinia eso nai tukutuku ni vivacalai me rawa ni ra beitaki koya kinia, era sa vinakatia me ra soli koya vua na Kovana ni vanua ya. ²¹ A ra sa tukunia vua, "Vavuvuli, kimamu sa kila ni Ikonu sa tukunia ka vatavuvukitakia na ka dodonu, Ikonu sa yali vinakatia vailoa lia e dua na tamata, ia ko sa vulicia na ka dina me baletia na nona sala na Kalou. ²² Sa tara na soli vacavacava vi Sisa, se yali?" ²³ Ia sa kila vinaka ko Jisu na nodrai lawaki, ka tukunia vi ira, ²⁴ Varaiatakia mai vi au e dua na tiki ni siliva ni Roma. Nai vatakarakara ki na yaca i cei sa tu kinia?" A sa tukunia, "Sisa." ²⁵ Sa qai tukunia vi ira ko koya, :Mo dou solia lia vi Sisa na ka sa nei Sisa, ka solia lia vua na Kalou sa ka sa nona Kalou," ²⁶ A ra sa yali ni raicia rawa e dua na ka ca ena nona vosa e matadra na tamata, ia a ra kurabui kece lia ena nona saumia na nodra vatataro, ka ra sa galu. ²⁷ Era qai qai mai vua nai tokani i Setoki, ko ira sa tukunia ni sa yali na dua na tucake voki mai na mate, ²⁸ a ra sa tarogi koya, ka tukunia, " Vavuvuli, o Mosese sa vola oti vi kimamu na kai Jiutia, kevaka sa mate e dua na tagane sa vawati ka yali na luvena, sa dodonu me tauiri na wati tuakana me watina e dua na tacina ka vakawa me nei tacina sa mate. ²⁹ Eratou lewe vitu na vitacini tagane ka sa vawati ko na ulumatua, ka sa yali ni dua na nona kawa. ³⁰ ka yali voki vakawa kinia na kena i karua. ³¹ A sa vamautakia na yalewa na kena i ka katolu, ka ratou sa mate vadua kece lia na lewe vitu ka yali ni valuveni. ³² Sa qai mate voki lia emuri na yalewa. ³³ Ia kevaka sa dina ni na bula voki ko ira na tamata sa mate, ko cei vi iratou na vitacini sa na watina na yalewa ko ya? Ni sa vawati ko koya vi iratou kece lia na vitacini e vitu." ³⁴ A sa tukunia ko Jisu vi ira, "Ena vuravura ko ya, sa ia na vimusumusuki me ra vawati. ³⁵ Ia ko ira era ganiti ira me ra rawatia na bula ena vuravura vou, ki na tucake voki mai, era na yali ni vawati se vimusumusuki me ra vawati. ³⁶ Ni ra sa yali voki ni mate. Era sa tautauvata ki na agilosi. Era sa luve ni Kalou, ni ra tucake voki mai na mate. ³⁷ Ia ni ra vakaturi cake voki ko ira na mate, sa varaitakia ko Mosese mai na vunikau sa kama, a sa vatoka kinia na Turaga ko Mosese me ko koya na Kalou Eparaama, na Kalou i Aisake, ki na Kalou Jekope. ³⁸ Ni sa yali ni nodra Kalou na mate ko koya, baletia era sa bula kece lia vua na Kalou." ³⁹ Sa qai saumia eso na vunivola, "Vavuvuli, ikonu sa vosa vinaka." ⁴⁰ Era sa yali ni doudou me ra tarogia vua e dua voki na ka. ⁴¹ Sa tukunia vi ira ko Jisu, "Era tukunia vacava ni sa luvei Tevita na Karisito? ⁴² Sa tukunia ko Tevita ena i Vola ni Same, Sa tukunia na Turaga vua na noqu Turaga, Mai dabe ena yasaqu i matau, ⁴³ me yacovia ni'u sa vamalumalutaki ira na nomu meca me ra i tutu ni yavamu.' ⁴⁴ Ia sa vatokai koya ko Tevita me 'Turaga,' me qai luvei Tevita vacava na Mesaia?" ⁴⁵ Ia ni sa varorogo tiko na lewe levu, sa qai tukunia vi iratou na nona tisaipeli, ⁴⁶ "Dou qarauni ikodou mai vi ira na daunilawa, ka ni ra sa dau vinakatia na qai voli ena sulu balavu, ka ra vinakatia na vikidavaki ena rara ni vivoli, ki na i dabedabe e cake ena vivalenilotu ki na vitikotiko vaturaga ena gauna ni kana magiti. ⁴⁷ Era sa dau kovea vailawaki na vivale na yada dravudravua, ka ra vivakaisini voki lia ena nodra masu balavu. Na ka ko ya ena bibi valevu sara kinia na kedrai totogi."