¹ E a vatulewatakia na Tui (Sisa) o Akusito ena gauna gona me vayacoria e dua na wili leweni vanua ena matanitu va-Roma. ² Nai matai ni wili lewenivanua gona a vayacori ena gauna e Kovana tiko kinia mai Siria o Kirinio. ³ Era a dui qai voki na tamata kina nodra koro me ra volai kinia. ⁴ A qai voki lia i colo o Josefa mai na koro o Nasareci e Kalili ki na koro o Pecileema e Jutia, na koro sara lia ni sucu ni Tevta na Tui, ka sa tubu mai vua ⁵ sa volai voki lia ko Meri baletia ni sa musu vua me watina ka ni sa bukete tiko. ⁶ Ia ni rau sa tiko kinia, sa yaco na siga ni vasucu. ⁷ Sa vasucumia na nona ulumatua na gone tagane, viviraki vi koya nai sulu ni gone, ka mai dainia tu ena nodra tikinia na manumanu, ni sa yali na tiki ni bure me nodratou. ⁸ A so nai Vatawa ni sipi ena vanua gona, era a tiko ena vanua vi co, a ra vivuke me vatawa na sipi ena raiyavi. ⁹ Ka raicia, sa dua na agilose ni Turaga, sa rairai vi ira, a sa cila lia vavolivoliti ira nai ukuuku ni Turaga, a ra sa rere valevu. ¹⁰ A sa tukunia vi ira na agilose, Dou kakua ni rere: raicia au sa yadia mai vi ikonu e dua lia nai tukutuku vinaka, mo dou reki valevu ki ira voki lia na tamata kece lia. ¹¹ Ni sa sucu vi ikonu ena siga koya ena koro i Tevita nai vabula, ko koya lia na Karisito na Turaga. ¹² Ia koya lia koya na kenai vatakilakila vi ikonu: Dou na kunea lia na gone sa viviraki vua nai sulu ni gone, ka sa davo tiko lia ena nodra tikinia na manumanu. ¹³ A ra sa lewe levu voki lia na kai lomalagi a ra sa tiko vasauri vata kaya na Agilose, a ra sa vavinavinakatakia na Kalou ka cavutia, ¹⁴ Sa nona lia na Kalou na varokoroko ena viyasana e colo sara! A sa vivinakati rawa kinia ko ira e vuravura: sa lomani lia ko ira na tamata., ¹⁵ Ia ni ra sa lesu voki na Agilose ki lomalagi, a ra sa vivosakitakia vakai ira na i Vatawa ni sipi, me datou qai ki Pecileema me raicia na ka sa qai yaco, ka a mai varaitakia na Turaga ¹⁶ A ra sa qai lia yani vatotolo ka raici Meri ki Josefa, vata ki koya voki lia na gone, sa davo ena nodra tikinia na manumanu. ¹⁷ Ia, ni ra sa raicia, era sa tukunia na vosa sa tukunia vi ita ena vuku ni gone koya. ¹⁸ A ra sa kurabuitakia kece lia ni ra rogocia na veika sa cavutia vi ira nai Vatawa ni Sipi. ¹⁹ A sa ciqomia lia na vosa kece koya ko Meri ka sa vananumia kinia e lomana ²⁰ Ia, ko ira nai Vatawa ni sipi era sa lesu voki, ka vavinavinakatakia ka doka na Kalou ena vuku kece lia ni ka era sa rogocia ka raicia, me vaka sa tukunia oti vi ira. ²¹ Ni sa oti lia e bogi walu, sa cilivi kinia na gone sa vatokai me yacana ko Jisu, me vaka lia ka vatoka na Agilose ni se bera kinia ni kunekunetaki. ²² Ia ni sa oti lia na visiga ni vasavasavataki i tinana me vaka nai vunau i Mosese, erau a yadi koya ki Jerusalemi, me vacabori kinia vua na Turaga ²³ (me vaka lia sa volai ena vunau ni turaga, a gone tagane kece lia sa ulumatua ena vatokai me tabu me nei Jiova) ²⁴ me rau vacaboria voki lia nai soro me vaka na ka sa tukunia nai vunau ni Turaga, Me rua na soqe ka rua voki lia na luve ni ruve. ²⁵ Ka raicia, sa dua na tamata mai Jerusalemi , na yacana ko Simioni, a sa yalododonu ka daulotu na tamata koya, a sa warakia na nodra vacegu na Isireli, a sa tiko voki lia vi koya na Yalo Tabu. ²⁶ A sa vatakila oti vua na Yalo Tabu, ni na yali mada ni mate, ena raicia lia e liu na Karisito ni Turaga. ²⁷ Sa vavunia lia na Yalo Tabu na nona qai ki na valenisoro, ia, ni rau sa yadia mai na gone ko Jisu koi rau na nona qase, me vayacoria lia vua me vaka nai valavala ni Vunau, ²⁸ sa qai roqotia i colo ko koya, ka vavinavinakatakia lia na Kalou ka tukunia, ²⁹ Ikonu na Turaga, mo ni dainia na nomuni tamata me qai ena vacegu me vaka lia na nomuni vosa. ³⁰ Ni sa qai raicia na mataqu na vunibula mai vi ikonu. ³¹ Io, o koya lia koya ko ni sa varautakia ena matadra na tamata kece lia; ³² A rarama me vararamatakia na vimatanitu tani, Me nodrai ukuuku voki lia na nomuni tamata na Isireli. ³³ A rau sa kurabuitakia ko Josefa vata kei Meri na tinana ena vuku ni veika sa tukunia ena vukudra. ³⁴ A sa vosavakalougatataki rau lia ko Simioni, a sa tukunia vi Meri na tinana, Raicia, ko koya koya sa viritoka me bale sobu kinia, se tucake kinia e lewe levu vi ira na Isireli, ka me vatakilakila ena vosavacacataki lia. ³⁵ me varaitakia kinia na nanumia ni yalodra era lewe levu, ia ena laubasikatia lia na yalomu voki lia nai seleiwau. ³⁶ A sa dua na parofita yalewa, ko Ana, a luvei Fanueli ena mataqali lia i Aseri (sa levu sara lia na nona yabaki, sa goneyalewa ni sa vawati, a rau sa bula vata ki na watina ka yabaki vitu: ³⁷ sa qai yada voki ni sa yabaki walusagavulukava) a sa yali ni qai tani e valenisoro, a sa daulotu, lolo ka masu voki lia ena siga ki na bogi. ³⁸ A sa qai mai ko koya ena tikini siga gona ka vavinavinakatakia voki lia na Turaga, a sa vosataki ira kece lia era tiko mai Jerusalemi ena warakia nai Vabula. ³⁹ Ia, ni ratou sa caka oti kece lia na vunau ni Turaga, eratou sa lesu voki ki Kalili, ki na nodratou koro lia ko Nasareci. ⁴⁰ A sa tubu cake ka yalomatua lia mai na gone, sa sinai lia ena vuku, a sa tu vi koya na loloma ni Kalou. ⁴¹ A rau sa dau qai na nona qase ena viyabaki ki Jerusalemi ena kana vata ni qai sivia. ⁴² Ia, ni sa yabaki tinikarua na nona yabaki, eratou sa qai ki Jerusalemi, me vaka lia na kenai valavala ni kana vata; ⁴³ Ia ni ratou sa vaotia lia na visiga, ka rau sa lesu voki, sa tiko lia ko Jisu mai Jerusalemi, a rau yali ni kila ko Josefa vata kei tinana. ⁴⁴ A rau sa nanumia sa tiko ko koya vi ira sa qai tu, a rau sa qai lia ena dua na siga ka bogi voki: a rau sa vaqarai koya vi ira na kai nodra, kei ira voki lia na nodrau vi kilai. ⁴⁵ Ia, ni rau sa yali ni raicia, erau sa lesu voki ki Jerusalemi, ka vaqarai koya voki. ⁴⁶ Sa oti lia e bogi tolu, erau sa qai raici koya ena vale ni soro, ni sa tiko lia ena kedra maliwa nai vavuvuli, ka rogoci ira tiko ka taro voki lia vi ira. ⁴⁷ A ra sa kurabuitakia ko ira kece era rogocia, ena nona vuku ki na vosa voki lia. ⁴⁸ Ia, ni rau sa raicia, erau sa kurabuitakia, a sa tukunia vua na tinana, Na luvequ, ko sai valavala va koya vi kirau ena vuku ni cava? raicia, kirau vata kei tamamu sa vaqarai iko ka sa rarawa tiko. ⁴⁹ A sa tukunia vi rau ko koya, a cava drau sa vaqarai au kinia? A yali beka ni kila ni sa kilikili kei au meu tiko lia ena vale ni tamaqu? ⁵⁰ A rau sa yali ni kila nai balebale ni vosa sa tukunia vi rau ko koya. ⁵¹ A sa qai sobu vata kirau ko koya ka yaco ki Nasareci, a sa talairawarawa lia vi rau: a sa maroroya lia ko tinana na vosa kece lia koya e lomana. ⁵² A sa tubu cake ko Jisu ena vuku ki na yagona voki lia, a sa vinakati koya valevu cake tiko lia na Kalou kei ira voki lia na tamata.