6 ¹ Ia koi keitou ni keitou sa cakacaka vata kaya, keitou sa cikevi kodou mo dou kakua ni vatawayagatakia na loloma ni Kalou. ² (Ni sa tukunia ko koya, "Au a rogoci iko e na gauna ni vinakati, Ia e na gauna ni bula kau a vukei iko: raicia, ko ya na gauna ni vinakati; raicia, na siga ni bula edaidai koya.") ³ Keitou sa yali ni vatarabetakia e dua e na dua na ka, me kakua ni beitaki kinia na cakacaka vaitalatala: ⁴ ia e na ka kece lia keitou sa vadinadinatakia ni keitou sai talatala ni Kalou, e na dauvosotia sara, e na ka rarawa, e na veivasaurarataki, e na yaluma, ⁵ e na vakanakuitataki, e na dai ki na vei vale ni veivesu, e na ue, e na daucakacaka, e na dauyadra, e na daulolo; ⁶ e nai valavala savasava, e na vuku , ena vosotia vadede, e na yaloloma, ena Yalo Tabu, e na loloma sa yali ni veivakaisini, ⁷ e nai vavuvuli dina, e na kaukauwa ni Kalou, e nai yaragi ni valavala dodonu e na liga i matau kei nai mawi, ⁸ ni keitou sa varokorokotakia tiko se keitou yali ni dokai, ni keitou sa rogo vinaka tiko se rogo vakaca: ni keitou sa vaka na dauveivacalai, ia keitou sa dina lia: ⁹ sa vaka keitou sa yali ni kila, ia ka sa kilai vinaka; sa vakataki ira sa mate, ia ka raicia, ¹⁰ keitou sa bula tiko; keitou sa vataki ira sa cudruvi, ia ka yali ni vamatei; keitou sa vaka keitou sa daurarawa, ia keitou sa reki tiko lia; sa vaka keitou sa dravudravua, ia keitou sa vavutuniyautaki ira na lewe vuqa; sa vaka ni sa yali vei keitou e dua na ka, ia ka sa tu vei keitou na ka kecelia. ¹¹ Oi kodou na kai Korinica, sa dalaga na gusu i keitou vei kodou, sa valevutakia na yalo i keitou. ¹² Dou sa yali ni leqa e na vuku i keitou, dou sa leqa lia e na lomamudou. ¹³ Ia me vaisautaki na ka koya, (Au sa qai vosa me vaka vei ira na luvequ.) dou yalolevu voki lia koi kodou. ¹⁴ Dou kakua ni veitokani vata vatani kei ira era sa yali ni vabautia: sa veitokani vaevei na yalododonu kei na tawa-yalododonu? se rau sa veiwekani vaevei na rarama kei na butobuto? ¹⁵ se rau sa veivinakati vaevei na Karisito kei Piliali? se rau sa vaitavi vata vaevei ko koya sa vabautia kei koya sa yali ni vabautia? ¹⁶ se rau na to vata vaevei na vale ni Kalou kei na veimatakau? ni da sa vale ni Kalou bula; me vaka sa tukunia na Kalou, "Au na tiko e na lomadra, ka wai voli kinia; ia kau na nodra Kalou ka ra na noqu tamata." ¹⁷ O koya koya Mo dou qai qai tani maivei ira, ia dou tawasei tu", sa tukunia na Turaga, "Ka dou kakua ni tara na ka sa yali ni savasava; Au na qai vabauti kodou. ¹⁸ Ia kau na yaco me Tamamudou, Ka dou na yaco me luvequ tagane kei na luvequ yalewa," sa tukunia na Turaga Kaukauwa sara.