4 ¹ O koya ni sa soli vei keitou na cakacaka koya, ka me vaka sa yaco vei keitou na loloma, keitou sa yali ni datuvu kinia, ² ka keitou sa dainia na veika vuni e vivamaduataki, a sa yali ni daulawaki na neitou i valavala, se keitou vatanitakia na vosa ni Kalou; ia ni keitou sa tukunia na ka dina, keitou sa vadonui keitou kinia ki na lomadra na tamata kece lia, e na mata ni Kalou. ³ Ia kevaka sa vuni na neitou i tukutuku-vinaka, sa vuni tu kivei ira lia era sa rusa: ⁴ vei ira sa vamatabokotakia na lomadra na kalou ni vuravura koya, era sa yali ni vabautia, me kakua kinia ni cilavi ira na rarama ni tukutuku-vinaka ni serau i Karisito, o koya lia na yaloyalo ni Kalou. ⁵ Ni keitou sa yali ni vunautaki keitou, ko Jisu Karisito lia na Turaga; kei keitou na nomudou tamata e na vuku i Jisu. ⁶ Ni sai koya na Kalou, o koya sa kaya e liu me cila mai na butobuto na rarama, sa cila mai ki na loma i keitou, me cila yani kinia nai serau ni Kalou, o koya sa vatakilai rawa e na mata i Jisu Karisito. ⁷ Ia sa waqa qele sa tu kinia vei keitou nai yau koya, me sa taka mai vua na Kalou na kaukauwa mana levu, ka me yali maivei keitou. ⁸ Sa buku na druadrua, ia keitou sa yali ni drigiti; ⁹ keitou sa vacacani, ia keitou sa yali ni dai laivi; keitou sa vabalei sobu, ia keitou sa yali i varusai; ¹⁰ keitou sa colata e na yago i keitou e na veisiga kecelia na mate i Jisu, me varaitaki voki lia kinia na bula i Jisu e na yago i keitou. ¹¹ Ni keitou sa soli tiko e na veisiga, koi keitou sa bula voli, me keitou mate e na vuku i Jisu, me varaitaki voki lia kinia na bula i Jisu, e na yago i keitou sa mate rawa. ¹² A sa vakinia, sa daucakacaka vikeitou na mate, ia na bula lia vei kodou. ¹³ Ia ni sa tiko vikeitou na yalo vabautia gona, me vaka na ka sa vola, Au sa vabautia, okoya kau sa vosa kinia; keitou sa vabautia vokilia, o koya keitou sa vosa kinia; ¹⁴ ni da sa kila, o koya ka vatura cake voki na Turaga ko Jisu ena vaturi keitou cake vata vokilia kei Jisu, ka varaitaki ita kei kodou. ¹⁵ Ni sa yaco e na vukumudou na ka kecelia me varokorokotakia valevu cake na Kalou e na loloma sa levu sara, ni sa vavinavinakatakia ko ira na lewe vuya. ¹⁶ E na vuku ni ka koya keitou sa yali ni datuvu kinia; ia kevaka sa rusa mai na yagoda esau, sa vavoui na tamata e loma e na visiga kecelia. ¹⁷ Ia na noda rarawa mamada, sa dede valailai sara lia, sa vayacoria vei ita na serau levu sa uasivi cake valevu sara, ka tawa mudu, ¹⁸ ni da sa yali ni vananumia tiko na veika sa rairai mai, na veika lia sa yali ni rairai mai; ni sa dede valailai lia na veika sa rairai mai; ia sa yali ni mudu na veika sa yali ni rairai mai.