¹ Ni ra sa lewe levu era sa boletakia me ra varaitakia nai tukutuku ni veika sa vadinatia deivaki sara vi ita, ² Me vaka na ka era sa tukunia vi ita, ko ira era sa raicia ena matadra ka sa qaravia na vosa, mai nai vatekivu; ³ Sa vinaka voki lia vi au, niu a vatarotarogia matua sara na ka kece lia mai nai vatekivu, meu vivaduitakia ena vola vi ita, Ceofilo na turaga dina. ⁴ mo kila kinia na kena dina ni veika ko sa vatavulici kinia. ⁵ Ena gauna sa tui Jutia kinia ko Eroti, sa dua na bete ko Sakaraia na yacana, ena matabete i Epaia, a sa watina e dua vi ira na luvei Eroni, ko Ilisapeci na yacana. ⁶ A rau sa dodonu sara lia ena mata ni Kalou, e rau sa muria kece sara lia na vunau ki nai varo ni Turaga, ka yali ni cala. ⁷ Sa yali na luvedrau, yali ni rawa ni valuveni ko Ilisapeci, a rau sa qase ruarua sara lia. ⁸ A sa yaco, ni sa caka tiko lia na cakacaka vabete ena mata ni Kalou, ena vuku ni nodra matabete. ⁹ Me vaka sara lia nai valavala ni cakacaka vabete, sa nona itavi voki lia me vakama na ka boi vinaka, ni sa curu sara lia ki na valenisoro ni Turaga. ¹⁰ Ia ko ita na tamata era lewe levu, era sa tu lia e tuba ka masu ni sa kama tiko lia na ka boi vinaka. ¹¹ A sa rairai voki lia vi koya e dua na agilosi ni Turaga, sa tu lia ena yasana i matau ni cabocabo ni ka boi vinaka. ¹² Ia ni sa raicia ko Sakaraia, sa kidroa, a sa kani koya voki lia na rere. ¹³ Sa tukunia vi koya na agilosi, kakua ni rere, Sakaraia, sa rogocia na Kalou na nomuni masu; ka na vakasucumia e dua na luvemunu tagane ko Ilisapeci na watimunu, ia ko na vayacania koya ko Joni. ¹⁴ Ia ko na reki ka marau kinia, ena lewe levu voki lia era na reki ena vuku ni nona sucu. ¹⁵ Ni na levu ko koya ena mata ni Turaga, ka na yali ni somi waini se yaqona; ena vakasinaiti voki lia ena Yalo Tabu, mai na kete i tinana. ¹⁶ Ia ka lewe levu na luvei Isireli ena saumakia mai ko koya ki na Turaga na nodra Kalou. ¹⁷ Ia ena liutakia na yaloi Ilaijia kei na kena kaukauwa, me saumakia na lomadra na qase vata kei ira na gone, vata kei ira voki lia era talaidredre kei na nodra vuku era yalododonu; me varautakia na tamata me ra qai nona voki lia na Turaga. ¹⁸ A sa tukunia voki lia vua na agilosi ko Sakaraia, A cava meu kila kinia na ka koya? niu sa qase, a sa qase voki lia na watiqu. ¹⁹ A sa vosa lia na agilosi, ka tukunia kinia, oi au ko Keperueli, au sa dautu voki lia ena mata ni Kalou; ia kau sa talai voki lia mai meu vosa vi ikodou ka tukunia vi kodou nai tukutuku vinaka koya. ²⁰ Ka raicia, ko na galu lia, ko na yali ni vosa rawa, me yaco mada voki lia na siga ena vayacori kinia na veika koya, ni ko sa yali ni vadinadinatakia na noqu tukutuku, o koya lia ena vayacoria lia ena kena gauna. ²¹ A ra sa waraki Sakaraia voki lia na tamata, a ra sa kidacala voki lia ni sa dede ko koya ena vale ni soro. ²² Ia ni sa curu mai ko koya, sa yali ni tukutuku rawa vi ira: a ra sa qai kila kinia ni sa raicia ko koya e dua na raivotu ena valenisoro, ia sa vatabataba voki lia vi ira ko koya, ka sa galu tiko lia. ²³ Ka ni sa oti lia na nona gauna ni cakacaka, sa qai sara voki yani ki nona vale. ²⁴ A sa oti na visiga koya, sa qai kunekune voki lia na watina ko Ilisapeci, a sa vunitakia ko koya ka vula lima, ka tukunia. ²⁵ Sa cakacaka vakoya vi au na Turaga ena siga sa nakitia ko koya, meu dainia tani na ka kau sa rogorogo ca kinia vi ira na tamata. ²⁶ Ia ena ka ono ni vula sa talai mai kinia na agilosi ko Keperueli mai vua na Kalou; ki na dua lia na koro mai Kalili, a yacana ko Nasareci. ²⁷ Vua e dua voki lia na goneyalewa sa vimusuki voki lia vua e dua na gone tagane na yacana ko Josefa, e na mataqali i Tevita, ia na yacana lia na goneyalewa koya ko Meri. ²⁸ A sa qai vi koya na agilosi, ka tukunia, sa loloma, ko iko sa daulomani! Sa tiko vi iko na Turaga, ko sa kalougata lia valevu vi ira na yalewa tani. ²⁹ Ia ko koya, sa kidroatakia nona vosa, a sa vananumia e lomana se vaevei nai valavala ni vikidavaki va koya. ³⁰ A sa tukunia voki lia vi koya na agilosi, kakua ni rere, Meri, ni ko sa raicia na loloma mai vua na Kalou. ³¹ Ka raicia, ni ko na kunekunetakia ka vasucumia e dua na gone tagane; ia mo vayacani koya ko Jisu. ³² Ena levu ko koya, ka na vatokai lia na luvei koya sa cecere sara, ia na Turaga na Kalou ena solia voki lia vi koya nai tikotiko vaturga ni tamana ko Tevita. ³³ Ia na lewa voki lia ko koya na mataqali i Jekope ka yali ni mudu; ena yali ni oti lia nona matanitu. ³⁴ Sa qai tukunia voki lia vi koya na agilosi ko Meri, ena yaco vabeka lia evei na ka koya, niu se yali ni viyacovi vata ki na dua na tagane? ³⁵ A sa tukunia na agilosi vua, ena qai sobu mai vi iko na Yalo Tabu, ena varurugi iko voki lia na kaukauwa i koya sa cecere sara, ia ena sucu mai vi iko ka na vatokai kinia me ka tabu na luve ni Kalou. ³⁶ Ka raicia na dauvemu ko Ilisapeci, sa kunekunetakia e dua na gone tagane, ni sa matua, ia koya sa kenai ka ono lia ni nona vula, ko koya lia ka vatokai e yava. ³⁷ Ni sa yali ni mama vua na Kalou e dua na ka. ³⁸ Sa qai tukunia voki lia ko Meri, raicia na vada ni Turaga; me yaco vakinia vi au na nomuni tukutuku. A sa qai tani na agilosi mai vi koya. ³⁹ A sa qai ko Meri ena gauna koya, ka qai vatotolo sara lia yani ki colo, ki na dua voki lia na koro ni Jutia. ⁴⁰ A sa curu ki na vale i Sakaraia, a sa vikidavaki voki lia ki Ilisapeci. ⁴¹ Ia ni sa rogocia ko Ilisapeci na tukutuku ni vikidavaki nei Meri, sa rika e ketena na gone, a sa vasinaiti voki lia ko Ilisapeci ena Yalo Tabu. ⁴² A sa tabalakia i colo na domona, ko koya, ka tukunia, ko sa kalougata valevu vi ira na yalewa tani, sa kalougata na vua ni ketemunu. ⁴³ A sa vaevei na ka koya, ni sa qai mai vi au na tinana na noqu Turaga? ⁴⁴ Ka raicia, ni sa rorogo e daligaqu na vosa ni nomunu vikidavaki, sa rika ena reki na gone ena ketequ. ⁴⁵ A sa kalougata ko koya sa vadinatia; ni na vayacoria na ka sa tukunia vua mai vi koya na Turaga. ⁴⁶ A sa tukunia voki lia ko Meri, sa vamalua voki lia na Turaga na yaloqu. ⁴⁷ A sa reki voki lia na yaloqu vua na Kalou na noqui Vabula. ⁴⁸ Ni sa lomania voki lia na nona vada ni sa dravudravua: ka raicia, mai na gauna koya ena tukunia nai tabatamata kece lia niu sa kalougata voki lia. ⁴⁹ Ni sa caka na ka levu eso vi iko ko koya sa qaqa; ia sa dokai voki lia na yacana. ⁵⁰ A sa tu voki lia na nona loloma vi ira sa rerevaki koya, ka yacovia nai tabatamata kece lia. ⁵¹ Sa kaukauwa voki lia na cakacaka ni ligana; sa dui vasesei ira voki lia na viavialevu ko koya ena vuku ni nanumia ni yalodra. ⁵² Sa vasivoi ira va voki lia kinia na kaukauwa mai na nodrai tikotiko, a sa vaceceretaki ira voki lia era tamata lalai. ⁵³ Sa vamamautaki ira voki lia sa via kana ena ka vinaka; A sa vatalai ira voki lia ira era vutuniyau. ⁵⁴ Sa vukei ira voki lia na nona tamata na Isireli, ni sa vananumia lia na nona loloma. ⁵⁵ (Me vaka lia na na nodra vosa vi ira na noda matua) vi Eparama vata ki na nona kawa voki lia ka yali ni mudu. ⁵⁶ A sa tiko vata voki lia ko Meri ka vula tolu beka, a sa lesu voki lia ki nona vale. ⁵⁷ A sa yacovia na siga i Ilisapeci me vasucu kinia, a sa vasucumia e dua na gonetagane. ⁵⁸ A ra sa rogocia ko ira era tiko voleka vua vata kei ira voki lia na dauvena, ni sa lomani koya valevu kinia na Turaga, a ra sa reki vata voki lia kei koya. ⁵⁹ Ia enai kawalu ni siga era sa qai mai kinia me ra cilivia na gone, a ra sa vayacani koya ko Sakaraia, me rau viyacani lia ki tamana. ⁶⁰ Ia sa qai tukunia o tinana, me kakua, me yacana lia ko Joni. ⁶¹ A ra sa tukunia vi koya, sa yali dua na wekamu sa vayacani ena yaca koya. ⁶² A ra sa vatabataba voki lia vi tamana, se cava e vinakatia ko koya me yacana. ⁶³ A sa kerea me yadi mai dua na papa ni volavola, a sa vola, "Me yacana lia ko Joni." A ra sa kurabuitakia kece lia. ⁶⁴ A sa sereki voki lia kinia na gusuna ki na yamena, a sa vosa ko koya, ka varokorokotakia na Kalou. ⁶⁵ A ra sa rere kece lia o ira sa tiko vavolivolitia. A sa kai naki yani na vosa kece lia koya ki na colo taucoko vaka ki Jutia. ⁶⁶ A ra sa tugania e lomadra ko ira kece lia era rogocia, a ra sa tukunia voki lia. Ena vabekaevei nai valavala ni gone koya? A sa tiko vata lia kei koya na liga ni Turaga. ⁶⁷ A sa vasinaiti voki lia ena Yalo Tabu ko Sakaraia na tamana, a sa parofisai mai, ka tukunia, ⁶⁸ "Me varokorokotaki voki lia na Turaga na Kalou ni Isireli; ni sa qai mai me mai vabulai ira voki lia na nona tamata. ⁶⁹ A sa vatuburia vi ita e dua na vivabulai sa vaka lia na kaukamea, ena mataqali i Tevita na nona tamata. ⁷⁰ (Me vaka na ka sa tukunia ko koya ena gusudra lia na nona parofita tabu, mai nai vatekivu ki vuravura. ⁷¹ Na vivabulai voki lia mai na noda meca, mai na ligadra kece voki lia era sa cati ita. ⁷² Me vayacoria na yalololoma vi ira voki lia na noda qase, Me nanumia voki lia na nona viyalayalati tabu. ⁷³ Na bubului sa bubului kinia ko koya vi Eparama na tamada. ⁷⁴ Me solia vi ita, me da vabulai mai na ligadra lia na noda meca, ka qaravi koya voki lia ka yali ni rere. ⁷⁵ Ena yalosavasava ki na cakacaka dodonu e matana, ena visiga kece lia ni noda bula. ⁷⁶ Ia ko iko na gone, ko sa vatokai lia na parofita i koya sa cecere sara. Ni ko sa liu vua na Turaga me caramakia na nona sala. ⁷⁷ Me vatakila vi ita na nona tamata na ka me ra bula kinia, ni sa bokocia na nodra ivalavala ca, ⁷⁸ Ena vuku lia ni nona loloma levu na noda Kalou, sa kida mai kinia vi ita na rarama mai colo. ⁷⁹ Me vararamataki lia vi ira era sa tiko ena butobuto ki na yaloyalo ni mate. Ka me tuberia voki lia na yavada ki na sala ni vivinakati. ⁸⁰ A sa tubu cake na gone, a sa yalomatua sara, a sa tiko voki lia e loma ni veikau me yacovia voki lia na nona siga me varaitaki koya kinia vi ira na Isireli.