¹ Ia sa qai tukunia vi ira e dua na vosa vatautauvata me baletia na bibi ni nodra masu tiko lia me ra kua ni soro koso. ² ka tukunia: "E tiko ena dua na koro e dua na turaga ni lewa e yali ni rerevakia na Kalou, e yali voki lia ni doka na tamata. ³ E tiko voki lia ena koro koya e dua na yada e dau lai tukunia tiko vua, 'Au vinakatia me vadodonutakia na lewa vei koya e via vilewaitaki au tiko.' ⁴ Dua toka na gauna nona yali ni via kauwai ena turaga ni lewa, e muri sa qai tukunia e lomana, 'Au yali ni rerevakia na Kalou, au yali voki lia ni doka e dua na tamata, ⁵ ni sa rui visosataki au na yada koya au na raicia me tauvua na lewa dodonu, de qaiqai au na ciba voki lia ena levu ni nona vasosataki. ⁶ Ia qai tukunia na Turaga: 'E yali ni turaga yalododonu na turaga ni lewa, ia rogocia na ka e tukunia!. ⁷ Me na qai yali vacava ni raicia na Kalou me caka na lewa dodonu vi ira nona sa digitakia, era tagi vua ena siga ki na bogi?. ⁸ Au tukunia vi ikonu, ena raicia me tau vatotolo vei ira na lewa dodonu. Ia ni yaco mai na luveni tamata, ena raicia e vuravura na vabauta koya? ⁹ Sa qai cavutia voki lia na vosa vatautauvata koya vi ira eso era nanumia ni ra yalododonu; ra beci ira na vo ni lewe ni vanua. ¹⁰ "E rau qai cake ena valenisoro e rua na tagane me rau lai masu, e dua na Farisi ki na dua na dau kumunia na i vacavacava. ¹¹ E tucake na Farisi qai masu lo ni tukunia, "Ikonu na Kalou vavinavinaka vi ikonu niu yali ni vataki ira na so, era dau kocokoco, era yali ni yalododonu, era dau vibutakoci, seu vataki koya na dau kumunia na i vacavacava koya. ¹² Au lolo va rua ena dua na macawa, au solia nai katini ni ka kece au rawatia ¹³ E duri tu mai na dau kumunia na vacavacava, e yali mada lia ni tacake i lomalagi. E tavia tiko lia na sarena, e tukunia, Ikonu na Kalou, ni lomani au, niu tamata i valavala ca. ¹⁴ Au tukunia vi ikodou, e vadonui na tagane koya ni qai sobu i nona vale, e yali ni vadonuya na Farisi. Ni o koya e vacerecerei koya ena valolovirataki, o koya e vamalumalumutaki koya ena vacerecerei. ¹⁵ Era yadia ira voki lia yani na gone dramidrami vua me tarai ira, ia ni ratou raicia koya na tisapeli, ratou qai cudruvi ira mai. ¹⁶ Ia e tukunia lia o Jisu mera na yadia yani vua na gone dramidrami, e tukunia: "Daini ira na gonelailai, me ra qai mai vi au dou kua ni tarovi ira, ni ko ira koya e nodra na matanitu ni Kalou. ¹⁷ Au tukunia vadodonu vi ikodou, o koya e yali ni ciqomia na matanitu ni Kalou me vaka edua na gone lailai, ena yali sara ni curu kinia." ¹⁸ E qai tarogi koya e dua na Turaga, ka tukunia, "Vavuvuli vinaka, na cava meu caka meu rawatia kinia na bula e yali ni mudu?". ¹⁹ Tukunia vua o Jisu: "Na cava o sa tukunia kinia niu vinaka? Yali ni dua e vinaka na Kalou lia. ²⁰ O kila vinaka nai vunau, "Mo kua ni vibutakoci, kua ni laba, kua ni butako, kua ni bubului lasu, mo rokovi tamamu vata ki tinamu." ²¹ E qai tukunia: "Na ka kece koya au se caka makawa mai niu se gone." ²² Ni rogocia o JIsu, e qai tukunia vua: " E dua na ka ko yali ni caka: Qai lai volitakia na ka kece sa tu vi iko, solia na kena i lavo vi ira na dravudravua, ko na qai va i yau mai lomalagi, qai mai ka muri au." ²³ Ni rogocia, e dua na ka nona rarawa ni rui vutuniyau. ²⁴ E raicia o Jisu qai tukunia: "Ena dredre sara vi ira na vailavo mera curu ki na Matanitu ni Kalou!. ²⁵ Ena rawarawa cake vua na kameli me curumia na matanicula, ena dredre vua na vutuniyau me curu ki na matanitu ni Kalou." ²⁶ Era tukunia na rogocia na vosa koya: "Ko cei ena bula rawa?". ²⁷ Sa qai saumia ko Jisu: "Na ka e dredre vua na tamata e rawarawa vua na Kalou." ²⁸ Sa tukunia o Pita: "Raicia! Kitou sa dania na ka e nitou me kitou muri ikonu." ²⁹ Ia sa qai tukunia vi ira ko Jisu: "Au tukunia vadodonu vi ikodou, e yali ni dua e dainia na vale se watina, se tacina, se nona i tubutubu, se luvena ena vu ni Matanitu ni Kalou. ³⁰ Me na yali ni valevutakia voki lia vua ena gauna koya, ena bula yali ni mudu voki lia ena gauna se bera mai." ³¹ E yadi ratou vatikitiki na lewe tinikarua qai tukunia vi ratou: 'Tou sa qai cake tiko koya i Jerusalemi me na lai vayacori kinia na ka kece era a vola na parofita me baletia na luve ni tamata. ³² Kena i varaitaki, ena soli o koya vi ira na kai vimatanitu, era na valialiai koya, era na beci qai kasuvia. ³³ Ni ra kuitaki koya oti, era na qai vamatei koya, ia ena tucake voki lia ena i ka tolu ni siga. ³⁴ Ia eratou yali ni tauria rawa na i balebale ni ka kece lia koya, e vunitakia vi iratou, eratou yali kinia ni tauria na ka e cavuti. ³⁵ Ni volekati Jeriko yani o Jisu, e dabe toka e batinisala e dua na daukerekere ka mataboko. ³⁶ Ni rogocia nodra mawe na lewenivanua, e mani vaqaqa se cava ya. ³⁷ Era qai tukunia vua: " Sa qai ya o Jisu na kai Nasereci!". ³⁸ Ni rogocia, sa qai kaci yan: "Jisu, na Luvei Tevita, ni lomai au!". ³⁹ Era karaci koya na liu tiko me tikolo, ia sa qai rogolevu ga na domona: "Luvei Tevita, ni lomani au". ⁴⁰ E tu va dua o Jisu ka varotia me ra yadi koya yani vua. Ni sa voleka yani na tamata mataboko, sa qai tarogia o Jisu: ⁴¹ "Na cava ko vinakatia meu caka vi iko?" E saumia: "Turaga, au gadrevia meu rai rawa mada lia. ⁴² Sa qai tukunia vua o Jisu mo rai sa vabulai iko na nomu vabauta". ⁴³ E rai ena gauna vata lia koya ka mani muri Jisu sara yani, ka valagilagia na Kalou. Ni ra raicia na lewenivanua, era vacaucautakia voki lia na Kalou.