¹ Sa qai tukunia voki lia ko Jisu vi iratou na tisapeli. Sa bitakia voki lia e dua na dauniyau ni sa vasabusabutakia tiko na nona i yau e dua na tamata vutuniyau. ² E a qai kacivia na dauniyau na tamata vutuniyau ka tarogia vua. E dua voki lia na ka au sa rogocia tiko? Mo na tukunia kece mai na nomu i tukutuku va-dauniyau ³ Sa qai vakasamatakia na dauniyau na cava me na caka me na kua ni yadi tani kinia vua na nona cakacaka va-dauniyau. ⁴ Sa qai nanumia voki lia o koya e dua na ka me caka me rawa ni ra vinakati koya voki tiko kinia na tamata. ⁵ Sa qai vatekivu voki lia na nona kacivi ira kece na tamata ka ra dinau tu vua na nona i liuliu. ⁶ Sa qai tarogia vi koya nai matai ni tamata ka dinau tu vi koya na nona i liuliu. E vica na nomu dinau? E saumia na taro ko koya ka tukunia ni dua na drau na varau waiwai olive. Sa qai tukunia vi koya me tauria lesu voki na nonai vola ni vidinadinati, dabe sobu voki lia ka vola lia vatotolo me limasagavulu. ⁷ E qai tarogia voki lia vua e dua, O iko, E vica na nomu sa dinautakia, qai saumia ni dua na drau na witi. Qai tukunia vua me tauria na nona i vola ni vidinadinati, dabe sobu ka vola voki vatotolo ni walusagavulu. ⁸ E yali ni dodonu voki lai na ka e caka ko dauniyau ia e vacerecerei koya voki lia o nona i liuliu. Era sa qaseqase cake voki lia na luvei vuravura mai vi ira voki lia na luveni rarama. ⁹ Au tukunia voki vi ikodou, "Dou vayagatakia nai yau yali ni dodonu me so voki kinia na nomudou i tokani, ni gauna ena yali yaga voki lia kinia na i yau, era na ciqomi ikodou voki lia ena i tikotiko e tu dei. ¹⁰ O koya voki lia e dina ena ka lailai, ena dina voki lia ena ka levu ia o koya e yali ni dina ena ka lailai ena yali voki ni dina ena ka levu. ¹¹ Ke dou yali gona ni dina voki lia ena i yau yali ni dodonu, dou na qai niutakia vacava mo dou dina voki lia enai yau e yali ni dodonu? ¹² Ke dou yali voki lia ni dina ena nona i yau e dua, "O cei ena qai solia voki lia vi ikodou na ka me nomudou? ¹³ E yali ni dua na dauniviqaravi me na qaravia rawa e rua na turaga, baletia ni na catia e dua ka lomania na kena i karua, se kabitia voki lia e dua ka beci voki lia na kena i karua. Dou na yali ni rawatia mo dou qaravia voki lia na Kalou ki na nomudou i yau. ¹⁴ Era rogocia voki lia tu na Farisi ni ra tamata matamata i lavo voki lia. Sa dua voki lia na ka na nodra sevaki Jisu. ¹⁵ A sa mani tukunia voki lia vi ira ko Jisu, "Ko ikodou koya ko ni vadonui ikodou voki lia ena mata ni tamata. Ia e kila voki lia na Kalou na lomamudou. "Na ka e vabibitakia voki lia na tamata e ka vasisila voki lia e mata ni Kalou. ¹⁶ E mai yala voki lia e na gauna i Joni na lawa ki na i vola ni Parofita. Me tekivu voki lia me vunautakia na vosa ni Kalou ka ra sa yali voki lia na tamata kece lia me ra lewenia. ¹⁷ E rawarawa voki lia me na takali voki ko lomalagi ki vuravura. ka dredre voki lia me na yali ni vayacoria e dua voki lia na tiki ni lawa. ¹⁸ Na tagane e dainia na watina qai vawati voki lia, esa vibutokoci. Na tagane voki lia e vawatitakia na yalewa sa sere mai, e vi butokoci voki lia. ¹⁹ E dua voki na tagane vutuniyau e dau vaisulu lokaloka ki na lineni voki lia. E marautakia na bula vutuniyau na visiga. ²⁰ E dua voki na dau kerekere ka dau toka voki lia i na nona matamata, ka yacana voki lia o Lasarusa. E robotia kece lia na yagona na vidikoso. ²¹ E dau via kania voki lia na tikitiki ni kakana ka lutu voki lia mai e na teveli ni kana ni tamata vutuniyau. Ka ra dau dramicia voki lia na koli na nona vidikoso. ²² Sa qai mate voki lia na tamata dau kerekere ka yadi koya na agilosi me lai dabe voki lia e na yasai Eparama. Ka mate voki lia na tagane vutuniyau ka lai bulu voki lia. ²³ NI sa tu voki lia e nai bulubulu sa qai tucake voki ena nona vararawataki. Qai raici Eparama vata ki Lasarusa voki lia vayawa ni dabe toka e yasana. ²⁴ Mani kacivakia yani, "Tamaqu Eparama, Ni lomani au mai. Talai Lasarusa voki lia mai me mai tonia voki lia na mua ni qaqalo e na wai, me mai vabatabata voki lia na yamequ, Ni sa tarai au voki lia vabibi na katakata ni buka ²⁵ Ia e tukunia ko Eparaama, "Luvequ, nanumia voki lia na ka vinaka kece lia ko sotavia ena nomu bula, ia a sotavia voki lia ko Lasarusa mai vuravura na ka ca. Ia na guna koya, sa na vacegu voki lia o koya, ko sa rarawa voki lia ²⁶ Ka kuria voki lia, Ni sa mai wasea ita voki e dua na i keli vaitamera. Yali ni rawa vi ira i vanua koya me ra dewa voki lia yani vi iko, ka yali voki lia ni na dua e dewa mai vi kimamu. ²⁷ E qai tukunia voki lia ke sa va koya voki lia tamaqu mo ni qai talai koya voki lia kina vale nei noqu qase, ²⁸ ni lewe lima voki lia na taciqu, me qai ki vamacalatakia vavinaka vi iratou me ratou na kakua ni mai tini voki lia ena vanua ni vivararawataki au sa mai tu kinia koya. ²⁹ Qai saumia ko Eparaama, me ratou na qai varorogo voki lia vi Mosese vata ki ira na parofita. ³⁰ Sa qai saumia mai na tamta vutuniyau , "Yali Tamaqu Eparaama. E ratou na qai vivutuni ni ratou raicia ni dua na tamata sa bula mai na mate voki me vunau vi iratou. ³¹ Qai tukunia ko Eparaama, "Kevaka voki lia eratou yali ni rogocia mai vi Mosese ki ira na Parofita, eratou yali lia ni kauwai ke dua e vaturi voki lia mai na mate.