4 ^{1 2} Me vaka ni sa vararawatakia vaka koya na Karisito ena yagona, mo ni vakaiyaragitaki ikonu voki lia vakinia ena nona i tovo ni rai, baletia ni o koya sa vararawataki ena yago sa tarovi koya mai na i valavala ca. 2Ena vuku ni ka koya, mo ni bulatakia kinia na bula sa liutaki mai vua na Kalou ena vo ni nomuni bula, ka me yali voki ni lewai ikonu na veigagadre vayago. ³ A sa bau dua toka na gauna balavu na nomuni a bulatakia voli mai na nodra i tovo ni bula na yali lotu. O ni a dau golevia kinia na veika yali ni kilikili, na garogaro ca, na mateni, na i tovo vasisila ni yago, na i soqosoqo ni gunu eso, kei na i varau lialia ni qaravi kalou tani. ⁴ Era sa kurabui kinia koya na yali lotu ena vuku ni nomuni sa yali ni duavata kei ira ena vayacoria ni i tovo velavela vakoya, ka ra sa vosa vacacataki ikonu kinia. ⁵ Ia era na qai saumia lia na taro vakai ira vua na Kalou, o koya sa tu varau me lewai ira na bula kei na mate. ⁶ Koya na vuna sa vunautakia voki lia kinia na i Tukutuku Vinaka vei ira na mate, o ira sa lewai oti ena vuku ni nodra bula vayago me vaka ni sa ia na veilewai vei ira na tamata kecega; a sa vunautaki vei ira me rawa ni ra bula lia kinia vua na Kalou ena yalodra. ⁷ Sa voleka mai na i vataotioti ni veika kece lia. O koya koya mo ni tauria vabibi sara kinia na veika vayalo kei na bulatakia ni bula vakaivarau, ena vuku ni kena yadravi na masumasu. ⁸ Sa ka bibi duadua mo ni veilomani dina sara vakai ikonu, ni sa ubia na i valavala ca e levu na loloma. ⁹ Ni dolavia na nomuni vale vei ira na wekamuni ka kakua ni vosa kudrukudru kinia. ¹⁰ Me vaka e dua na dauniyau vinaka ni solisoli ni Kalou, mo ni vayagatakia vinaka kinia ena vukudra na tani na veisolisoli duidui eso sa solia vei ikonu na Kalou. ¹¹ Kevaka e dua sa dauvosa, me ia lia o koya na vunautakia na vosa ni Kalou; o koya sa dauveiqaravi me ia lia na veiqaravi ena kaukauwa sa solia vua na Kalou, me rawa kinia ni valagilagi na Kalou ena veika kece lia ena vuku i Jisu Karisito, o koya sa nona na lagilagi kei na kaukauwa ka yali ni mudu. Emeni. ¹² Oi ikonu na wekaqu lomani, ni kakua ni kurabui ena vuku ni rarawa levu sa yaco tiko vei ikonu mo ni vatovolei kinia, me vaka beka ni sa yaco tiko vei ikonu e dua na ka vou. ¹³ Ia mo ni yalo vacegu ka marau lia ena vuku ni nomuni sa vakaivotavota tiko ena veivararawataki i Karisito, me rawa ni ka taucoko kinia na nomuni reki ni sa vatakilai na nona lagilagi. ¹⁴ Kevaka o ni sa vacacani ena vuku ni yaca i Karisito, o ni sa kalougata sara kinia. Sa dusia koya ni sa mai tiko vei ikonu na Yalo sa lagilagi, na Yalo ni Kalou. ¹⁵ Kevaka e dua vei ikonu sa vararawataki, ia me kakua lia ena vuku ni laba, se butako, se basulawa, se vakaucaca ena ikonu maliwa. ¹⁶ O koya koya mo ni kakua kinia ni maduatakia na veivararawataki sa yaco vei ikonu ena vuku ni vabauta Vakarisito, ia mo ni vavinavinaka lia vua na Kalou ni o ni sa tokara na yaca i Karisito. ¹⁷ Sa yaco mai na gauna me tekivutaki kinia na veilewai, ka ra na lewai taumada eliu na tamata ni Kalou; ia kevaka sa tekivu vei ita, a cava ena qai kedra i tinitini o ira era sa yali ni vabautia na nona i Tukutuku Vinaka na Kalou? ¹⁸ Me vaka sa tukunia na i Vola Tabu, “Sa dredre sara vei ira na tamata vinaka me ra vabulai; A cava ena yacovi ira na tamata ca, era sa yali ni kila na Kalou?” ¹⁹ O koya koya me ra qai soli ira taucoko kinuia vua na Dauveibuli o ira era sa vararawataki me vaka na loma ni Kalou, ka me ra ia lia na caka dodonu.