3 ¹ Keitou sa vatekivu voki beka me tukuni keitou? se sa yaga beka vei keitou me keitou tukuni vei ikodou enai vola eso, me vataki ira eso, se me keitou tukuni vakakinia mai vei ikodou? ² Oi kodou lia na neitou i vola sa volai e na loma i keitou, era sa kila ka wilikia ko ira na tamata kece lia; ³ sa varaitakia lia ni dou sai vola i Karisito keitou sa caka, sa yali ni volai e na wai ni volavola, sa volai lia ena Yalo ni Kalou bula; sa yali lia e na dela ni vatu, ia e na dela ni yalomudou sa malumu. ⁴ Ia sa va koya na neitou vararavi vua na Kalou na vuku i Karisito; ⁵ ni keitou sa yali ni rawatia vakai itatou me vasamatakia ni rawa vakai itatou e dua na ka; ia sa vu mai vua na Kalou lia sa neitou kaukauwa; ⁶ o koya sa varautaki itatou me itatou sai talatala ni viyalayalati vou: a sa yali ni va sa volai, a ka vayalo lia; ni sa ia na vivamatei na ka sa volai, ka sa ia na vivabulai na ka vayalo. ⁷ Ia kevaka sa yaco vata kei na serau na cakacaka sa ia kinia na vivamatei, sa volai ka ceuti e na vatu, a ra sa yali ni varaicia rawa kinia na mata i Mosese ko ira na luve i Isireli e na vuku ni serau ni matana, ia sa qai qai tani koya: ⁸ e na yali beka ni uasivi cake kinia na serau ni cakacaka vayalo? ⁹ Io, kevaka sa dua na serau ni cakacaka ni cudruvi, ena uasivi cake valevu na serau ni cakacaka ni viivadonui. ¹⁰ Ia na ka ka serau, sa qai yali so na kena serau ni sa vatauvatanitakia kei na serau sa uasivi ¹¹ cake. Io, kevaka ka serau na ka sa dai tiko yani, ena dina valevu cake ni sa serau tiko na ka sa tu vadua. ¹² Ia ni sa tu vei itatou nai nuinui vagona, keitou sa qai vosa vamacala sara: ¹³ ia itatou sa yali ni vataki Mosese ni sa ubia na matana e na tutuvi, me ra kakua ni varaicia matua ko ira na luve i Isreli ki nai otioti ni ka sa dai tiko yani: ¹⁴ ia ka sa valomaqatakia na lomadra: ni sa tu lia na tutuvi gona ka yacovia na siga koya ni sa wili na viyalayalati makawa, sa yali lia ni yadi tani; ni sai Karisito sa yadi tani kinia na tutuvi koya. ¹⁵ Ia ka sa yacovia na siga koya, ni sa wili ko Mosese, sa tu lia e na lomadra na pulou. ¹⁶ Ia ni sa saumaki koya vua na Turaga, e na qai yali tani na tutuvi. ¹⁷ Ia na Turaga sai koya lia na Yalo Tabu; ia sa sereki ko koya, sa tu vua na Yalo ni Turaga. ¹⁸ Ia koi keda kece lia, ni sa yali ni tabonaki tiko na matada, era sa raicia na serau ni Turaga me vaka e nai iloilo, ka sa vamataliatakia me da vataki koya, ni sa tubu cake tiko na serau me uasivi, me vaka na Turaga o koya na Yalo Tabu.