¹ Sa qai toro voleka mai vi koya ko ira kece lia na kumunia nai vacavacava, ki ira voki lia a tamata i valavala ca, me ra rogoci koya. ² A sa vosakudrukudru ko ira kece lia na Farisi ki ira voki lia na vunivola, ka tukunia, ko koya sa vilasamaki vata ki ira na tamata ca, ka kana vata voki lia ki ira. ³ A sa tukunia vi ira ko koya na vosa vatautauvata, ka vaka, ⁴ Ko cei vi ikonu na tamata, sa dua na drau na nona sipi, kevaka sa vayalia e dua vi ira ena yali beka ni dainia tu na ciwasagavulu ka ciwa ena vico, ka vaqarai koya sa yali me kunea mada? ⁵ Ia ni sa raicia, sa viribale ki domona, ka reki. ⁶ Ia ni sa lesu voki ki na nona vale, sa kacivi ira vata na wekana ki ira voki lia na ni koro, ka tukunia vi ira. Tou mai reki vata, niu sa raicia na noqu sipi ka yali. ⁷ Au sa tukunia vi ikonu, ni sa levu vakinia na reki mai lomalagi ena vuku ni tamata i valavala ca e lewe dua loa lia sa qai vivutuni, ia ka lailai lia ena vukudra na tamata yalododonu e lewe ciwasagavulu ka ciwa, sa yali ni yaga vi ira na vivutuni. ⁸ Se ko cei voki na yalewa sa tini na nona tiki ni siliva, kevaka sa vayalia e dua na tikinia, sa yali beka ni tutuvakia na cina ka tavirakia na vale, ka vaqara matua me raicia mada? ⁹ Ia ni sa raicia, sa kacivi ira vata na wekana ki ira voki lia na lewe ni koro, ka tukunia, Tou mai reki vata, niu sa raicia na tikinia kau a vayalia. ¹⁰ Au sa tukunia vi ikodou, sa vakinia na reki ena matadra na agilosi ni Kalou, ena vuku voki lia ni tamata i valavala ca e dua loa lia sa qai vivutuni. ¹¹ Sa tukunia voki ko koya, E dua lia na tamata sa lewe rua na luvena tagane: ¹² Ka sa tukunia vi tamana koya sa gone virau, I Tamaqu, solia mai vi au nai votavota ni yau sa vota me noqu. A sa vota vi rau na i yau. ¹³ A sa bogi vica lia, sa qai kumunia vata na ka kece lia na gone, ka qai tani ki na dua na vanua vayawa, ka sa vayalia kinia na nona i yau ena i valavala vamarau ca. ¹⁴ Ia ni sa vaotia kece, sa qai tubu na dausiga levu ena vanua gona, a sa qai dravudravua sara lia ko koya. ¹⁵ A sa qai tiko voki lia ki na dua na lewe ni koro gona; a sa talai koya kinia nona viwere me vakani ira na vuaka. ¹⁶ A sa garovia na qana era dau kania na vuaka, me mamau kinia na ketena; a sa yali ni dua sa vakani koya. ¹⁷ Ia ni sa kilai yalona voki, sa tukunia , sa lewe levu na tamata nei tamaqu sa voli na nodra cakacaka, era sa mamau ena madrai ka vo voki tu yani, ia koi au sa mate ena viakana. ¹⁸ au na ia, ka qai vi tamaqu, kau na tukunia vua, Tamaqu au sai valavala ca ki lomalagi, vi ikonu voki lia. ¹⁹ Kau sa yali kinia ni yaga meu vatokai voki me luvemu: lesi au meu vatakia e dua na nomuni tamata sa voli na nona cakacaka. ²⁰ A sa tucake, ka lesu voki lia vi tamana. Ia ni sa yawa sara, sa raici koya ko tamana, a sa lomania, ka cicivia, ka mokotia, ka regucia. ²¹ A sa tukunia na luvena kivei koya, I Tamaqu au sai valavala ca ki lomalagi, vi ikonu voki lia, kau sa yali kinia ni yaga meu vatokai voki meu luvemuni. ²² A sa tukunia na tamana vi ira na nona tamata, Dou yadia mai na i sulu vinaka sara, ka vaicurucuru taki koya; daramakia voki lia edua na mama ki ligana, ki na i vava ki na yavana. ²³ ia dou yadia mai na luve ni pulumakau sa uro, ka vamatea; ka me datou kana, ka marau; ²⁴ ni sa mate na luvequ koya, ka sa qai bula voki; sa yali ka sa qai kune voki. A ra vatekivu me ra marau. ²⁵ A sa tiko mai na were na luvena ka qase vi rau; ia ni sa lesu voki mai ka toro volekatia na vale, sa rogocia na bitu ni vatagi ki na meke voki lia. ²⁶ A sa kacivia e dua vi ira na tamata, ka tarogia nai kena ibalebale ni soqo sa caka tiko. ²⁷ A sa tukunia vua ko koya, sa lesu voki mai na tacimu; ka sa motukia ko tamamu na luveni pulumakau sa uro, ena vuku lia ni sa lesu voki mai ka sa bula vinaka. ²⁸ A sa cudru ko koya, ka sa yali ni via curu i vale sa qai mai ki tuba ko tamana ka vamasuti koya. ²⁹ Sa qai vosa ko koya, ka tukunia vi tamana, Raicia, e levu na yabaki koya kau sa qaravi iko kinia, ia kau sa yali sara lia ni talaidredre ki na nomuni vosa: ia ko sa yali sara lia ni solia vi au e dua lowa lia na luve ni me, me kitou marau vata kinia ki ira na wekaqu: ³⁰ ia ni sa lesu voki mai na luvemu koya, ko koya sa vaotia na nomui yau vi ira na yalewa dautagane, ko sa vamatea me kena na luveni pulumakau uro. ³¹ A sa tukunia vua ko koya, Na luvequ e daru sa tiko vata lia vadua, ia na ka kece lia sa tu vi au sa nomu. ³² Ia sa dodonu lia meda reki, ka marau voki lia, ni sa mate na tacimu koya, ka sa qai bula voki; sa yali, ka sa qai virai voki.