5 ¹ Ni keitou sa kila, kevaka sa rusa na neitou vale vavuravura o koya sa vacevaceva, sa dua na neitou mai vua na Kalou, a vale sa yali ni caka e na liga, sa yali ni rusa rawa, mai lomalagi. ² Io keitou sa vutugu e na yago koya, ni keitou sa gadrevia sara tiko vaisulutakia e na nitou vale mai lomalagi: ³ ke sa vaka ni kitou sa vaisulu, keitou sa yali ni laurai me keitou televua. ⁴ Ni keitou sa vutugu, oi keitou sa tiko e na vale vacevaceva, ni kitou sa bitaki: ni keitou sa yali ni via luvatia koya, me keitou vaisulu mai, me tilomia na ka sa mate rawa na bula. ⁵ Ia sai koya na Kalou sa varautaki kitou ki na ka koya, o koya sa solia voki lia vei kitou na Yalo Tabu me kenai sevu. ⁶ O koya koya kitou sa doudou tiko lia kinia, ni keitou sa kila, ni kitou sa tiko e na yago, kitou sa tawase kei na Turaga: ⁷ (Keitou sa qai voli e na vabautia, ka yali lia e na raicia:) ⁸ keitou sa doudou tiko, ka keitou sa vinakatia cake me keitou tawase kei na yago, ka tiko vata kei na Turaga. ⁹ O koya koya keitou sa dauvatovolea kinia se keitou tiko vata, se tawase tani, me keitou vinaka lia vua. ¹⁰ Ni da na rairai koi keda kece lia e na mata ni tikotiko ni veilewai nei Karisito; me da rawatia yadua nai sau ni veika sa caka e na yagona, me vaka na veika sa caka ko koya, se vinaka se ca. ¹¹ Ia ni keitou sa kila na veivarerei ni Turaga, keitou sa vamasuti ira na tamata; ia keitou sa varaitaki vua na Kalou; au sa dinatia voki lia ni keitou sa varaitaki e na nomudou lewa-eloma. ¹² Ia keitou sa yali ni tukuni keitou voki vei kodou, ia keitou sa solia lia vei kodou na ka mo dou rekitaki keitou kinia, me so kinia na ka mo dou kaya vei ira sa dokai ira e na ka vaka rairai loa lia ka sa yali e na ka ni yalo. ¹³ Ia kevaka keitou sa sesewa, sa ka lia vua na Kalou; kevaka keitou sa yalomatua, sa ka lia e na vukumudou. ¹⁴ Ni sa rawai keitou sara na loloma i Karisito: ni keitou sa lewa vaka koya, kevaka sa mate e dua e na vuku ni tamata kece lia, era sa mate kece lia; ¹⁵ ka sa mate ko koya e na vuku ni tamata kece lia, me ra kakua ni bula tiko me yaga vei ira lia, ko ira era sa bula, me ra yaga lia vua sa mate e na vukudra ka tu cake voki. ¹⁶ O koya koya keitou sa qai yali voki ni doka e dua na tamata e na vuku ni ka vayago; e dina lia keitou sa dokai Karisito e na vuku ni ka vayago, ia keitou sa qai yali voki ni dokai koya kinia. ¹⁷ Ia kevaka sa tu vata kei Karisito e dua na tamata, sa qai buli vou: sa qai tani na veika makawa; raicia, sa yaco me vou na ka kecelia. ¹⁸ A sa vu mai vua na Kalou na ka kece lia, o koya sa vaveivinakatitaki ita kei koya e na vuku i Karisito, a sa solia vei keitou me keitou vunautakia na veivinakati; ¹⁹ me vaka koya, sa ia na Kalou, me vaveivinakatitakia na vuravura vei koya lia e na vuku i Karisito, ka sa yali ni wilikia vei ira na nodra i valavala ca; ka sa solia vei keitou nai tukutuku ni veivinakati. ²⁰ Keitou sa yaco kinia mei talatalai Karisito, me vaka sa vamasuti kodou na Kalou e na gusu i keitou: keitou nai sosomi kei Karisito, keitou sa vamamasu, mo dou veivinakati kei na Kalou. ²¹ O koya sa yali vua na cala sa qisia ko koya mei soro lia ni nodai valavala ca; me vayacori kinia vei ita na veivadonui ni Kalou e na vukuna.