3 ¹ Oi ikonu na yalewa vawati, ni vamalumalumutaki ikonu taumada vei ira na watimuni. Kevaka eso vei ira era yali ni vabautia na vosa ni Kalou, ena rawa ni yaco me ra vabautia ena vuku ni nomuni i vakarau, ka na yali ni yaga mo ni taucia e dua na vosa ² ni ra sa na raicia tiko lia na nomuni i varau varokoroko ka savasava. ³ Ia me kakua ni nomudou nai ukuuku e taudaku, na tali drau ni ulu, kei nai ukuuku koula, kei na daramakia nai sulu; ⁴ ia na ka vakayalo lia sa vuni, e na ka sa yali ni vuca rawa, na yalomalumalumu kei na yalomalua, oqori sa ka talei sara e na mata ni Kalou. ⁵ Ni ra sa vaka kinia ko ira voki lia na yalewa yalosavasava e na gauna eliu, era sa vakararavi vua na Kalou, ni ra sa vaiukuukutaki ira, ni ra sa dautalairawarawa vei ira na watidra: ⁶ me vaka sa talairawarawa ko Sera vei Eparaama, ka vakatokai koya me turaga; ia dou sa luvena, ni dou sa caka vinaka tiko, ka yali ni rerevaka e dua na ka dauveivakarerei. ⁷ Oi ikodou voki lia na tagane, dou tiko vata kei na watimudou me vaka na tiko vavuku, mo dou doka na yalewa, me vaka sa ka malumalumu, ni dou sai taukei vata e na loloma ni bula; me kakua ni tarovia na nomudrau masu. ⁸ Ia meu tinia, dou lomavata kece lia, dou ia na loloma vakai ikodou, dou veilomani me vaka na veitacini, dou yalololoma, dou lokomi: ⁹ kakua ni veisausaumitakia na ca, se ia voki na veivasewasewani; ia dou dua tani, dou vosavakalougatataka lia: ni dou sa kacivi me vakina, mo dou rawatia na ka e veivakalougatataki, ¹⁰ Ia Ko koya sa vinakatia na bula, Ka sa via raicia na gauna vinaka, Me tarovia na yamena mai na ca, kei na tebenigusuna me kakua ni vosatakia na ka lasu: ¹¹ Me lesu tani mai na ca ko koya, ka caka na ka vinaka; Me vasaqara na vacegu, ka muria sara. ¹² Ni sa wanonovi ira na tamata yalododonu na mata ni Turaga, Ka sa qara tu na daligana ki na nodra masu; Ia sa dua tani na mata ni Turaga vei ira sai valavala ca. ¹³ Ia ko cei ena vakacacani ikodou, kevaka dou gumatua e na ka vinaka? ¹⁴ Ia kevaka dou sa vakararawataki e na vuku ni valavala dodonu, dou sa kalougata kinia; ia dou kakua ni rerevakia na nodra dauveivakarerei, se kidroa kinia: ¹⁵ Ia ni varokorokotaki Karisito lia ena yalomuni, ka dokai koya ni sa nomuni Turaga. Ni dau varau tu ena veigauna kece lia mo ni vamacalatakia vua na tamata yadua e via kila na i nuinui sa tu vei ikonu, ¹⁶ ia mo ni caka koya ena yalomalumalumu kei na varokoroko. Ni qaraunia me savasava tiko na nomuni lewa-e-loma, me yaco kinia, ni o ni sa vasewasewani, me ra madua o ira sa vosavakacacatakia na nomuni i varau vinaka ena nomuni sa tu vata kei Karisito. ¹⁷ Ni sa vinaka cake mo ni vararawataki ena vuku ni caka dodonu, kevaka sa loma ni Kalou koya, ka ca lia na caka cala. ¹⁸ Ni sa mate oti vadua lia me baletuia na i valavala ca na Karisito, o koya na yalododonu ena vukudra na dau caka cala, me yadi ita rawa kinia vua na Kalou. A sa yaco o koya me mate ena yago, ia sa qai yaco me bula vayalo, ¹⁹ ka sa la'ki vunau kivei ira na yalo era sa tiko ena valeniveivesu. ²⁰ Koya na yalodra o ira era a talaidredre vua na Kalou ena nona a vosoti ira tu vadede ena gauna sa taya tiko kinia o Noa na nona waqa. O iratou na lewe vica lia ka tiko ena loma ni waqa, eratou lewe walu taucoko, sa vabulai lia ena wai. ²¹ Na wai koya sai dusidusi ni papitaiso, ka sa ia na veivabulai ni kua. Koya e yali ni kena vasavasavataki na duka mai na yago, ia sa dusia lia na vosa ni yalayala sa vayacoria vua na Kalou mai na lewa-e-loma savasava. Sa vabulai ikonu ena vuku ni tu cake voki mai na mate i Jisu Karisito, ²² o koya sa qai cake ki lomalagi ka sa tiko ena liga i matau ni Kalou. A sa lewai ira kece sara na agilosi o koya, ka vakinia o ira sa kaukauwa ka daulewa mai lomalagi.