¹ A sa curu voki lia ki Jeriko ko Jisu ka sa qai sara yani. ² Raicia, e dua na tamata na yacana o Sakiusa. E nodai liuliu na dau kumuni vacavacava ka sa vutuniyau voki lia. ³ Sa tovolea me raicia se o cei o Jisu, ia sa yali ni raicia rawa ni sa lewe levu na tamata baletia ni sa lekaleka voki lia. ⁴ Ia sa cici sara ki liu vi ira na lewe levu ka kabatia cake e dua na vunilolo me raici Jisu, baletia o Jisu sa varau qai sivitia na sala koya. ⁵ Ena gauna sa yacovia kinia o Jisu na vanua koya, sa rai cake ka tukunia vua, "Sakiusa, vatotolo, mo siro sobu mai, au na tiko i na nomu vale ena siga ni kua." ⁶ Ia sa qai sobu mai vatotolo ka kidavaki koya ena marau. ⁷ Na gauna e raicia kinia na lewe levu, era sa vosa kudrukudru, ka tukunia, "Sa qai ko koya ka sikovia e dua na tamata i valavala ca." ⁸ Sa qai tucake o Sakiusa ka tukunia vua na Turaga, Raicia, Ikonu na Turaga, au na wasea vimama na noqu yau vi ira na dravudravua, ia kevaka au sa lawakitakia e dua na tamata ena dua na ka, au na vaisosomitakia vava." ⁹ Sa qai tukunia o Jisu vua, "Sa yaco na bula ki na vale koya ena siga koya baletia ni sa luvei Eparama o koya koya. ¹⁰ Ni sa qai na Luveni tamata me vaqara ka vabula na tamata sa yali." ¹¹ Ena gauna era rogocia kinia na veika koya, sa tomania na nona vosa ka tukunia e dua na vosa vatautauvata, baletia ni sa voleka ki Jerusalemi, ka ra nanumia ni sa voleka basika vasauri na matanitu ni Kalou. ¹² Ko ya na vuna sa tukunia voki lia, e dua na tamata sa qai ki na dua na vanua yawa me qai buli me tui, ka me qai lesu voki mai. ¹³ Sa qai kacivi iratou na nona tamata ka soli vi iratou e ya tini na paodi, ka tukunia vi ira, "Dou caka volivoli tiko ka yacovia na noqu qai voki mai.' ¹⁴ "Ia era sa cati koya ka ra tala e dua na mata me muri koya, ka tukunia vua, " Kitou sa yali ni vinakatia me lewai kitou tiko ko koya koya.' ¹⁵ Ia ni sa lesu voki mai ko koya, sa vakaroti ira na nona tamata cakacaka ka solia vi ira na paodi me ra qai mai vua, ka me tarogia vi ira e vica na tubu era sa rawatia mai ena nodra vivoli. ¹⁶ Sa qai qai mai ko koya sa liu, ka tukunia, Ikonu na Turaga, sa tini voki na paodi au sa rawatia mai.' ¹⁷ "Sa qai tukunia vua ko koya, Vinaka valevu na cakacaka, ka tamata dau cakacaka; ia ko sa dina ena ka e lailai sara, mo lewa na koro e tini.' ¹⁸ "Sa qai mai na kena i karua, ka tukunia, "Ikonu na Turaga, sa lima voki lia na paodi au sa rawatia mai. ¹⁹ "Sa tukunia vua na Turaga, 'Mo lewa voki e lima na koro.' ²⁰ "Sa qai voki mai e dua, ka tukunia, "Ikonu na Turaga, raicia na nomuni paodi koya au sa maroroya, niu sa maroroya ena dua nai tavoi: ²¹ ni'u sa rerevaki ikonu baletia ikonu sa tamata dredre: ko sa tauria cake na ko sa yali ni dainia sobu, ka tamusukia na ka ko ni sa kaburakia.' ²² "Sa tukunia na Turaga vua, 'Au na lewai iko ena nomu vosa ko sa vosatakia. Ko sa kila niu sa tamata dredre, baletia au na tauria na ka e yali noqu ka tamusukia na ka au sa yali ni kaburakia. ²³ Ia na cava ko sa yali ni dainia kinia na noqu i lavo ki na baqe, me'u mai tauria voki ki na kena tubu na gauna au lesu mai kinia.?' ²⁴ Sa tukunia na Turaga vi ira na lewe levu. 'Yadia tani mai vua nai paodi, ka solia vua na tamata sa rawatia e tini na paodi.' ²⁵ A ra vosa kudrukudru na lewe levu, 'Ikonu na Turaga, sa levu na nona i lavo!' ²⁶ "Au sa tukunia vi ikodou, o koya yadua sa tu vua na ka, ena soli valevu vua, ia ko koya sa yali ni tu vua e dua na ka, ena yadi tani mai vua. ²⁷ Ia ko ira na noqu meca, era yali ni vinakatia meu lewai ira, yadi ira mai ka vamatei ira e mataqu." ²⁸ Na gauna sa tukunia oti kinia na veika kece lia, sa qai sara i liu, ka qai cake ki Jerusalemi. ²⁹ Ena gauna era sa voleka kinia ki na koro ko Pecifaki vata ki Pecani, ka voleka voki lia ki na ulunivanua ni violive, sa tala e rua na nona tisaipeli, ³⁰ ka tukunia, "Drau qai ki na koro ka taravia. ia ni drau curu kinia, drau raicia e dua na luve ni asa sa vesu ka sa yali tu ni vodoki. Serekia ka yadia mai vi au. ³¹ Ia kevaka e dua sa tarogi iko, 'A cava drau sa serekia kinia luve ni asa?' drau tukunia vaka ko ya, Ni sa yaga vua na Turaga. ³² Ia rau sa qai na tisaipeli e rua ki na koro ka raicia na asa, me vaka sa tukunia vi rau ko Jisu. ³³ Ena gauna rau sa tekivu serekia kinia na asa, sa tarogi rau nai kenai taukei, "Na cava drau sa serekia kinia na nitou asa?" ³⁴ A rau saumia, "Sa yaga vua na Turaga." ³⁵ Ia rau sa yadia sara mai na asa vi Jisu, ka tevukia na nodrau i sulu ena dela ni asa, ka vavodoki Jisu kinia. ³⁶ Ia ni sa qai tu ko koya, era sa tevukia na nodrai sulu ena sala levu. ³⁷ Ia ni sa qai volekatia na ulunivanua ni violive, sa vatekivu na tisaipeli kece lia era lewe levu me ra reki, ka varokorokotakia na Kalou ena domo i levu ena vuku ni cakacaka mana era sa raicia oti ni sa caka o Jisu. ³⁸ ka tukunia, "Sa kalougata o koya na Tui sa qai mai ena yaca ni Turaga! ka tu mai lomalagi na vivinakati vata ki na varokoroko e na viyasana e cake sara!" ³⁹ Eso vi ira na Farisi vi ira na lewe levu era sa tukunia vua, "Vavuvuli, vunauci ira na nomu tisaipeli me ra kakua ni tukunia tiko na veika ko ya." ⁴⁰ Ia sa qai saumia ka tukunia ko Jisu, " Kevaka era sa galu na tamata koya, era na vosa na vivatu ko ya." ⁴¹ Ia ni sa toro voleka yani ki na koro ko Jerusalemi ko Jisu, ⁴² sa tukunia, "Kevaka ko a kila na siga ni kua, ia ko iko lia, na veika ena yadia mai vi iko na vacegu! Ia ka sa vuni lia mai na matamu. ⁴³ Ni na yaco mai na siga, ena viribaiti iko voki lia kinia ko ira na nomu meca, ka buku na druadrua, ka kaba na koro mai na viyasana kece lia. ⁴⁴ Era na basukia na bai ni koro ka vacacania na kece lia, ka na vamatei iko vata ki ira na luvemu. Era na yali ni vo vi iko na vivatu vitaqataqai; Sa yaco na ka koya baletia ni dou sa yali kila rawa na gauna ena qai mai kinia na Kalou me vabulai iko. ⁴⁵ Sa qai curumia na valenisoro ko Jisu ka vatekivu me vatalai ira na vivoli tu kinia, ⁴⁶ sa tukunia vi ira, "Ni sa volai, 'Na noqu vale na vale ni masu,' ia ko ni sa vukicia me nodra qara na daubutako." ⁴⁷ Sa qai vatavuvuli ena visiga ko Jisu ena valenisoro. Era sa vaqara eso na sala ko ira na bete levu, ko ira voki lia na vunivola ki ira eso na nodra i liuliu na kai Jiutia me ra vamatei kinia. ⁴⁸ Ia era sa yali ni raicia rawa e dua na kena sala baletia era varorogo matua vi koya o ira na tamata.